Sukta 61

61.1

7 maitravarunirvasishthah, mitravarunau, trishtup

उद्वां॒ चक्षु॑र्वरुण सु॒प्रती॑कं दे॒वयो॑रेति॒ सूर्य॑स्तत॒न्वान् ।
अ॒भि यो विश्वा॒ भुव॑नानि॒ चष्टे॒ स म॒न्युं मर्त्ये॒ष्वा चि॑केत ॥१॥

Udvam chakshurvaruna supratikam devayoreti suryastatanvan
Abhi yo vishva bhuvanani chashte sa manyum martyeshva chiketa

61.2

प्र वां॒ स मि॑त्रावरुणावृ॒तावा॒ विप्रो॒ मन्मा॑नि दीर्घ॒श्रुदि॑यर्ति ।
यस्य॒ ब्रह्मा॑णि सुक्रतू॒ अवा॑थ॒ आ यत्क्रत्वा॒ न श॒रद॑ः पृ॒णैथे॑ ॥२॥

Pra vam sa mitravarunavritava vipro manmani dirghashrudiyarti
Yasya brahmani sukratu avatha a yatkratva na sharadah prinaithe

61.3

प्रोरोर्मि॑त्रावरुणा पृथि॒व्याः प्र दि॒व ऋ॒ष्वाद्बृ॑ह॒तः सु॑दानू ।
स्पशो॑ दधाथे॒ ओष॑धीषु वि॒क्ष्वृध॑ग्य॒तो अनि॑मिषं॒ रक्ष॑माणा ॥३॥

Prorormitravaruna prithivyah pra diva rishvadbrihatah sudanu
Spasho dadhathe oshadhishu vikshvridhagyato animisham rakshamana

61.4

शंसा॑ मि॒त्रस्य॒ वरु॑णस्य॒ धाम॒ शुष्मो॒ रोद॑सी बद्बधे महि॒त्वा ।
अय॒न्मासा॒ अय॑ज्वनाम॒वीरा॒ः प्र य॒ज्ञम॑न्मा वृ॒जनं॑ तिराते ॥४॥

Shansa mitrasya varunasya dhama shushmo rodasi badbadhe mahitva
Ayanmasa ayajvanamavirah pra yagyamanma vrijanam tirate

61.5

अमू॑रा॒ विश्वा॑ वृषणावि॒मा वां॒ न यासु॑ चि॒त्रं ददृ॑शे॒ न य॒क्षम् ।
द्रुह॑ः सचन्ते॒ अनृ॑ता॒ जना॑नां॒ न वां॑ नि॒ण्यान्य॒चिते॑ अभूवन् ॥५॥

Amura vishva vrishanavima vam na yasu chitram dadrishe na yaksham
Druhah sachante anrita jananam na vam ninyanyachite abhuvan

61.6

समु॑ वां य॒ज्ञं म॑हयं॒ नमो॑भिर्हु॒वे वां॑ मित्रावरुणा स॒बाध॑ः ।
प्र वां॒ मन्मा॑न्यृ॒चसे॒ नवा॑नि कृ॒तानि॒ ब्रह्म॑ जुजुषन्नि॒मानि॑ ॥६॥

Samu vam yagyam mahayam namobhirhuve vam mitravaruna sabadhah
Pra vam manmanyrichase navani kritani brahma jujushannimani

61.7

इ॒यं दे॑व पु॒रोहि॑तिर्यु॒वभ्यां॑ य॒ज्ञेषु॑ मित्रावरुणावकारि ।
विश्वा॑नि दु॒र्गा पि॑पृतं ति॒रो नो॑ यू॒यं पा॑त स्व॒स्तिभि॒ः सदा॑ नः ॥७॥

Iyam deva purohitiryuvabhyam yagyeshu mitravarunavakari
Vishvani durga pipritam tiro no yuyam pata svastibhih sada nah