সূক্ত 25

25.1

৬ মৈত্রাবরুণির্বসিষ্ঠঃ। ইন্দ্রঃ । ত্রিষ্টুপ্ ।

আ তে মহ ইন্দ্রোত্যুগ্র সমন্যবো যত্সমরন্ত সেনাঃ ।
পতাতি দিদ্যুন্নর্যস্য বাহ্বোর্মা তে মনো বিষ্বদ্র্য১গ্বি চারীৎ ॥১॥

নি দুর্গ ইন্দ্র শ্নথিহ্যমিত্রানভি যে নো মর্তাসো অমন্তি ।
আরে তং শংসং কৃণুহি নিনিত্সোরা নো ভর সংভরণং বসূনাম্ ॥২॥

শতং তে শিপ্রিন্নূতয়ঃ সুদাসে সহস্রং শংসা উত রাতিরস্তু ।
জহি বধর্বনুষো মর্ত্যস্যাঽস্মে দ্যুম্নমধি রত্নং চ ধেহি ॥৩॥

ত্বাবতো হীন্দ্র ক্রত্বে অস্মি ত্বাবতোঽবিতুঃ শূর রাতৌ ।
বিশ্বেদহানি তবিষীব উগ্রঁ ওকঃ কৃণুষ্ব হরিবো ন মর্ধীঃ ॥৪॥

কুত্সা এতে হর্যশ্বায় শূষমিন্দ্রে সহো দেবজূতমিয়ানাঃ ।
সত্রা কৃধি সুহনা শূর বৃত্রা বয়ং তরুত্রাঃ সনুয়াম বাজম্ ॥৫॥

এবা ন ইন্দ্র বার্যস্য পূর্ধি প্র তে মহীং সুমতিং বেবিদাম ।
ইষং পিন্ব মঘবদ্ভ্যঃ সুবীরাং যূয়ং পাত স্বস্তিভিঃ সদা নঃ ॥৬॥