Sukta 37

37.1

8 maitravarunirvasishthah, vishve devah, trishtup

आ वो॒ वाहि॑ष्ठो वहतु स्त॒वध्यै॒ रथो॑ वाजा ऋभुक्षणो॒ अमृ॑क्तः ।
अ॒भि त्रि॑पृ॒ष्ठैः सव॑नेषु॒ सोमै॒र्मदे॑ सुशिप्रा म॒हभि॑ः पृणध्वम् ॥१॥

A vo vahishtho vahatu stavadhyai ratho vaja ribhukshano amriktah
Abhi triprishthaih savaneshu somairmade sushipra mahabhih prinadhvam

यू॒यं ह॒ रत्नं॑ म॒घव॑त्सु धत्थ स्व॒र्दृश॑ ऋभुक्षणो॒ अमृ॑क्तम् ।
सं य॒ज्ञेषु॑ स्वधावन्तः पिबध्वं॒ वि नो॒ राधां॑सि म॒तिभि॑र्दयध्वम् ॥२॥

Yuyam ha ratnam maghavatsu dhattha svardrisha ribhukshano amriktam
Sam yagyeshu svadhavantah pibadhvam vi no radhansi matibhirdayadhvam

उ॒वोचि॑थ॒ हि म॑घवन्दे॒ष्णं म॒हो अर्भ॑स्य॒ वसु॑नो विभा॒गे ।
उ॒भा ते॑ पू॒र्णा वसु॑ना॒ गभ॑स्ती॒ न सू॒नृता॒ नि य॑मते वस॒व्या॑ ॥३॥

Uvochitha hi maghavandeshnam maho arbhasya vasuno vibhage
Ubha te purna vasuna gabhasti na sunrita ni yamate vasavya

त्वमि॑न्द्र॒ स्वय॑शा ऋभु॒क्षा वाजो॒ न सा॒धुरस्त॑मे॒ष्यृक्वा॑ ।
व॒यं नु ते॑ दा॒श्वांस॑ः स्याम॒ ब्रह्म॑ कृ॒ण्वन्तो॑ हरिवो॒ वसि॑ष्ठाः ॥४॥

Tvamindra svayasha ribhuksha vajo na sadhurastameshyrikva
Vayam nu te dashvansah syama brahma krinvanto harivo vasishthah

सनि॑तासि प्र॒वतो॑ दा॒शुषे॑ चि॒द्याभि॒र्विवे॑षो हर्यश्व धी॒भिः ।
व॒व॒न्मा नु ते॒ युज्या॑भिरू॒ती क॒दा न॑ इन्द्र रा॒य आ द॑शस्येः ॥५॥

Sanitasi pravato dashushe chidyabhirvivesho haryashva dhibhih
Vavanma nu te yujyabhiruti kada na indra raya a dashasyeh

वा॒सय॑सीव वे॒धस॒स्त्वं न॑ः क॒दा न॑ इन्द्र॒ वच॑सो बुबोधः ।
अस्तं॑ ता॒त्या धि॒या र॒यिं सु॒वीरं॑ पृ॒क्षो नो॒ अर्वा॒ न्यु॑हीत वा॒जी ॥६॥

Vasayasiva vedhasastvam nah kada na indra vachaso bubodhah
Astam tatya dhiya rayim suviram priksho no arva nyuhita vaji

अ॒भि यं दे॒वी निॠ॑तिश्चि॒दीशे॒ नक्ष॑न्त॒ इन्द्रं॑ श॒रद॑ः सु॒पृक्ष॑ः ।
उप॑ त्रिब॒न्धुर्ज॒रद॑ष्टिमे॒त्यस्व॑वेशं॒ यं कृ॒णव॑न्त॒ मर्ता॑ः ॥७॥

Abhi yam devi niritishchidishe nakshanta indram sharadah suprikshah
Upa tribandhurjaradashtimetyasvavesham yam krinavanta martah

आ नो॒ राधां॑सि सवित स्त॒वध्या॒ आ रायो॑ यन्तु॒ पर्व॑तस्य रा॒तौ । स
दा॑ नो दि॒व्यः पा॒युः सि॑षक्तु यू॒यं पा॑त स्व॒स्तिभि॒ः सदा॑ नः ॥८॥

A no radhansi savita stavadhya a rayo yantu parvatasya ratau, sa
Da no divyah payuh sishaktu yuyam pata svastibhih sada nah