Sukta 64

64.1

5 maitravarunirvasishthah, mitravarunau, trishtup

दि॒वि क्षय॑न्ता॒ रज॑सः पृथि॒व्यां प्र वां॑ घृ॒तस्य॑ नि॒र्णिजो॑ ददीरन् ।
ह॒व्यं नो॑ मि॒त्रो अ॑र्य॒मा सुजा॑तो॒ राजा॑ सुक्ष॒त्रो वरु॑णो जुषन्त ॥१॥

Divi kshayanta rajasah prithivyam pra vam ghritasya nirnijo dadiran
Havyam no mitro aryama sujato raja sukshatro varuno jushanta

64.2

आ रा॑जाना मह ऋतस्य गोपा॒ सिन्धु॑पती क्षत्रिया यातम॒र्वाक् ।
इळां॑ नो मित्रावरुणो॒त वृ॒ष्टिमव॑ दि॒व इ॑न्वतं जीरदानू ॥२॥

A rajana maha ritasya gopa sindhupati kshatriya yatamarvak
Ilam no mitravarunota vrishtimava diva invatam jiradanu

64.3

मि॒त्रस्तन्नो॒ वरु॑णो दे॒वो अ॒र्यः प्र साधि॑ष्ठेभिः प॒थिभि॑र्नयन्तु ।
ब्रव॒द्यथा॑ न॒ आद॒रिः सु॒दास॑ इ॒षा म॑देम स॒ह दे॒वगो॑पाः ॥३॥

Mitrastanno varuno devo aryah pra sadhishthebhih pathibhirnayantu
Bravadyatha na adarih sudasa isha madema saha devagopah

64.4

यो वां॒ गर्तं॒ मन॑सा॒ तक्ष॑दे॒तमू॒र्ध्वां धी॒तिं कृ॒णव॑द्धा॒रय॑च्च ।
उ॒क्षेथां॑ मित्रावरुणा घृ॒तेन॒ ता रा॑जाना सुक्षि॒तीस्त॑र्पयेथाम् ॥४॥

Yo vam gartam manasa takshadetamurdhvam dhitim krinavaddharayachcha
Ukshetham mitravaruna ghritena ta rajana sukshitistarpayetham

64.5

ए॒ष स्तोमो॑ वरुण मित्र॒ तुभ्यं॒ सोम॑ः शु॒क्रो न वा॒यवे॑ऽयामि ।
अ॒वि॒ष्टं धियो॑ जिगृ॒तं पुरं॑धीर्यू॒यं पा॑त स्व॒स्तिभि॒ः सदा॑ नः ॥५॥

Esha stomo varuna mitra tubhyam somah shukro na vayaveyami
Avishtam dhiyo jigritam purandhiryuyam pata svastibhih sada nah