Sukta 25

25.1

6 maitravarunirvasishthah, indrah, trishtup

आ ते॑ म॒ह इ॑न्द्रो॒त्यु॑ग्र॒ सम॑न्यवो॒ यत्स॒मर॑न्त॒ सेना॑ः ।
पता॑ति दि॒द्युन्नर्य॑स्य बा॒ह्वोर्मा ते॒ मनो॑ विष्व॒द्र्य१ग्वि चा॑रीत् ॥१॥

A te maha indrotyugra samanyavo yatsamaranta senah
Patati didyunnaryasya bahvorma te mano vishvadrya1gvi charit

नि दु॒र्ग इ॑न्द्र श्नथिह्य॒मित्रा॑न॒भि ये नो॒ मर्ता॑सो अ॒मन्ति॑ ।
आ॒रे तं शंसं॑ कृणुहि निनि॒त्सोरा नो॑ भर सं॒भर॑णं॒ वसू॑नाम् ॥२॥

Ni durga indra shnathihyamitranabhi ye no martaso amanti
Are tam shansam krinuhi ninitsora no bhara sambharanam vasunam

श॒तं ते॑ शिप्रिन्नू॒तय॑ः सु॒दासे॑ स॒हस्रं॒ शंसा॑ उ॒त रा॒तिर॑स्तु ।
ज॒हि वध॑र्व॒नुषो॒ मर्त्य॑स्या॒ऽस्मे द्यु॒म्नमधि॒ रत्नं॑ च धेहि ॥३॥

Shatam te shiprinnutayah sudase sahasram shansa uta ratirastu
Jahi vadharvanusho martyasyasme dyumnamadhi ratnam cha dhehi

त्वाव॑तो॒ ही॑न्द्र॒ क्रत्वे॒ अस्मि॒ त्वाव॑तोऽवि॒तुः शू॑र रा॒तौ ।
विश्वेदहा॑नि तविषीव उग्रँ॒ ओक॑ः कृणुष्व हरिवो॒ न म॑र्धीः ॥४॥

Tvavato hindra kratve asmi tvavatovituh shura ratau
Vishvedahani tavishiva ugram okah krinushva harivo na mardhih

कुत्सा॑ ए॒ते हर्य॑श्वाय शू॒षमिन्द्रे॒ सहो॑ दे॒वजू॑तमिया॒नाः ।
स॒त्रा कृ॑धि सु॒हना॑ शूर वृ॒त्रा व॒यं तरु॑त्राः सनुयाम॒ वाज॑म् ॥५॥

Kutsa ete haryashvaya shushamindre saho devajutamiyanah
Satra kridhi suhana shura vritra vayam tarutrah sanuyama vajam

ए॒वा न॑ इन्द्र॒ वार्य॑स्य पूर्धि॒ प्र ते॑ म॒हीं सु॑म॒तिं वे॑विदाम ।
इषं॑ पिन्व म॒घव॑द्भ्यः सु॒वीरां॑ यू॒यं पा॑त स्व॒स्तिभि॒ः सदा॑ नः ॥६॥

Eva na indra varyasya purdhi pra te mahim sumatim vevidama
Isham pinva maghavadbhyah suviram yuyam pata svastibhih sada nah