Sukta 40

40.1

7 maitravarunirvasishthah, vishve devah, trishtup

ओ श्रु॒ष्टिर्वि॑द॒थ्या॒३ समे॑तु॒ प्रति॒ स्तोमं॑ दधीमहि तु॒राणा॑म् ।
यद॒द्य दे॒वः स॑वि॒ता सु॒वाति॒ स्यामा॑स्य र॒त्निनो॑ विभा॒गे ॥१॥

O shrushtirvidathya3 sametu prati stomam dadhimahi turanam
Yadadya devah savita suvati syamasya ratnino vibhage

मि॒त्रस्तन्नो॒ वरु॑णो॒ रोद॑सी च॒ द्युभ॑क्त॒मिन्द्रो॑ अर्य॒मा द॑दातु ।
दिदे॑ष्टु दे॒व्यदि॑ती॒ रेक्णो॑ वा॒युश्च॒ यन्नि॑यु॒वैते॒ भग॑श्च ॥२॥

Mitrastanno varuno rodasi cha dyubhaktamindro aryama dadatu
Dideshtu devyaditi rekno vayushcha yanniyuvaite bhagashcha

सेदु॒ग्रो अ॑स्तु मरुत॒ः स शु॒ष्मी यं मर्त्यं॑ पृषदश्वा॒ अवा॑थ ।
उ॒तेम॒ग्निः सर॑स्वती जु॒नन्ति॒ न तस्य॑ रा॒यः प॑र्ये॒तास्ति॑ ॥३॥

Sedugro astu marutah sa shushmi yam martyam prishadashva avatha
Utemagnih sarasvati junanti na tasya rayah paryetasti

अ॒यं हि ने॒ता वरु॑ण ऋ॒तस्य॑ मि॒त्रो राजा॑नो अर्य॒मापो॒ धुः ।
सु॒हवा॑ दे॒व्यदि॑तिरन॒र्वा ते नो॒ अंहो॒ अति॑ पर्ष॒न्नरि॑ष्टान् ॥४॥

Ayam hi neta varuna ritasya mitro rajano aryamapo dhuh
Suhava devyaditiranarva te no anho ati parshannarishtan

अ॒स्य दे॒वस्य॑ मी॒ळ्हुषो॑ व॒या विष्णो॑रे॒षस्य॑ प्रभृ॒थे ह॒विर्भि॑ः ।
वि॒दे हि रु॒द्रो रु॒द्रियं॑ महि॒त्वं या॑सि॒ष्टं व॒र्तिर॑श्विना॒विरा॑वत् ॥५॥

Asya devasya milhusho vaya vishnoreshasya prabhrithe havirbhih
Vide hi rudro rudriyam mahitvam yasishtam vartirashvinaviravat

मात्र॑ पूषन्नाघृण इरस्यो॒ वरू॑त्री॒ यद्रा॑ति॒षाच॑श्च॒ रास॑न् ।
म॒यो॒भुवो॑ नो॒ अर्व॑न्तो॒ नि पा॑न्तु वृ॒ष्टिं परि॑ज्मा॒ वातो॑ ददातु ॥६॥

Matra pushannaghrina irasyo varutri yadratishachashcha rasan
Mayobhuvo no arvanto ni pantu vrishtim parijma vato dadatu

नू रोद॑सी अ॒भिष्टु॑ते॒ वसि॑ष्ठैॠ॒तावा॑नो॒ वरु॑णो मि॒त्रो अ॒ग्निः ।
यच्छ॑न्तु च॒न्द्रा उ॑प॒मं नो॑ अ॒र्कं यू॒यं पा॑त स्व॒स्तिभि॒ः सदा॑ नः ॥७॥

Nu rodasi abhishtute vasishthairitavano varuno mitro agnih
Yachchhantu chandra upamam no arkam yuyam pata svastibhih sada nah