Sukta 23

23.1

6 maitravarunirvasishthah, indrah, trishtup

उदु॒ ब्रह्मा॑ण्यैरत श्रव॒स्येन्द्रं॑ सम॒र्ये म॑हया वसिष्ठ ।
आ यो विश्वा॑नि॒ शव॑सा त॒तानो॑पश्रो॒ता म॒ ईव॑तो॒ वचां॑सि ॥१॥

Udu brahmanyairata shravasyendram samarye mahaya vasishtha
A yo vishvani shavasa tatanopashrota ma ivato vachansi

अया॑मि॒ घोष॑ इन्द्र दे॒वजा॑मिरिर॒ज्यन्त॒ यच्छु॒रुधो॒ विवा॑चि ।
न॒हि स्वमायु॑श्चिकि॒ते जने॑षु॒ तानीदंहां॒स्यति॑ पर्ष्य॒स्मान् ॥२॥

Ayami ghosha indra devajamirirajyanta yachchhurudho vivachi
Nahi svamayushchikite janeshu tanidanhansyati parshyasman

यु॒जे रथं॑ ग॒वेष॑णं॒ हरि॑भ्या॒मुप॒ ब्रह्मा॑णि जुजुषा॒णम॑स्थुः ।
वि बा॑धिष्ट॒ स्य रोद॑सी महि॒त्वेन्द्रो॑ वृ॒त्राण्य॑प्र॒ती ज॑घ॒न्वान् ॥३॥

Yuje ratham gaveshanam haribhyamupa brahmani jujushanamasthuh
Vi badhishta sya rodasi mahitvendro vritranyaprati jaghanvan

आप॑श्चित्पिप्युः स्त॒र्यो॒३ न गावो॒ नक्ष॑न्नृ॒तं ज॑रि॒तार॑स्त इन्द्र ।
या॒हि वा॒युर्न नि॒युतो॑ नो॒ अच्छा॒ त्वं हि धी॒भिर्दय॑से॒ वि वाजा॑न् ॥४॥

Apashchitpipyuh staryo3 na gavo nakshannritam jaritarasta indra
Yahi vayurna niyuto no achchha tvam hi dhibhirdayase vi vajan

ते त्वा॒ मदा॑ इन्द्र मादयन्तु शु॒ष्मिणं॑ तुवि॒राध॑सं जरि॒त्रे ।
एको॑ देव॒त्रा दय॑से॒ हि मर्ता॑न॒स्मिञ्छू॑र॒ सव॑ने मादयस्व ॥५॥

Te tva mada indra madayantu shushminam tuviradhasam jaritre
Eko devatra dayase hi martanasminchhura savane madayasva

ए॒वेदिन्द्रं॒ वृष॑णं॒ वज्र॑बाहुं॒ वसि॑ष्ठासो अ॒भ्य॑र्चन्त्य॒र्कैः ।
स न॑ः स्तु॒तो वी॒रव॑द्धातु॒ गोम॑द्यू॒यं पा॑त स्व॒स्तिभि॒ः सदा॑ नः ॥६॥

Evedindram vrishanam vajrabahum vasishthaso abhyarchantyarkaih
Sa nah stuto viravaddhatu gomadyuyam pata svastibhih sada nah