Sukta 28

28.1

5 maitravarunirvasishthah, indrah, trishtup

ब्रह्मा॑ ण इ॒न्द्रोप॑ याहि वि॒द्वान॒र्वाञ्च॑स्ते॒ हर॑यः सन्तु यु॒क्ताः ।
विश्वे॑ चि॒द्धि त्वा॑ वि॒हव॑न्त॒ मर्ता॑ अ॒स्माक॒मिच्छृ॑णुहि विश्वमिन्व ॥१॥

Brahma na indropa yahi vidvanarvanchaste harayah santu yuktah
Vishve chiddhi tva vihavanta marta asmakamichchhrinuhi vishvaminva

28.2

हवं॑ त इन्द्र महि॒मा व्या॑न॒ड्ब्रह्म॒ यत्पासि॑ शवसि॒न्नृषी॑णाम् ।
आ यद्वज्रं॑ दधि॒षे हस्त॑ उग्र घो॒रः सन्क्रत्वा॑ जनिष्ठा॒ अषा॑ळ्हः ॥२॥

Havam ta indra mahima vyanadbrahma yatpasi shavasinnrishinam
A yadvajram dadhishe hasta ugra ghorah sankratva janishtha ashalhah

28.3

तव॒ प्रणी॑तीन्द्र॒ जोहु॑वाना॒न्त्सं यन्नॄन्न रोद॑सी नि॒नेथ॑ ।
म॒हे क्ष॒त्राय॒ शव॑से॒ हि ज॒ज्ञेऽतू॑तुजिं चि॒त्तूतु॑जिरशिश्नत् ॥३॥

Tava pranitindra johuvanantsam yannrinna rodasi ninetha
Mahe kshatraya shavase hi jagyetutujim chittutujirashishnat

28.4

ए॒भिर्न॑ इ॒न्द्राह॑भिर्दशस्य दुर्मि॒त्रासो॒ हि क्षि॒तय॒ः पव॑न्ते ।
प्रति॒ यच्चष्टे॒ अनृ॑तमने॒ना अव॑ द्वि॒ता वरु॑णो मा॒यी न॑ः सात् ॥४॥

Ebhirna indrahabhirdashasya durmitraso hi kshitayah pavante
Prati yachchashte anritamanena ava dvita varuno mayi nah sat

28.5

वो॒चेमेदिन्द्रं॑ म॒घवा॑नमेनं म॒हो रा॒यो राध॑सो॒ यद्दद॑न्नः ।
यो अर्च॑तो॒ ब्रह्म॑कृति॒मवि॑ष्ठो यू॒यं पा॑त स्व॒स्तिभि॒ः सदा॑ नः ॥५॥

Vochemedindram maghavanamenam maho rayo radhaso yaddadannah
Yo archato brahmakritimavishtho yuyam pata svastibhih sada nah