Sukta 38

38.1

8 maitravarunirvasishthah, 1-6 savita, 6 uttarardhasya bhago va, 7-8 vajinah, trishtup

उदु॒ ष्य दे॒वः स॑वि॒ता य॑याम हिर॒ण्ययी॑म॒मतिं॒ यामशि॑श्रेत् ।
नू॒नं भगो॒ हव्यो॒ मानु॑षेभि॒र्वि यो रत्ना॑ पुरू॒वसु॒र्दधा॑ति ॥१॥

Udu shya devah savita yayama hiranyayimamatim yamashishret
Nunam bhago havyo manushebhirvi yo ratna puruvasurdadhati

उदु॑ तिष्ठ सवितः श्रु॒ध्य१स्य हिर॑ण्यपाणे॒ प्रभृ॑तावृ॒तस्य॑ ।
व्यु१र्वीं पृ॒थ्वीम॒मतिं॑ सृजा॒न आ नृभ्यो॑ मर्त॒भोज॑नं सुवा॒नः ॥२॥

Udu tishtha savitah shrudhya1sya hiranyapane prabhritavritasya
Vyu1rvim prithvimamatim srijana a nribhyo martabhojanam suvanah

अपि॑ ष्टु॒तः स॑वि॒ता दे॒वो अ॑स्तु॒ यमा चि॒द्विश्वे॒ वस॑वो गृ॒णन्ति॑ ।
स न॒ः स्तोमा॑न्नम॒स्य१श्चनो॑ धा॒द्विश्वे॑भिः पातु पा॒युभि॒र्नि सू॒रीन् ॥३॥

Api shtutah savita devo astu yama chidvishve vasavo grinanti
Sa nah stomannamasya1shchano dhadvishvebhih patu payubhirni surin

अ॒भि यं दे॒व्यदि॑तिर्गृ॒णाति॑ स॒वं दे॒वस्य॑ सवि॒तुर्जु॑षा॒णा ।
अ॒भि स॒म्राजो॒ वरु॑णो गृणन्त्य॒भि मि॒त्रासो॑ अर्य॒मा स॒जोषा॑ः ॥४॥

Abhi yam devyaditirgrinati savam devasya saviturjushana
Abhi samrajo varuno grinantyabhi mitraso aryama sajoshah

अ॒भि ये मि॒थो व॒नुष॒ः सप॑न्ते रा॒तिं दि॒वो रा॑ति॒षाच॑ः पृथि॒व्याः ।
अहि॑र्बु॒ध्न्य॑ उ॒त न॑ः शृणोतु॒ वरू॒त्र्येक॑धेनुभि॒र्नि पा॑तु ॥५॥

Abhi ye mitho vanushah sapante ratim divo ratishachah prithivyah
Ahirbudhnya uta nah shrinotu varutryekadhenubhirni patu

अनु॒ तन्नो॒ जास्पति॑र्मंसीष्ट॒ रत्नं॑ दे॒वस्य॑ सवि॒तुरि॑या॒नः ।
भग॑मु॒ग्रोऽव॑से॒ जोह॑वीति॒ भग॒मनु॑ग्रो॒ अध॑ याति॒ रत्न॑म् ॥६॥

Anu tanno jaspatirmansishta ratnam devasya savituriyanah
Bhagamugrovase johaviti bhagamanugro adha yati ratnam

शं नो॑ भवन्तु वा॒जिनो॒ हवे॑षु दे॒वता॑ता मि॒तद्र॑वः स्व॒र्काः ।
ज॒म्भय॒न्तोऽहिं॒ वृकं॒ रक्षां॑सि॒ सने॑म्य॒स्मद्यु॑यव॒न्नमी॑वाः ॥७॥

Sham no bhavantu vajino haveshu devatata mitadravah svarkah
Jambhayantohim vrikam rakshansi sanemyasmadyuyavannamivah

वाजे॑वाजेऽवत वाजिनो नो॒ धने॑षु विप्रा अमृता ऋतज्ञाः ।
अ॒स्य मध्व॑ः पिबत मा॒दय॑ध्वं तृ॒प्ता या॑त प॒थिभि॑र्देव॒यानै॑ः ॥८॥

Vajevajevata vajino no dhaneshu vipra amrita ritagyah
Asya madhvah pibata madayadhvam tripta yata pathibhirdevayanaih