Sukta 63

63.1

6 maitravarunirvasishthah, 1-4 suryah, 5 surya – mitravarunah, 6 mitravarunau aryama cha, trishtup

उद्वे॑ति सु॒भगो॑ वि॒श्वच॑क्षा॒ः साधा॑रण॒ः सूर्यो॒ मानु॑षाणाम् ।
चक्षु॑र्मि॒त्रस्य॒ वरु॑णस्य दे॒वश्चर्मे॑व॒ यः स॒मवि॑व्य॒क्तमां॑सि ॥१॥

Udveti subhago vishvachakshah sadharanah suryo manushanam
Chakshurmitrasya varunasya devashcharmeva yah samavivyaktamansi

उद्वे॑ति प्रसवी॒ता जना॑नां म॒हान्के॒तुर॑र्ण॒वः सूर्य॑स्य ।
स॒मा॒नं च॒क्रं प॑र्या॒विवृ॑त्स॒न्यदे॑त॒शो वह॑ति धू॒र्षु यु॒क्तः ॥२॥

Udveti prasavita jananam mahanketurarnavah suryasya
Samanam chakram paryavivritsanyadetasho vahati dhurshu yuktah

वि॒भ्राज॑मान उ॒षसा॑मु॒पस्था॑द्रे॒भैरुदे॑त्यनुम॒द्यमा॑नः ।
ए॒ष मे॑ दे॒वः स॑वि॒ता च॑च्छन्द॒ यः स॑मा॒नं न प्र॑मि॒नाति॒ धाम॑ ॥३॥

Vibhrajamana ushasamupasthadrebhairudetyanumadyamanah
Esha me devah savita chachchhanda yah samanam na praminati dhama

दि॒वो रु॒क्म उ॑रु॒चक्षा॒ उदे॑ति दू॒रेअ॑र्थस्त॒रणि॒र्भ्राज॑मानः ।
नू॒नं जना॒ः सूर्ये॑ण॒ प्रसू॑ता॒ अय॒न्नर्था॑नि कृ॒णव॒न्नपां॑सि ॥४॥

Divo rukma uruchaksha udeti durearthastaranirbhrajamanah
Nunam janah suryena prasuta ayannarthani krinavannapansi

यत्रा॑ च॒क्रुर॒मृता॑ गा॒तुम॑स्मै श्ये॒नो न दीय॒न्नन्वे॑ति॒ पाथ॑ः ।
प्रति॑ वां॒ सूर॒ उदि॑ते विधेम॒ नमो॑भिर्मित्रावरुणो॒त ह॒व्यैः ॥५॥

Yatra chakruramrita gatumasmai shyeno na diyannanveti pathah
Prati vam sura udite vidhema namobhirmitravarunota havyaih

नू मि॒त्रो वरु॑णो अर्य॒मा न॒स्त्मने॑ तो॒काय॒ वरि॑वो दधन्तु ।
सु॒गा नो॒ विश्वा॑ सु॒पथा॑नि सन्तु यू॒यं पा॑त स्व॒स्तिभि॒ः सदा॑ नः ॥६॥

Nu mitro varuno aryama nastmane tokaya varivo dadhantu
Suga no vishva supathani santu yuyam pata svastibhih sada nah