Sukta 26

26.1

5 maitravarunirvasishthah, indrah, trishtup

न सोम॒ इन्द्र॒मसु॑तो ममाद॒ नाब्र॑ह्माणो म॒घवा॑नं सु॒तास॑ः ।
तस्मा॑ उ॒क्थं ज॑नये॒ यज्जुजो॑षन्नृ॒वन्नवी॑यः शृ॒णव॒द्यथा॑ नः ॥१॥

Na soma indramasuto mamada nabrahmano maghavanam sutasah
Tasma uktham janaye yajjujoshannrivannaviyah shrinavadyatha nah

उ॒क्थौ॑क्थे॒ सोम॒ इन्द्रं॑ ममाद नी॒थेनी॑थे म॒घवा॑नं सु॒तास॑ः ।
यदीं॑ स॒बाध॑ः पि॒तरं॒ न पु॒त्राः स॑मा॒नद॑क्षा॒ अव॑से॒ हव॑न्ते ॥२॥

Ukthaukthe soma indram mamada nithenithe maghavanam sutasah
Yadim sabadhah pitaram na putrah samanadaksha avase havante

च॒कार॒ ता कृ॒णव॑न्नू॒नम॒न्या यानि॑ ब्रु॒वन्ति॑ वे॒धस॑ः सु॒तेषु॑ ।
जनी॑रिव॒ पति॒रेक॑ः समा॒नो नि मा॑मृजे॒ पुर॒ इन्द्र॒ः सु सर्वा॑ः ॥३॥

Chakara ta krinavannunamanya yani bruvanti vedhasah suteshu
Janiriva patirekah samano ni mamrije pura indrah su sarvah

ए॒वा तमा॑हुरु॒त शृ॑ण्व॒ इन्द्र॒ एको॑ विभ॒क्ता त॒रणि॑र्म॒घाना॑म् ।
मि॒थ॒स्तुर॑ ऊ॒तयो॒ यस्य॑ पू॒र्वीर॒स्मे भ॒द्राणि॑ सश्चत प्रि॒याणि॑ ॥४॥

Eva tamahuruta shrinva indra eko vibhakta taranirmaghanam
Mithastura utayo yasya purvirasme bhadrani sashchata priyani

ए॒वा वसि॑ष्ठ॒ इन्द्र॑मू॒तये॒ नॄन्कृ॑ष्टी॒नां वृ॑ष॒भं सु॒ते गृ॑णाति ।
स॒ह॒स्रिण॒ उप॑ नो माहि॒ वाजा॑न्यू॒यं पा॑त स्व॒स्तिभि॒ः सदा॑ नः ॥५॥

Eva vasishtha indramutaye nrinkrishtinam vrishabham sute grinati
Sahasrina upa no mahi vajanyuyam pata svastibhih sada nah