Sukta 41

41.1

7 maitravarunirvasishthah, 1 agnindramitravarunashvibhagapushabrahmanaspatisomarudrah, 2-6 bhagah, 7 ushasah, trishtup, 1 jagati

प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।
प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम ॥१॥

Prataragnim pratarindram havamahe pratarmitravaruna pratarashvina
Pratarbhagam pushanam brahmanaspatim pratah somamuta rudram huvema

41.2

प्रा॒त॒र्जितं॒ भग॑मु॒ग्रं हु॑वेम व॒यं पु॒त्रमदि॑ते॒र्यो वि॑ध॒र्ता ।
आ॒ध्रश्चि॒द्यं मन्य॑मानस्तु॒रश्चि॒द्राजा॑ चि॒द्यं भगं॑ भ॒क्षीत्याह॑ ॥२॥

Pratarjitam bhagamugram huvema vayam putramaditeryo vidharta
Adhrashchidyam manyamanasturashchidraja chidyam bhagam bhakshityaha

41.3

भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।
भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वन्त॑ः स्याम ॥३॥

Bhaga pranetarbhaga satyaradho bhagemam dhiyamudava dadannah
Bhaga pra no janaya gobhirashvairbhaga pra nribhirnrivantah syama

41.4

उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म् ।
उ॒तोदि॑ता मघव॒न्त्सूर्य॑स्य व॒यं दे॒वानां॑ सुम॒तौ स्या॑म ॥४॥

Utedanim bhagavantah syamota prapitva uta madhye ahnam
Utodita maghavantsuryasya vayam devanam sumatau syama

41.5

भग॑ ए॒व भग॑वाँ अस्तु देवा॒स्तेन॑ व॒यं भग॑वन्तः स्याम ।
तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह ॥५॥

Bhaga eva bhagavam astu devastena vayam bhagavantah syama
Tam tva bhaga sarva ijjohaviti sa no bhaga puraeta bhaveha

41.6

सम॑ध्व॒रायो॒षसो॑ नमन्त दधि॒क्रावे॑व॒ शुच॑ये प॒दाय॑ ।
अ॒र्वा॒ची॒नं व॑सु॒विदं॒ भगं॑ नो॒ रथ॑मि॒वाश्वा॑ वा॒जिन॒ आ व॑हन्तु ॥६॥

Samadhvarayoshaso namanta dadhikraveva shuchaye padaya
Arvachinam vasuvidam bhagam no rathamivashva vajina a vahantu

41.7

अश्वा॑वती॒र्गोम॑तीर्न उ॒षासो॑ वी॒रव॑ती॒ः सद॑मुच्छन्तु भ॒द्राः ।
घृ॒तं दुहा॑ना वि॒श्वत॒ः प्रपी॑ता यू॒यं पा॑त स्व॒स्तिभि॒ः सदा॑ नः ॥७॥

Ashvavatirgomatirna ushaso viravatih sadamuchchhantu bhadrah
Ghritam duhana vishvatah prapita yuyam pata svastibhih sada nah