সূক্ত 37

37.1

৮ মৈত্রাবরুণির্বসিষ্ঠঃ। বিশ্বে দেবাঃ । ত্রিষ্টুপ্ ।

আ বো বাহিষ্ঠো বহতু স্তবধ্যৈ রথো বাজা ঋভুক্ষণো অমৃক্তঃ ।
অভি ত্রিপৃষ্ঠৈঃ সবনেষু সোমৈর্মদে সুশিপ্রা মহভিঃ পৃণধ্বম্ ॥১॥

37.2

যূয়ং হ রত্নং মঘবত্সু ধত্থ স্বর্দৃশ ঋভুক্ষণো অমৃক্তম্ ।
সং যজ্ঞেষু স্বধাবন্তঃ পিবধ্বং বি নো রাধাংসি মতিভির্দয়ধ্বম্ ॥২॥

37.3

উবোচিথ হি মঘবন্দেষ্ণং মহো অর্ভস্য বসুনো বিভাগে ।
উভা তে পূর্ণা বসুনা গভস্তী ন সূনৃতা নি যমতে বসব্যা ॥৩॥

37.4

ত্বমিন্দ্র স্বয়শা ঋভুক্ষা বাজো ন সাধুরস্তমেষ্যৃক্বা ।
বয়ং নু তে দাশ্বাংসঃ স্যাম ব্রহ্ম কৃণ্বন্তো হরিবো বসিষ্ঠাঃ ॥৪॥

37.5

সনিতাসি প্রবতো দাশুষে চিদ্যাভির্বিবেষো হর্যশ্ব ধীভিঃ ।
ববন্মা নু তে যুজ্যাভিরূতী কদা ন ইন্দ্র রায় আ দশস্যেঃ ॥৫॥

37.6

বাসয়সীব বেধসস্ত্বং নঃ কদা ন ইন্দ্র বচসো বুবোধঃ ।
অস্তং তাত্যা ধিয়া রয়িং সুবীরং পৃক্ষো নো অর্বা ন্যুহীত বাজী ॥৬॥

37.7

অভি যং দেবী নিৠতিশ্চিদীশে নক্ষন্ত ইন্দ্রং শরদঃ সুপৃক্ষঃ ।
উপ ত্রিবন্ধুর্জরদষ্টিমেত্যস্ববেশং যং কৃণবন্ত মর্তাঃ ॥৭॥

37.8

আ নো রাধাংসি সবিত স্তবধ্যা আ রায়ো যন্তু পর্বতস্য রাতৌ । স
দা নো দিব্যঃ পায়ুঃ সিষক্তু যূয়ং পাত স্বস্তিভিঃ সদা নঃ ॥৮॥