Sukta 58

58.1

6 maitravarunirvasishthah, marutah, trishtup

प्र सा॑क॒मुक्षे॑ अर्चता ग॒णाय॒ यो दैव्य॑स्य॒ धाम्न॒स्तुवि॑ष्मान् ।
उ॒त क्षो॑दन्ति॒ रोद॑सी महि॒त्वा नक्ष॑न्ते॒ नाकं॒ निॠ॑तेरवं॒शात् ॥१॥

Pra sakamukshe archata ganaya yo daivyasya dhamnastuvishman
Uta kshodanti rodasi mahitva nakshante nakam niriteravanshat

58.2

ज॒नूश्चि॑द्वो मरुतस्त्वे॒ष्ये॑ण॒ भीमा॑स॒स्तुवि॑मन्य॒वोऽया॑सः ।
प्र ये महो॑भि॒रोज॑सो॒त सन्ति॒ विश्वो॑ वो॒ याम॑न्भयते स्व॒र्दृक् ॥२॥

Janushchidvo marutastveshyena bhimasastuvimanyavoyasah
Pra ye mahobhirojasota santi vishvo vo yamanbhayate svardrik

58.3

बृ॒हद्वयो॑ म॒घव॑द्भ्यो दधात॒ जुजो॑ष॒न्निन्म॒रुत॑ः सुष्टु॒तिं न॑ः ।
ग॒तो नाध्वा॒ वि ति॑राति ज॒न्तुं प्र ण॑ः स्पा॒र्हाभि॑रू॒तिभि॑स्तिरेत ॥३॥

Brihadvayo maghavadbhyo dadhata jujoshanninmarutah sushtutim nah
Gato nadhva vi tirati jantum pra nah sparhabhirutibhistireta

58.4

यु॒ष्मोतो॒ विप्रो॑ मरुतः शत॒स्वी यु॒ष्मोतो॒ अर्वा॒ सहु॑रिः सह॒स्री ।
यु॒ष्मोत॑ः स॒म्राळु॒त ह॑न्ति वृ॒त्रं प्र तद्वो॑ अस्तु धूतयो दे॒ष्णम् ॥४॥

Yushmoto vipro marutah shatasvi yushmoto arva sahurih sahasri
Yushmotah samraluta hanti vritram pra tadvo astu dhutayo deshnam

58.5

ताँ आ रु॒द्रस्य॑ मी॒ळ्हुषो॑ विवासे कु॒विन्नंस॑न्ते म॒रुत॒ः पुन॑र्नः ।
यत्स॒स्वर्ता॑ जिहीळि॒रे यदा॒विरव॒ तदेन॑ ईमहे तु॒राणा॑म् ॥५॥

Tam a rudrasya milhusho vivase kuvinnansante marutah punarnah
Yatsasvarta jihilire yadavirava tadena imahe turanam

58.6

प्र सा वा॑चि सुष्टु॒तिर्म॒घोना॑मि॒दं सू॒क्तं म॒रुतो॑ जुषन्त ।
आ॒राच्चि॒द्द्वेषो॑ वृषणो युयोत यू॒यं पा॑त स्व॒स्तिभि॒ः सदा॑ नः ॥६॥

Pra sa vachi sushtutirmaghonamidam suktam maruto jushanta
Arachchiddvesho vrishano yuyota yuyam pata svastibhih sada nah