Sukta 35

35.1

15 maitravarunirvasishthah, vishve devah, trishtup

शं न॑ इन्द्रा॒ग्नी भ॑वता॒मवो॑भि॒ः शं न॒ इन्द्रा॒वरु॑णा रा॒तह॑व्या ।
शमिन्द्रा॒सोमा॑ सुवि॒ताय॒ शं योः शं न॒ इन्द्रा॑पू॒षणा॒ वाज॑सातौ ॥१॥

Sham na indragni bhavatamavobhih sham na indravaruna ratahavya
Shamindrasoma suvitaya sham yoh sham na indrapushana vajasatau

शं नो॒ भग॒ः शमु॑ न॒ः शंसो॑ अस्तु॒ शं न॒ः पुरं॑धि॒ः शमु॑ सन्तु॒ राय॑ः ।
शं न॑ः स॒त्यस्य॑ सु॒यम॑स्य॒ शंस॒ः शं नो॑ अर्य॒मा पु॑रुजा॒तो अ॑स्तु ॥२॥

Sham no bhagah shamu nah shanso astu sham nah purandhih shamu santu rayah
Sham nah satyasya suyamasya shansah sham no aryama purujato astu

शं नो॑ धा॒ता शमु॑ ध॒र्ता नो॑ अस्तु॒ शं न॑ उरू॒ची भ॑वतु स्व॒धाभि॑ः ।
शं रोद॑सी बृह॒ती शं नो॒ अद्रि॒ः शं नो॑ दे॒वानां॑ सु॒हवा॑नि सन्तु ॥३॥

Sham no dhata shamu dharta no astu sham na uruchi bhavatu svadhabhih
Sham rodasi brihati sham no adrih sham no devanam suhavani santu

शं नो॑ अ॒ग्निर्ज्योति॑रनीको अस्तु॒ शं नो॑ मि॒त्रावरु॑णाव॒श्विना॒ शम् ।
शं न॑ः सु॒कृतां॑ सुकृ॒तानि॑ सन्तु॒ शं न॑ इषि॒रो अ॒भि वा॑तु॒ वात॑ः ॥४॥

Sham no agnirjyotiraniko astu sham no mitravarunavashvina sham
Sham nah sukritam sukritani santu sham na ishiro abhi vatu vatah

शं नो॒ द्यावा॑पृथि॒वी पू॒र्वहू॑तौ॒ शम॒न्तरि॑क्षं दृ॒शये॑ नो अस्तु ।
शं न॒ ओष॑धीर्व॒निनो॑ भवन्तु॒ शं नो॒ रज॑स॒स्पति॑रस्तु जि॒ष्णुः ॥५॥

Sham no dyavaprithivi purvahutau shamantariksham drishaye no astu
Sham na oshadhirvanino bhavantu sham no rajasaspatirastu jishnuh

शं न॒ इन्द्रो॒ वसु॑भिर्दे॒वो अ॑स्तु॒ शमा॑दि॒त्येभि॒र्वरु॑णः सु॒शंस॑ः ।
शं नो॑ रु॒द्रो रु॒द्रेभि॒र्जला॑ष॒ः शं न॒स्त्वष्टा॒ ग्नाभि॑रि॒ह शृ॑णोतु ॥६॥

Sham na indro vasubhirdevo astu shamadityebhirvarunah sushansah
Sham no rudro rudrebhirjalashah sham nastvashta gnabhiriha shrinotu

शं न॒ सोमो॑ भवतु॒ ब्रह्म॒ शं न॒ः शं नो॒ ग्रावा॑ण॒ः शमु॑ सन्तु य॒ज्ञाः ।
शं न॒ः स्वरू॑णां मि॒तयो॑ भवन्तु॒ शं न॑ः प्र॒स्व१ः शम्व॑स्तु॒ वेदि॑ः ॥७॥

Sham na somo bhavatu brahma sham nah sham no gravanah shamu santu yagyah
Sham nah svarunam mitayo bhavantu sham nah prasva1h shamvastu vedih

शं न॒ः सूर्य॑ उरु॒चक्षा॒ उदे॑तु॒ शं न॒श्चत॑स्रः प्र॒दिशो॑ भवन्तु ।
शं न॒ः पर्व॑ता ध्रु॒वयो॑ भवन्तु॒ शं न॒ः सिन्ध॑व॒ः शमु॑ स॒न्त्वाप॑ः ॥८॥

Sham nah surya uruchaksha udetu sham nashchatasrah pradisho bhavantu
Sham nah parvata dhruvayo bhavantu sham nah sindhavah shamu santvapah

शं नो॒ अदि॑तिर्भवतु व्र॒तेभि॒ः शं नो॑ भवन्तु म॒रुत॑ः स्व॒र्काः ।
शं नो॒ विष्णु॒ः शमु॑ पू॒षा नो॑ अस्तु॒ शं नो॑ भ॒वित्रं॒ शम्व॑स्तु वा॒युः ॥९॥

Sham no aditirbhavatu vratebhih sham no bhavantu marutah svarkah
Sham no vishnuh shamu pusha no astu sham no bhavitram shamvastu vayuh

शं नो॑ दे॒वः स॑वि॒ता त्राय॑माण॒ः शं नो॑ भवन्तू॒षसो॑ विभा॒तीः ।
शं न॑ः प॒र्जन्यो॑ भवतु प्र॒जाभ्य॒ः शं न॒ः क्षेत्र॑स्य॒ पति॑रस्तु श॒म्भुः ॥१०॥

Sham no devah savita trayamanah sham no bhavantushaso vibhatih
Sham nah parjanyo bhavatu prajabhyah sham nah kshetrasya patirastu shambhuh

शं नो॑ दे॒वा वि॒श्वदे॑वा भवन्तु॒ शं सर॑स्वती स॒ह धी॒भिर॑स्तु ।
शम॑भि॒षाच॒ः शमु॑ राति॒षाच॒ः शं नो॑ दि॒व्याः पार्थि॑वा॒ः शं नो॒ अप्या॑ः ॥११॥

Sham no deva vishvadeva bhavantu sham sarasvati saha dhibhirastu
Shamabhishachah shamu ratishachah sham no divyah parthivah sham no apyah

शं न॑ः स॒त्यस्य॒ पत॑यो भवन्तु॒ शं नो॒ अर्व॑न्त॒ः शमु॑ सन्तु॒ गाव॑ः ।
शं न॑ ऋ॒भव॑ः सु॒कृत॑ः सु॒हस्ता॒ः शं नो॑ भवन्तु पि॒तरो॒ हवे॑षु ॥१२॥

Sham nah satyasya patayo bhavantu sham no arvantah shamu santu gavah
Sham na ribhavah sukritah suhastah sham no bhavantu pitaro haveshu

शं नो॑ अ॒ज एक॑पाद्दे॒वो अ॑स्तु॒ शं नोऽहि॑र्बु॒ध्न्य१ः शं स॑मु॒द्रः ।
शं नो॑ अ॒पां नपा॑त्पे॒रुर॑स्तु॒ शं न॒ः पृश्नि॑र्भवतु दे॒वगो॑पा ॥१३॥

Sham no aja ekapaddevo astu sham nohirbudhnya1h sham samudrah
Sham no apam napatperurastu sham nah prishnirbhavatu devagopa

आ॒दि॒त्या रु॒द्रा वस॑वो जुषन्ते॒दं ब्रह्म॑ क्रि॒यमा॑णं॒ नवी॑यः ।
शृ॒ण्वन्तु॑ नो दि॒व्याः पार्थि॑वासो॒ गोजा॑ता उ॒त ये य॒ज्ञिया॑सः ॥१४॥

Aditya rudra vasavo jushantedam brahma kriyamanam naviyah
Shrinvantu no divyah parthivaso gojata uta ye yagyiyasah

ये दे॒वानां॑ य॒ज्ञिया॑ य॒ज्ञिया॑नां॒ मनो॒र्यज॑त्रा अ॒मृता॑ ऋत॒ज्ञाः ।
ते नो॑ रासन्तामुरुगा॒यम॒द्य यू॒यं पा॑त स्व॒स्तिभि॒ः सदा॑ नः ॥१५॥

Ye devanam yagyiya yagyiyanam manoryajatra amrita ritagyah
Te no rasantamurugayamadya yuyam pata svastibhih sada nah