Sukta 62

62.1

6 maitravarunirvasishthah, 1-3 suryah, 4-6 mitravarunau, trishtup

उत्सूर्यो॑ बृ॒हद॒र्चींष्य॑श्रेत्पु॒रु विश्वा॒ जनि॑म॒ मानु॑षाणाम् ।
स॒मो दि॒वा द॑दृशे॒ रोच॑मान॒ः क्रत्वा॑ कृ॒तः सुकृ॑तः क॒र्तृभि॑र्भूत् ॥१॥

Utsuryo brihadarchinshyashretpuru vishva janima manushanam
Samo diva dadrishe rochamanah kratva kritah sukritah kartribhirbhut

62.2

स सू॑र्य॒ प्रति॑ पु॒रो न॒ उद्गा॑ ए॒भिः स्तोमे॑भिरेत॒शेभि॒रेवै॑ः ।
प्र नो॑ मि॒त्राय॒ वरु॑णाय वो॒चोऽना॑गसो अर्य॒म्णे अ॒ग्नये॑ च ॥२॥

Sa surya prati puro na udga ebhih stomebhiretashebhirevaih
Pra no mitraya varunaya vochonagaso aryamne agnaye cha

62.3

वि न॑ः स॒हस्रं॑ शु॒रुधो॑ रदन्त्वृ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒मं नो॑ अ॒र्कमा न॒ः कामं॑ पूपुरन्तु॒ स्तवा॑नाः ॥३॥

Vi nah sahasram shurudho radantvritavano varuno mitro agnih
Yachchhantu chandra upamam no arkama nah kamam pupurantu stavanah

62.4

द्यावा॑भूमी अदिते॒ त्रासी॑थां नो॒ ये वां॑ ज॒ज्ञुः सु॒जनि॑मान ऋष्वे ।
मा हेळे॑ भूम॒ वरु॑णस्य वा॒योर्मा मि॒त्रस्य॑ प्रि॒यत॑मस्य नृ॒णाम् ॥४॥

Dyavabhumi adite trasitham no ye vam jagyuh sujanimana rishve
Ma hele bhuma varunasya vayorma mitrasya priyatamasya nrinam

62.5

प्र बा॒हवा॑ सिसृतं जी॒वसे॑ न॒ आ नो॒ गव्यू॑तिमुक्षतं घृ॒तेन॑ ।
आ नो॒ जने॑ श्रवयतं युवाना श्रु॒तं मे॑ मित्रावरुणा॒ हवे॒मा ॥५॥

Pra bahava sisritam jivase na a no gavyutimukshatam ghritena
A no jane shravayatam yuvana shrutam me mitravaruna havema

62.6

नू मि॒त्रो वरु॑णो अर्य॒मा न॒स्त्मने॑ तो॒काय॒ वरि॑वो दधन्तु ।
सु॒गा नो॒ विश्वा॑ सु॒पथा॑नि सन्तु यू॒यं पा॑त स्व॒स्तिभि॒ः सदा॑ नः ॥६॥

Nu mitro varuno aryama nastmane tokaya varivo dadhantu
Suga no vishva supathani santu yuyam pata svastibhih sada nah