Sukta 24

24.1

6 maitravarunirvasishthah, indrah, trishtup

योनि॑ष्ट इन्द्र॒ सद॑ने अकारि॒ तमा नृभि॑ः पुरुहूत॒ प्र या॑हि ।
असो॒ यथा॑ नोऽवि॒ता वृ॒धे च॒ ददो॒ वसू॑नि म॒मद॑श्च॒ सोमै॑ः ॥१॥

Yonishta indra sadane akari tama nribhih puruhuta pra yahi
Aso yatha novita vridhe cha dado vasuni mamadashcha somaih

गृ॒भी॒तं ते॒ मन॑ इन्द्र द्वि॒बर्हा॑ः सु॒तः सोम॒ः परि॑षिक्ता॒ मधू॑नि ।
विसृ॑ष्टधेना भरते सुवृ॒क्तिरि॒यमिन्द्रं॒ जोहु॑वती मनी॒षा ॥२॥

Gribhitam te mana indra dvibarhah sutah somah parishikta madhuni
Visrishtadhena bharate suvriktiriyamindram johuvati manisha

आ नो॑ दि॒व आ पृ॑थि॒व्या ऋ॑जीषिन्नि॒दं ब॒र्हिः सो॑म॒पेया॑य याहि ।
वह॑न्तु त्वा॒ हर॑यो म॒द्र्य॑ञ्चमाङ्गू॒षमच्छा॑ त॒वसं॒ मदा॑य ॥३॥

A no diva a prithivya rijishinnidam barhih somapeyaya yahi
Vahantu tva harayo madryanchamangushamachchha tavasam madaya

आ नो॒ विश्वा॑भिरू॒तिभि॑ः स॒जोषा॒ ब्रह्म॑ जुषा॒णो ह॑र्यश्व याहि ।
वरी॑वृज॒त्स्थवि॑रेभिः सुशिप्रा॒ऽस्मे दध॒द्वृष॑णं॒ शुष्म॑मिन्द्र ॥४॥

A no vishvabhirutibhih sajosha brahma jushano haryashva yahi
Varivrijatsthavirebhih sushiprasme dadhadvrishanam shushmamindra

ए॒ष स्तोमो॑ म॒ह उ॒ग्राय॒ वाहे॑ धु॒री॒३वात्यो॒ न वा॒जय॑न्नधायि ।
इन्द्र॑ त्वा॒यम॒र्क ई॑ट्टे॒ वसू॑नां दि॒वी॑व॒ द्यामधि॑ न॒ः श्रोम॑तं धाः ॥५॥

Esha stomo maha ugraya vahe dhuri3vatyo na vajayannadhayi
Indra tvayamarka itte vasunam diviva dyamadhi nah shromatam dhah

ए॒वा न॑ इन्द्र॒ वार्य॑स्य पूर्धि॒ प्र ते॑ म॒हीं सु॑म॒तिं वे॑विदाम ।
इषं॑ पिन्व म॒घव॑द्भ्यः सु॒वीरां॑ यू॒यं पा॑त स्व॒स्तिभि॒ः सदा॑ नः ॥६॥

Eva na indra varyasya purdhi pra te mahim sumatim vevidama
Isham pinva maghavadbhyah suviram yuyam pata svastibhih sada nah