Sukta 60

60.1

12 maitravarunirvasishthah, 1 suryah, 2-12 mitravarunau, trishtup

यद॒द्य सू॑र्य॒ ब्रवोऽना॑गा उ॒द्यन्मि॒त्राय॒ वरु॑णाय स॒त्यम् ।
व॒यं दे॑व॒त्रादि॑ते स्याम॒ तव॑ प्रि॒यासो॑ अर्यमन्गृ॒णन्त॑ः ॥१॥

Yadadya surya bravonaga udyanmitraya varunaya satyam
Vayam devatradite syama tava priyaso aryamangrinantah

ए॒ष स्य मि॑त्रावरुणा नृ॒चक्षा॑ उ॒भे उदे॑ति॒ सूर्यो॑ अ॒भि ज्मन् ।
विश्व॑स्य स्था॒तुर्जग॑तश्च गो॒पा ऋ॒जु मर्ते॑षु वृजि॒ना च॒ पश्य॑न् ॥२॥

Esha sya mitravaruna nrichaksha ubhe udeti suryo abhi jman
Vishvasya sthaturjagatashcha gopa riju marteshu vrijina cha pashyan

अयु॑क्त स॒प्त ह॒रित॑ः स॒धस्था॒द्या ईं॒ वह॑न्ति॒ सूर्यं॑ घृ॒ताची॑ः ।
धामा॑नि मित्रावरुणा यु॒वाकु॒ः सं यो यू॒थेव॒ जनि॑मानि॒ चष्टे॑ ॥३॥

Ayukta sapta haritah sadhasthadya im vahanti suryam ghritachih
Dhamani mitravaruna yuvakuh sam yo yutheva janimani chashte

उद्वां॑ पृ॒क्षासो॒ मधु॑मन्तो अस्थु॒रा सूर्यो॑ अरुहच्छु॒क्रमर्ण॑ः ।
यस्मा॑ आदि॒त्या अध्व॑नो॒ रद॑न्ति मि॒त्रो अ॑र्य॒मा वरु॑णः स॒जोषा॑ः ॥४॥

Udvam prikshaso madhumanto asthura suryo aruhachchhukramarnah
Yasma aditya adhvano radanti mitro aryama varunah sajoshah

इ॒मे चे॒तारो॒ अनृ॑तस्य॒ भूरे॑र्मि॒त्रो अ॑र्य॒मा वरु॑णो॒ हि सन्ति॑ ।
इ॒म ऋ॒तस्य॑ वावृधुर्दुरो॒णे श॒ग्मास॑ः पु॒त्रा अदि॑ते॒रद॑ब्धाः ॥५॥

Ime chetaro anritasya bhurermitro aryama varuno hi santi
Ima ritasya vavridhurdurone shagmasah putra aditeradabdhah

इ॒मे मि॒त्रो वरु॑णो दू॒ळभा॑सोऽचे॒तसं॑ चिच्चितयन्ति॒ दक्षै॑ः ।
अपि॒ क्रतुं॑ सु॒चेत॑सं॒ वत॑न्तस्ति॒रश्चि॒दंह॑ः सु॒पथा॑ नयन्ति ॥६॥

Ime mitro varuno dulabhasochetasam chichchitayanti dakshaih
Api kratum suchetasam vatantastirashchidanhah supatha nayanti

इ॒मे दि॒वो अनि॑मिषा पृथि॒व्याश्चि॑कि॒त्वांसो॑ अचे॒तसं॑ नयन्ति ।
प्र॒व्रा॒जे चि॑न्न॒द्यो॑ गा॒धम॑स्ति पा॒रं नो॑ अ॒स्य वि॑ष्पि॒तस्य॑ पर्षन् ॥७॥

Ime divo animisha prithivyashchikitvanso achetasam nayanti
Pravraje chinnadyo gadhamasti param no asya vishpitasya parshan

यद्गो॒पाव॒ददि॑ति॒ः शर्म॑ भ॒द्रं मि॒त्रो यच्छ॑न्ति॒ वरु॑णः सु॒दासे॑ ।
तस्मि॒न्ना तो॒कं तन॑यं॒ दधा॑ना॒ मा क॑र्म देव॒हेळ॑नं तुरासः ॥८॥

Yadgopavadaditih sharma bhadram mitro yachchhanti varunah sudase
Tasminna tokam tanayam dadhana ma karma devahelanam turasah

अव॒ वेदिं॒ होत्रा॑भिर्यजेत॒ रिप॒ः काश्चि॑द्वरुण॒ध्रुत॒ः सः ।
परि॒ द्वेषो॑भिरर्य॒मा वृ॑णक्तू॒रुं सु॒दासे॑ वृषणा उ लो॒कम् ॥९॥

Ava vedim hotrabhiryajeta ripah kashchidvarunadhrutah sah
Pari dveshobhiraryama vrinakturum sudase vrishana u lokam

स॒स्वश्चि॒द्धि समृ॑तिस्त्वे॒ष्ये॑षामपी॒च्ये॑न॒ सह॑सा॒ सह॑न्ते ।
यु॒ष्मद्भि॒या वृ॑षणो॒ रेज॑माना॒ दक्ष॑स्य चिन्महि॒ना मृ॒ळता॑ नः ॥१०॥

Sasvashchiddhi samritistveshyeshamapichyena sahasa sahante
Yushmadbhiya vrishano rejamana dakshasya chinmahina mrilata nah

यो ब्रह्म॑णे सुम॒तिमा॒यजा॑ते॒ वाज॑स्य सा॒तौ प॑र॒मस्य॑ रा॒यः ।
सीक्ष॑न्त म॒न्युं म॒घवा॑नो अ॒र्य उ॒रु क्षया॑य चक्रिरे सु॒धातु॑ ॥११॥

Yo brahmane sumatimayajate vajasya satau paramasya rayah
Sikshanta manyum maghavano arya uru kshayaya chakrire sudhatu

इ॒यं दे॑व पु॒रोहि॑तिर्यु॒वभ्यां॑ य॒ज्ञेषु॑ मित्रावरुणावकारि ।
विश्वा॑नि दु॒र्गा पि॑पृतं ति॒रो नो॑ यू॒यं पा॑त स्व॒स्तिभि॒ः सदा॑ नः ॥१२॥

Iyam deva purohitiryuvabhyam yagyeshu mitravarunavakari
Vishvani durga pipritam tiro no yuyam pata svastibhih sada nah