Sukta 39

39.1

7 maitravarunirvasishthah, vishve devah, trishtup

ऊ॒र्ध्वो अ॒ग्निः सु॑म॒तिं वस्वो॑ अश्रेत्प्रती॒ची जू॒र्णिर्दे॒वता॑तिमेति ।
भे॒जाते॒ अद्री॑ र॒थ्ये॑व॒ पन्था॑मृ॒तं होता॑ न इषि॒तो य॑जाति ॥१॥

Urdhvo agnih sumatim vasvo ashretpratichi jurnirdevatatimeti
Bhejate adri rathyeva panthamritam hota na ishito yajati

प्र वा॑वृजे सुप्र॒या ब॒र्हिरे॑षा॒मा वि॒श्पती॑व॒ बीरि॑ट इयाते ।
वि॒शाम॒क्तोरु॒षस॑ः पू॒र्वहू॑तौ वा॒युः पू॒षा स्व॒स्तये॑ नि॒युत्वा॑न् ॥२॥

Pra vavrije supraya barhireshama vishpativa birita iyate
Vishamaktorushasah purvahutau vayuh pusha svastaye niyutvan

ज्म॒या अत्र॒ वस॑वो रन्त दे॒वा उ॒राव॒न्तरि॑क्षे मर्जयन्त शु॒भ्राः ।
अ॒र्वाक्प॒थ उ॑रुज्रयः कृणुध्वं॒ श्रोता॑ दू॒तस्य॑ ज॒ग्मुषो॑ नो अ॒स्य ॥३॥

Jmaya atra vasavo ranta deva uravantarikshe marjayanta shubhrah
Arvakpatha urujrayah krinudhvam shrota dutasya jagmusho no asya

ते हि य॒ज्ञेषु॑ य॒ज्ञिया॑स॒ ऊमा॑ः स॒धस्थं॒ विश्वे॑ अ॒भि सन्ति॑ दे॒वाः ।
ताँ अ॑ध्व॒र उ॑श॒तो य॑क्ष्यग्ने श्रु॒ष्टी भगं॒ नास॑त्या॒ पुरं॑धिम् ॥४॥

Te hi yagyeshu yagyiyasa umah sadhastham vishve abhi santi devah
Tam adhvara ushato yakshyagne shrushti bhagam nasatya purandhim

आग्ने॒ गिरो॑ दि॒व आ पृ॑थि॒व्या मि॒त्रं व॑ह॒ वरु॑ण॒मिन्द्र॑म॒ग्निम् ।
आर्य॒मण॒मदि॑तिं॒ विष्णु॑मेषां॒ सर॑स्वती म॒रुतो॑ मादयन्ताम् ॥५॥

Agne giro diva a prithivya mitram vaha varunamindramagnim
Aryamanamaditim vishnumesham sarasvati maruto madayantam

र॒रे ह॒व्यं म॒तिभि॑र्य॒ज्ञिया॑नां॒ नक्ष॒त्कामं॒ मर्त्या॑ना॒मसि॑न्वन् ।
धाता॑ र॒यिम॑विद॒स्यं स॑दा॒सां स॑क्षी॒महि॒ युज्ये॑भि॒र्नु दे॒वैः ॥६॥

Rare havyam matibhiryagyiyanam nakshatkamam martyanamasinvan
Dhata rayimavidasyam sadasam sakshimahi yujyebhirnu devaih

नू रोद॑सी अ॒भिष्टु॑ते॒ वसि॑ष्ठैॠ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒मं नो॑ अ॒र्कं यू॒यं पा॑त स्व॒स्तिभि॒ः सदा॑ नः ॥७॥

Nu rodasi abhishtute vasishthairitavano varuno mitro agnih
Yachchhantu chandra upamam no arkam yuyam pata svastibhih sada nah