Sukta 59

59.1

12 maitravarunirvasishthah, 1-11 marutah, 12 rudrah ( mrityuvimochini rik ), pragathah = ( vishama brihati, sama satobrihati ), 7-8, 9-11 gayatri, 12 anushtup

यं त्राय॑ध्व इ॒दमि॑दं॒ देवा॑सो॒ यं च॒ नय॑थ। तस्मा॑ अग्ने॒ वरु॑ण॒ मित्रार्य॑म॒न्मरु॑त॒ः शर्म॑ यच्छत ॥१॥

Yam trayadhva idamidam devaso yam cha nayatha, tasma agne varuna mitraryamanmarutah sharma yachchhata

59.2

यु॒ष्माकं॑ देवा॒ अव॒साह॑नि प्रि॒य ई॑जा॒नस्त॑रति॒ द्विष॑ः ।
प्र स क्षयं॑ तिरते॒ वि म॒हीरिषो॒ यो वो॒ वरा॑य॒ दाश॑ति ॥२॥

Yushmakam deva avasahani priya ijanastarati dvishah
Pra sa kshayam tirate vi mahirisho yo vo varaya dashati

59.3

न॒हि व॑श्चर॒मं च॒न वसि॑ष्ठः परि॒मंस॑ते । अ॒स्माक॑म॒द्य म॑रुतः सु॒ते सचा॒ विश्वे॑ पिबत का॒मिन॑ः ॥३॥

Nahi vashcharamam chana vasishthah parimansate, asmakamadya marutah sute sacha vishve pibata kaminah

59.4

न॒हि व॑ ऊ॒तिः पृत॑नासु॒ मर्ध॑ति॒ यस्मा॒ अरा॑ध्वं नरः ।
अ॒भि व॒ आव॑र्त्सुम॒तिर्नवी॑यसी॒ तूयं॑ यात पिपीषवः ॥४॥

Nahi va utih pritanasu mardhati yasma aradhvam narah
Abhi va avartsumatirnaviyasi tuyam yata pipishavah

59.5

ओ षु घृ॑ष्विराधसो या॒तनान्धां॑सि पी॒तये॑ ।
इ॒मा वो॑ ह॒व्या म॑रुतो र॒रे हि कं॒ मो ष्व१न्यत्र॑ गन्तन ॥५॥

O shu ghrishviradhaso yatanandhansi pitaye
Ima vo havya maruto rare hi kam mo shva1nyatra gantana

59.6

आ च॑ नो ब॒र्हिः सद॑तावि॒ता च॑ नः स्पा॒र्हाणि॒ दात॑वे॒ वसु॑ ।
अस्रे॑धन्तो मरुतः सो॒म्ये मधौ॒ स्वाहे॒ह मा॑दयाध्वै ॥६॥

A cha no barhih sadatavita cha nah sparhani datave vasu
Asredhanto marutah somye madhau svaheha madayadhvai

59.7

स॒स्वश्चि॒द्धि त॒न्व१ः शुम्भ॑माना॒ आ हं॒सासो॒ नील॑पृष्ठा अपप्तन् ।
विश्वं॒ शर्धो॑ अ॒भितो॑ मा॒ नि षे॑द॒ नरो॒ न र॒ण्वाः सव॑ने॒ मद॑न्तः ॥७॥

Sasvashchiddhi tanva1h shumbhamana a hansaso nilaprishtha apaptan
Vishvam shardho abhito ma ni sheda naro na ranvah savane madantah

59.8

यो नो॑ मरुतो अ॒भि दु॑र्हृणा॒युस्ति॒रश्चि॒त्तानि॑ वसवो॒ जिघां॑सति ।
द्रु॒हः पाशा॒न्प्रति॒ स मु॑चीष्ट॒ तपि॑ष्ठेन॒ हन्म॑ना हन्तना॒ तम् ॥८॥

Yo no maruto abhi durhrinayustirashchittani vasavo jighansati
Druhah pashanprati sa muchishta tapishthena hanmana hantana tam

59.9

सांत॑पना इ॒दं ह॒विर्मरु॑त॒स्तज्जु॑जुष्टन । यु॒ष्माको॒ती रि॑शादसः ॥९॥

Santapana idam havirmarutastajjujushtana, yushmakoti rishadasah

59.10

गृह॑मेधास॒ आ ग॑त॒ मरु॑तो॒ माप॑ भूतन । यु॒ष्माको॒ती सु॑दानवः ॥१०॥

Grihamedhasa a gata maruto mapa bhutana, yushmakoti sudanavah

59.11

इ॒हेह॑ वः स्वतवस॒ः कव॑य॒ः सूर्य॑त्वचः । य॒ज्ञं म॑रुत॒ आ वृ॑णे ॥११॥

Iheha vah svatavasah kavayah suryatvachah, yagyam maruta a vrine

59.12

त्र्य॑म्बकं यजामहे सु॒गन्धिं॑ पुष्टि॒वर्ध॑नम् । उ॒र्वा॒रु॒कमि॑व॒ बन्ध॑नान्मृ॒त्योर्मु॑क्षीय॒ मामृता॑त् ॥१२॥

Tryambakam yajamahe sugandhim pushtivardhanam, urvarukamiva bandhananmrityormukshiya mamritat