Sukta 34

34.1

25 maitravarunirvasishthah, vishve devah, 16 ahih, 17 ahirbudhnyah, dvipada virat, 22-25 trishtup

प्र शु॒क्रैतु॑ दे॒वी म॑नी॒षा अ॒स्मत्सुत॑ष्टो॒ रथो॒ न वा॒जी ॥१॥

Pra shukraitu devi manisha asmatsutashto ratho na vaji

34.2

वि॒दुः पृ॑थि॒व्या दि॒वो ज॒नित्रं॑ शृ॒ण्वन्त्यापो॒ अध॒ क्षर॑न्तीः ॥२॥

Viduh prithivya divo janitram shrinvantyapo adha ksharantih

34.3

आप॑श्चिदस्मै॒ पिन्व॑न्त पृ॒थ्वीर्वृ॒त्रेषु॒ शूरा॒ मंस॑न्त उ॒ग्राः ॥३॥

Apashchidasmai pinvanta prithvirvritreshu shura mansanta ugrah

34.4

आ धू॒र्ष्व॑स्मै॒ दधा॒ताश्वा॒निन्द्रो॒ न व॒ज्री हिर॑ण्यबाहुः ॥४॥

A dhurshvasmai dadhatashvanindro na vajri hiranyabahuh

34.5

अ॒भि प्र स्था॒ताहे॑व य॒ज्ञं याते॑व॒ पत्म॒न्त्मना॑ हिनोत ॥५॥

Abhi pra sthataheva yagyam yateva patmantmana hinota

34.6

त्मना॑ स॒मत्सु॑ हि॒नोत॑ य॒ज्ञं दधा॑त के॒तुं जना॑य वी॒रम् ॥६॥

Tmana samatsu hinota yagyam dadhata ketum janaya viram

34.7

उद॑स्य॒ शुष्मा॑द्भा॒नुर्नार्त॒ बिभ॑र्ति भा॒रं पृ॑थि॒वी न भूम॑ ॥७॥

Udasya shushmadbhanurnarta bibharti bharam prithivi na bhuma

34.8

ह्वया॑मि दे॒वाँ अया॑तुरग्ने॒ साध॑न्नृ॒तेन॒ धियं॑ दधामि ॥८॥

Hvayami devam ayaturagne sadhannritena dhiyam dadhami

34.9

अ॒भि वो॑ दे॒वीं धियं॑ दधिध्वं॒ प्र वो॑ देव॒त्रा वाचं॑ कृणुध्वम् ॥९॥

Abhi vo devim dhiyam dadhidhvam pra vo devatra vacham krinudhvam

34.10

आ च॑ष्ट आसां॒ पाथो॑ न॒दीनां॒ वरु॑ण उ॒ग्रः स॒हस्र॑चक्षाः ॥१०॥

A chashta asam patho nadinam varuna ugrah sahasrachakshah

34.11

राजा॑ रा॒ष्ट्रानां॒ पेशो॑ न॒दीना॒मनु॑त्तमस्मै क्ष॒त्रं वि॒श्वायु॑ ॥११॥

Raja rashtranam pesho nadinamanuttamasmai kshatram vishvayu

34.12

अवि॑ष्टो अ॒स्मान्विश्वा॑सु वि॒क्ष्वद्युं॑ कृणोत॒ शंसं॑ निनि॒त्सोः ॥१२॥

Avishto asmanvishvasu vikshvadyum krinota shansam ninitsoh

34.13

व्ये॑तु दि॒द्युद्द्वि॒षामशे॑वा यु॒योत॒ विष्व॒ग्रप॑स्त॒नूना॑म् ॥१३॥

Vyetu didyuddvishamasheva yuyota vishvagrapastanunam

34.14

अवी॑न्नो अ॒ग्निर्ह॒व्यान्नमो॑भि॒ः प्रेष्ठो॑ अस्मा अधायि॒ स्तोम॑ः ॥१४॥

Avinno agnirhavyannamobhih preshtho asma adhayi stomah

34.15

स॒जूर्दे॒वेभि॑र॒पां नपा॑तं॒ सखा॑यं कृध्वं शि॒वो नो॑ अस्तु ॥१५॥

Sajurdevebhirapam napatam sakhayam kridhvam shivo no astu

34.16

अ॒ब्जामु॒क्थैरहिं॑ गृणीषे बु॒ध्ने न॒दीनां॒ रज॑ः सु॒ षीद॑न् ॥१६॥

Abjamukthairahim grinishe budhne nadinam rajah su shidan

34.17

मा नोऽहि॑र्बु॒ध्न्यो॑ रि॒षे धा॒न्मा य॒ज्ञो अ॑स्य स्रिधदृता॒योः ॥१७॥

Ma nohirbudhnyo rishe dhanma yagyo asya sridhadritayoh

34.18

उ॒त न॑ ए॒षु नृषु॒ श्रवो॑ धु॒ः प्र रा॒ये य॑न्तु॒ शर्ध॑न्तो अ॒र्यः ॥१८॥

Uta na eshu nrishu shravo dhuh pra raye yantu shardhanto aryah

34.19

तप॑न्ति॒ शत्रुं॒ स्व१र्ण भूमा॑ म॒हासे॑नासो॒ अमे॑भिरेषाम् ॥१९॥

Tapanti shatrum sva1rna bhuma mahasenaso amebhiresham

34.20

आ यन्न॒ः पत्नी॒र्गम॒न्त्यच्छा॒ त्वष्टा॑ सुपा॒णिर्दधा॑तु वी॒रान् ॥२०॥

A yannah patnirgamantyachchha tvashta supanirdadhatu viran

34.21

प्रति॑ न॒ः स्तोमं॒ त्वष्टा॑ जुषेत॒ स्याद॒स्मे अ॒रम॑तिर्वसू॒युः ॥२१॥

Prati nah stomam tvashta jusheta syadasme aramatirvasuyuh

34.22

ता नो॑ रासन्राति॒षाचो॒ वसू॒न्या रोद॑सी वरुणा॒नी शृ॑णोतु ।
वरू॑त्रीभिः सुशर॒णो नो॑ अस्तु॒ त्वष्टा॑ सु॒दत्रो॒ वि द॑धातु॒ राय॑ः ॥२२॥

Ta no rasanratishacho vasunya rodasi varunani shrinotu
Varutribhih susharano no astu tvashta sudatro vi dadhatu rayah

34.23

तन्नो॒ राय॒ः पर्व॑ता॒स्तन्न॒ आप॒स्तद्रा॑ति॒षाच॒ ओष॑धीरु॒त द्यौः ।
वन॒स्पति॑भिः पृथि॒वी स॒जोषा॑ उ॒भे रोद॑सी॒ परि॑ पासतो नः ॥२३॥

Tanno rayah parvatastanna apastadratishacha oshadhiruta dyauh
Vanaspatibhih prithivi sajosha ubhe rodasi pari pasato nah

34.24

अनु॒ तदु॒र्वी रोद॑सी जिहाता॒मनु॑ द्यु॒क्षो वरु॑ण॒ इन्द्र॑सखा । अ
नु॒ विश्वे॑ म॒रुतो॒ ये स॒हासो॑ रा॒यः स्या॑म ध॒रुणं॑ धि॒यध्यै॑ ॥२४॥

Anu tadurvi rodasi jihatamanu dyuksho varuna indrasakha, a
Nu vishve maruto ye sahaso rayah syama dharunam dhiyadhyai

34.25

तन्न॒ इन्द्रो॒ वरु॑णो मि॒त्रो अ॒ग्निराप॒ ओष॑धीर्व॒निनो॑ जुषन्त ।
शर्म॑न्त्स्याम म॒रुता॑मु॒पस्थे॑ यू॒यं पा॑त स्व॒स्तिभि॒ः सदा॑ नः ॥२५॥

Tanna indro varuno mitro agnirapa oshadhirvanino jushanta
Sharmantsyama marutamupasthe yuyam pata svastibhih sada nah