Sukta 36

36.1

9 maitravarunirvasishthah, vishve devah, trishtup

प्र ब्रह्मै॑तु॒ सद॑नादृ॒तस्य॒ वि र॒श्मिभि॑ः ससृजे॒ सूर्यो॒ गाः ।
वि सानु॑ना पृथि॒वी स॑स्र उ॒र्वी पृ॒थु प्रती॑क॒मध्येधे॑ अ॒ग्निः ॥१॥

Pra brahmaitu sadanadritasya vi rashmibhih sasrije suryo gah
Vi sanuna prithivi sasra urvi prithu pratikamadhyedhe agnih

इ॒मां वां॑ मित्रावरुणा सुवृ॒क्तिमिषं॒ न कृ॑ण्वे असुरा॒ नवी॑यः ।
इ॒नो वा॑म॒न्यः प॑द॒वीरद॑ब्धो॒ जनं॑ च मि॒त्रो य॑तति ब्रुवा॒णः ॥२॥

Imam vam mitravaruna suvriktimisham na krinve asura naviyah
Ino vamanyah padaviradabdho janam cha mitro yatati bruvanah

आ वात॑स्य॒ ध्रज॑तो रन्त इ॒त्या अपी॑पयन्त धे॒नवो॒ न सूदा॑ः ।
म॒हो दि॒वः सद॑ने॒ जाय॑मा॒नोऽचि॑क्रदद्वृष॒भः सस्मि॒न्नूध॑न् ॥३॥

A vatasya dhrajato ranta itya apipayanta dhenavo na sudah
Maho divah sadane jayamanochikradadvrishabhah sasminnudhan

गि॒रा य ए॒ता यु॒नज॒द्धरी॑ त॒ इन्द्र॑ प्रि॒या सु॒रथा॑ शूर धा॒यू ।
प्र यो म॒न्युं रिरि॑क्षतो मि॒नात्या सु॒क्रतु॑मर्य॒मणं॑ ववृत्याम् ॥४॥

Gira ya eta yunajaddhari ta indra priya suratha shura dhayu
Pra yo manyum ririkshato minatya sukratumaryamanam vavrityam

यज॑न्ते अस्य स॒ख्यं वय॑श्च नम॒स्विन॒ः स्व ऋ॒तस्य॒ धाम॑न् ।
वि पृक्षो॑ बाबधे॒ नृभि॒ः स्तवा॑न इ॒दं नमो॑ रु॒द्राय॒ प्रेष्ठ॑म् ॥५॥

Yajante asya sakhyam vayashcha namasvinah sva ritasya dhaman
Vi priksho babadhe nribhih stavana idam namo rudraya preshtham

आ यत्सा॒कं य॒शसो॑ वावशा॒नाः सर॑स्वती स॒प्तथी॒ सिन्धु॑माता ।
याः सु॒ष्वय॑न्त सु॒दुघा॑ः सुधा॒रा अ॒भि स्वेन॒ पय॑सा॒ पीप्या॑नाः ॥६॥

A yatsakam yashaso vavashanah sarasvati saptathi sindhumata
Yah sushvayanta sudughah sudhara abhi svena payasa pipyanah

उ॒त त्ये नो॑ म॒रुतो॑ मन्दसा॒ना धियं॑ तो॒कं च॑ वा॒जिनो॑ऽवन्तु ।
मा न॒ः परि॑ ख्य॒दक्ष॑रा॒ चर॒न्त्यवी॑वृध॒न्युज्यं॒ ते र॒यिं न॑ः ॥७॥

Uta tye no maruto mandasana dhiyam tokam cha vajinovantu
Ma nah pari khyadakshara charantyavivridhanyujyam te rayim nah

प्र वो॑ म॒हीम॒रम॑तिं कृणुध्वं॒ प्र पू॒षणं॑ विद॒थ्यं१ न वी॒रम् ।
भगं॑ धि॒यो॑ऽवि॒तारं॑ नो अ॒स्याः सा॒तौ वाजं॑ राति॒षाचं॒ पुरं॑धिम् ॥८॥

Pra vo mahimaramatim krinudhvam pra pushanam vidathyan1 na viram
Bhagam dhiyovitaram no asyah satau vajam ratishacham purandhim

अच्छा॒यं वो॑ मरुत॒ः श्लोक॑ ए॒त्वच्छा॒ विष्णुं॑ निषिक्त॒पामवो॑भिः ।
उ॒त प्र॒जायै॑ गृण॒ते वयो॑ धुर्यू॒यं पा॑त स्व॒स्तिभि॒ः सदा॑ नः ॥९॥

Achchhayam vo marutah shloka etvachchha vishnum nishiktapamavobhih
Uta prajayai grinate vayo dhuryuyam pata svastibhih sada nah