Sukta 65

65.1

5 maitravarunirvasishthah, mitravarunau, trishtup

प्रति॑ वां॒ सूर॒ उदि॑ते सू॒क्तैर्मि॒त्रं हु॑वे॒ वरु॑णं पू॒तद॑क्षम् ।
ययो॑रसु॒र्य१मक्षि॑तं॒ ज्येष्ठं॒ विश्व॑स्य॒ याम॑न्ना॒चिता॑ जिग॒त्नु ॥१॥

Prati vam sura udite suktairmitram huve varunam putadaksham
Yayorasurya1makshitam jyeshtham vishvasya yamannachita jigatnu

65.2

ता हि दे॒वाना॒मसु॑रा॒ ताव॒र्या ता न॑ः क्षि॒तीः क॑रतमू॒र्जय॑न्तीः ।
अ॒श्याम॑ मित्रावरुणा व॒यं वां॒ द्यावा॑ च॒ यत्र॑ पी॒पय॒न्नहा॑ च ॥२॥

Ta hi devanamasura tavarya ta nah kshitih karatamurjayantih
Ashyama mitravaruna vayam vam dyava cha yatra pipayannaha cha

65.3

ता भूरि॑पाशा॒वनृ॑तस्य॒ सेतू॑ दुर॒त्येतू॑ रि॒पवे॒ मर्त्या॑य ।
ऋ॒तस्य॑ मित्रावरुणा प॒था वा॑म॒पो न ना॒वा दु॑रि॒ता त॑रेम ॥३॥

Ta bhuripashavanritasya setu duratyetu ripave martyaya
Ritasya mitravaruna patha vamapo na nava durita tarema

65.4

आ नो॑ मित्रावरुणा ह॒व्यजु॑ष्टिं घृ॒तैर्गव्यू॑तिमुक्षत॒मिळा॑भिः ।
प्रति॑ वा॒मत्र॒ वर॒मा जना॑य पृणी॒तमु॒द्नो दि॒व्यस्य॒ चारो॑ः ॥४॥

A no mitravaruna havyajushtim ghritairgavyutimukshatamilabhih
Prati vamatra varama janaya prinitamudno divyasya charoh

65.5

ए॒ष स्तोमो॑ वरुण मित्र॒ तुभ्यं॒ सोम॑ः शु॒क्रो न वा॒यवे॑ऽयामि ।
अ॒वि॒ष्टं धियो॑ जिगृ॒तं पुरं॑धीर्यू॒यं पा॑त स्व॒स्तिभि॒ः सदा॑ नः ॥५॥

Esha stomo varuna mitra tubhyam somah shukro na vayaveyami
Avishtam dhiyo jigritam purandhiryuyam pata svastibhih sada nah