সূক্ত 60

60.1

১২ মৈত্রাবরুণির্বসিষ্ঠঃ। ১ সূর্যঃ , ২-১২ মিত্রাবরুণৌ । ত্রিষ্টুপ্।

যদদ্য সূর্য ব্রবোঽনাগা উদ্যন্মিত্রায় বরুণায় সত্যম্ ।
বয়ং দেবত্রাদিতে স্যাম তব প্রিয়াসো অর্যমন্গৃণন্তঃ ॥১॥

এষ স্য মিত্রাবরুণা নৃচক্ষা উভে উদেতি সূর্যো অভি জ্মন্ ।
বিশ্বস্য স্থাতুর্জগতশ্চ গোপা ঋজু মর্তেষু বৃজিনা চ পশ্যন্ ॥২॥

অয়ুক্ত সপ্ত হরিতঃ সধস্থাদ্যা ঈং বহন্তি সূর্যং ঘৃতাচীঃ ।
ধামানি মিত্রাবরুণা যুবাকুঃ সং যো যূথেব জনিমানি চষ্টে ॥৩॥

উদ্বাং পৃক্ষাসো মধুমন্তো অস্থুরা সূর্যো অরুহচ্ছুক্রমর্ণঃ ।
যস্মা আদিত্যা অধ্বনো রদন্তি মিত্রো অর্যমা বরুণঃ সজোষাঃ ॥৪॥

ইমে চেতারো অনৃতস্য ভূরের্মিত্রো অর্যমা বরুণো হি সন্তি ।
ইম ঋতস্য বাবৃধুর্দুরোণে শগ্মাসঃ পুত্রা অদিতেরদব্ধাঃ ॥৫॥

ইমে মিত্রো বরুণো দূলভাসোঽচেতসং চিচ্চিতয়ন্তি দক্ষৈঃ ।
অপি ক্রতুং সুচেতসং বতন্তস্তিরশ্চিদংহঃ সুপথা নয়ন্তি ॥৬॥

ইমে দিবো অনিমিষা পৃথিব্যাশ্চিকিত্বাংসো অচেতসং নয়ন্তি ।
প্রব্রাজে চিন্নদ্যো গাধমস্তি পারং নো অস্য বিষ্পিতস্য পর্ষন্ ॥৭॥

যদ্গোপাবদদিতিঃ শর্ম ভদ্রং মিত্রো যচ্ছন্তি বরুণঃ সুদাসে ।
তস্মিন্না তোকং তনয়ং দধানা মা কর্ম দেবহেলনং তুরাসঃ ॥৮॥

অব বেদিং হোত্রাভির্যজেত রিপঃ কাশ্চিদ্বরুণধ্রুতঃ সঃ ।
পরি দ্বেষোভিরর্যমা বৃণক্তূরুং সুদাসে বৃষণা উ লোকম্ ॥৯॥

সস্বশ্চিদ্ধি সমৃতিস্ত্বেষ্যেষামপীচ্যেন সহসা সহন্তে ।
যুষ্মদ্ভিয়া বৃষণো রেজমানা দক্ষস্য চিন্মহিনা মৃলতা নঃ ॥১০॥

যো ব্রহ্মণে সুমতিমায়জাতে বাজস্য সাতৌ পরমস্য রায়ঃ ।
সীক্ষন্ত মন্যুং মঘবানো অর্য উরু ক্ষয়ায় চক্রিরে সুধাতু ॥১১॥

ইয়ং দেব পুরোহিতির্যুবভ্যাং যজ্ঞেষু মিত্রাবরুণাবকারি ।
বিশ্বানি দুর্গা পিপৃতং তিরো নো যূয়ং পাত স্বস্তিভিঃ সদা নঃ ॥১২॥