Sukta 29

29.1

5 maitravarunirvasishthah, indrah, trishtup

अ॒यं सोम॑ इन्द्र॒ तुभ्यं॑ सुन्व॒ आ तु प्र या॑हि हरिव॒स्तदो॑काः ।
पिबा॒ त्व१स्य सुषु॑तस्य॒ चारो॒र्ददो॑ म॒घानि॑ मघवन्निया॒नः ॥१॥

Ayam soma indra tubhyam sunva a tu pra yahi harivastadokah
Piba tva1sya sushutasya charordado maghani maghavanniyanah

ब्रह्म॑न्वीर॒ ब्रह्म॑कृतिं जुषा॒णो॑ऽर्वाची॒नो हरि॑भिर्याहि॒ तूय॑म् ।
अ॒स्मिन्नू॒ षु सव॑ने मादय॒स्वोप॒ ब्रह्मा॑णि शृणव इ॒मा न॑ः ॥२॥

Brahmanvira brahmakritim jushanorvachino haribhiryahi tuyam
Asminnu shu savane madayasvopa brahmani shrinava ima nah

का ते॑ अ॒स्त्यरं॑कृतिः सू॒क्तैः क॒दा नू॒नं ते॑ मघवन्दाशेम ।
विश्वा॑ म॒तीरा त॑तने त्वा॒याऽधा॑ म इन्द्र शृणवो॒ हवे॒मा ॥३॥

Ka te astyarankritih suktaih kada nunam te maghavandashema
Vishva matira tatane tvayadha ma indra shrinavo havema

उ॒तो घा॒ ते पु॑रु॒ष्या॒३ इदा॑स॒न्येषां॒ पूर्वे॑षा॒मशृ॑णो॒ॠषी॑णाम् ।
अधा॒हं त्वा॑ मघवञ्जोहवीमि॒ त्वं न॑ इन्द्रासि॒ प्रम॑तिः पि॒तेव॑ ॥४॥

Uto gha te purushya3 idasanyesham purveshamashrinorishinam
Adhaham tva maghavanjohavimi tvam na indrasi pramatih piteva

वो॒चेमेदिन्द्रं॑ म॒घवा॑नमेनं म॒हो रा॒यो राध॑सो॒ यद्दद॑न्नः ।
यो अर्च॑तो॒ ब्रह्म॑कृति॒मवि॑ष्ठो यू॒यं पा॑त स्व॒स्तिभि॒ः सदा॑ नः ॥५॥

Vochemedindram maghavanamenam maho rayo radhaso yaddadannah
Yo archato brahmakritimavishtho yuyam pata svastibhih sada nah