Sukta 27

27.1

5 maitravarunirvasishthah, indrah, trishtup

इन्द्रं॒ नरो॑ ने॒मधि॑ता हवन्ते॒ यत्पार्या॑ यु॒नज॑ते॒ धिय॒स्ताः ।
शूरो॒ नृषा॑ता॒ शव॑सश्चका॒न आ गोम॑ति व्र॒जे भ॑जा॒ त्वं न॑ः ॥१॥

Indram naro nemadhita havante yatparya yunajate dhiyastah
Shuro nrishata shavasashchakana a gomati vraje bhaja tvam nah

य इ॑न्द्र॒ शुष्मो॑ मघवन्ते॒ अस्ति॒ शिक्षा॒ सखि॑भ्यः पुरुहूत॒ नृभ्य॑ः ।
त्वं हि दृ॒ळ्हा म॑घव॒न्विचे॑ता॒ अपा॑ वृधि॒ परि॑वृतं॒ न राध॑ः ॥२॥

Ya indra shushmo maghavante asti shiksha sakhibhyah puruhuta nribhyah
Tvam hi drilha maghavanvicheta apa vridhi parivritam na radhah

इन्द्रो॒ राजा॒ जग॑तश्चर्षणी॒नामधि॒ क्षमि॒ विषु॑रूपं॒ यदस्ति॑ ।
ततो॑ ददाति दा॒शुषे॒ वसू॑नि॒ चोद॒द्राध॒ उप॑स्तुतश्चिद॒र्वाक् ॥३॥

Indro raja jagatashcharshaninamadhi kshami vishurupam yadasti
Tato dadati dashushe vasuni chodadradha upastutashchidarvak

नू चि॑न्न॒ इन्द्रो॑ म॒घवा॒ सहू॑ती दा॒नो वाजं॒ नि य॑मते न ऊ॒ती ।
अनू॑ना॒ यस्य॒ दक्षि॑णा पी॒पाय॑ वा॒मं नृभ्यो॑ अ॒भिवी॑ता॒ सखि॑भ्यः ॥४॥

Nu chinna indro maghava sahuti dano vajam ni yamate na uti
Anuna yasya dakshina pipaya vamam nribhyo abhivita sakhibhyah

नू इ॑न्द्र रा॒ये वरि॑वस्कृधी न॒ आ ते॒ मनो॑ ववृत्याम म॒घाय॑ ।
गोम॒दश्वा॑व॒द्रथ॑व॒द्व्यन्तो॑ यू॒यं पा॑त स्व॒स्तिभि॒ः सदा॑ नः ॥५॥

Nu indra raye varivaskridhi na a te mano vavrityama maghaya
Gomadashvavadrathavadvyanto yuyam pata svastibhih sada nah