Sukta 22

22.1

9 maitravarunirvasishthah, indrah, virat, 9 trishtup

पिबा॒ सोम॑मिन्द्र॒ मन्द॑तु त्वा॒ यं ते॑ सु॒षाव॑ हर्य॒श्वाद्रि॑ः । सो॒तुर्बा॒हुभ्यां॒ सुय॑तो॒ नार्वा॑ ॥१॥

Piba somamindra mandatu tva yam te sushava haryashvadrih, soturbahubhyam suyato narva

यस्ते॒ मदो॒ युज्य॒श्चारु॒रस्ति॒ येन॑ वृ॒त्राणि॑ हर्यश्व॒ हंसि॑ । स त्वामि॑न्द्र प्रभूवसो ममत्तु ॥२॥

Yaste mado yujyashcharurasti yena vritrani haryashva hansi, sa tvamindra prabhuvaso mamattu

बोधा॒ सु मे॑ मघव॒न्वाच॒मेमां यां ते॒ वसि॑ष्ठो॒ अर्च॑ति॒ प्रश॑स्तिम् । इ॒मा ब्रह्म॑ सध॒मादे॑ जुषस्व ॥३॥

Bodha su me maghavanvachamemam yam te vasishtho archati prashastim, ima brahma sadhamade jushasva

श्रु॒धी हवं॑ विपिपा॒नस्याद्रे॒र्बोधा॒ विप्र॒स्यार्च॑तो मनी॒षाम् । कृ॒ष्वा दुवां॒स्यन्त॑मा॒ सचे॒मा ॥४॥

Shrudhi havam vipipanasyadrerbodha viprasyarchato manisham, krishva duvansyantama sachema

न ते॒ गिरो॒ अपि॑ मृष्ये तु॒रस्य॒ न सु॑ष्टु॒तिम॑सु॒र्य॑स्य वि॒द्वान् । सदा॑ ते॒ नाम॑ स्वयशो विवक्मि ॥५॥

Na te giro api mrishye turasya na sushtutimasuryasya vidvan, sada te nama svayasho vivakmi

भूरि॒ हि ते॒ सव॑ना॒ मानु॑षेषु॒ भूरि॑ मनी॒षी ह॑वते॒ त्वामित् । मारे अ॒स्मन्म॑घव॒ञ्ज्योक्क॑ः ॥६॥

Bhuri hi te savana manusheshu bhuri manishi havate tvamit, mare asmanmaghavanjyokkah

तुभ्येदि॒मा सव॑ना शूर॒ विश्वा॒ तुभ्यं॒ ब्रह्मा॑णि॒ वर्ध॑ना कृणोमि । त्वं नृभि॒र्हव्यो॑ वि॒श्वधा॑सि ॥७॥

Tubhyedima savana shura vishva tubhyam brahmani vardhana krinomi, tvam nribhirhavyo vishvadhasi

नू चि॒न्नु ते॒ मन्य॑मानस्य द॒स्मोद॑श्नुवन्ति महि॒मान॑मुग्र । न वी॒र्य॑मिन्द्र ते॒ न राध॑ः ॥८॥

Nu chinnu te manyamanasya dasmodashnuvanti mahimanamugra, na viryamindra te na radhah

ये च॒ पूर्व॒ ऋष॑यो॒ ये च॒ नूत्ना॒ इन्द्र॒ ब्रह्मा॑णि ज॒नय॑न्त॒ विप्रा॑ः ।
अ॒स्मे ते॑ सन्तु स॒ख्या शि॒वानि॑ यू॒यं पा॑त स्व॒स्तिभि॒ः सदा॑ नः ॥९॥

Ye cha purva rishayo ye cha nutna indra brahmani janayanta viprah
Asme te santu sakhya shivani yuyam pata svastibhih sada nah