Sukta 21

21.1

10 maitravarunirvasishthah, indrah, trishtup

असा॑वि दे॒वं गोऋ॑जीक॒मन्धो॒ न्य॑स्मि॒न्निन्द्रो॑ ज॒नुषे॑मुवोच ।
बोधा॑मसि त्वा हर्यश्व य॒ज्ञैर्बोधा॑ न॒ः स्तोम॒मन्ध॑सो॒ मदे॑षु ॥१॥

Asavi devam gorijikamandho nyasminnindro janushemuvocha
Bodhamasi tva haryashva yagyairbodha nah stomamandhaso madeshu

प्र य॑न्ति य॒ज्ञं वि॒पय॑न्ति ब॒र्हिः सो॑म॒मादो॑ वि॒दथे॑ दु॒ध्रवा॑चः ।
न्यु॑ भ्रियन्ते य॒शसो॑ गृ॒भादा दू॒रउ॑पब्दो॒ वृष॑णो नृ॒षाच॑ः ॥२॥

Pra yanti yagyam vipayanti barhih somamado vidathe dudhravachah
Nyu bhriyante yashaso gribhada duraupabdo vrishano nrishachah

त्वमि॑न्द्र॒ स्रवि॑त॒वा अ॒पस्क॒ः परि॑ष्ठिता॒ अहि॑ना शूर पू॒र्वीः ।
त्वद्वा॑वक्रे र॒थ्यो॒३ न धेना॒ रेज॑न्ते॒ विश्वा॑ कृ॒त्रिमा॑णि भी॒षा ॥३॥

Tvamindra sravitava apaskah parishthita ahina shura purvih
Tvadvavakre rathyo3 na dhena rejante vishva kritrimani bhisha

भी॒मो वि॑वे॒षायु॑धेभिरेषा॒मपां॑सि॒ विश्वा॒ नर्या॑णि वि॒द्वान् ।
इन्द्र॒ः पुरो॒ जर्हृ॑षाणो॒ वि दू॑धो॒द्वि वज्र॑हस्तो महि॒ना ज॑घान ॥४॥

Bhimo viveshayudhebhireshamapansi vishva naryani vidvan
Indrah puro jarhrishano vi dudhodvi vajrahasto mahina jaghana

न या॒तव॑ इन्द्र जूजुवुर्नो॒ न वन्द॑ना शविष्ठ वे॒द्याभि॑ः ।
स श॑र्धद॒र्यो विषु॑णस्य ज॒न्तोर्मा शि॒श्नदे॑वा॒ अपि॑ गुॠ॒तं न॑ः ॥५॥

Na yatava indra jujuvurno na vandana shavishtha vedyabhih
Sa shardhadaryo vishunasya jantorma shishnadeva api guritam nah

अ॒भि क्रत्वे॑न्द्र भू॒रध॒ ज्मन्न ते॑ विव्यङ्महि॒मानं॒ रजां॑सि ।
स्वेना॒ हि वृ॒त्रं शव॑सा ज॒घन्थ॒ न शत्रु॒रन्तं॑ विविदद्यु॒धा ते॑ ॥६॥

Abhi kratvendra bhuradha jmanna te vivyanmahimanam rajansi
Svena hi vritram shavasa jaghantha na shatrurantam vividadyudha te

दे॒वाश्चि॑त्ते असु॒र्या॑य॒ पूर्वेऽनु॑ क्ष॒त्राय॑ ममिरे॒ सहां॑सि ।
इन्द्रो॑ म॒घानि॑ दयते वि॒षह्येन्द्रं॒ वाज॑स्य जोहुवन्त सा॒तौ ॥७॥

Devashchitte asuryaya purvenu kshatraya mamire sahansi
Indro maghani dayate vishahyendram vajasya johuvanta satau

की॒रिश्चि॒द्धि त्वामव॑से जु॒हावेशा॑नमिन्द्र॒ सौभ॑गस्य॒ भूरे॑ः ।
अवो॑ बभूथ शतमूते अ॒स्मे अ॑भिक्ष॒त्तुस्त्वाव॑तो वरू॒ता ॥८॥

Kirishchiddhi tvamavase juhaveshanamindra saubhagasya bhureh
Avo babhutha shatamute asme abhikshattustvavato varuta

सखा॑यस्त इन्द्र वि॒श्वह॑ स्याम नमोवृ॒धासो॑ महि॒ना त॑रुत्र ।
व॒न्वन्तु॑ स्मा॒ तेऽव॑सा समी॒के॒३ऽभी॑तिम॒र्यो व॒नुषां॒ शवां॑सि ॥९॥

Sakhayasta indra vishvaha syama namovridhaso mahina tarutra
Vanvantu sma tevasa samike3bhitimaryo vanusham shavansi

स न॑ इन्द्र॒ त्वय॑ताया इ॒षे धा॒स्त्मना॑ च॒ ये म॒घवा॑नो जु॒नन्ति॑ ।
वस्वी॒ षु ते॑ जरि॒त्रे अ॑स्तु श॒क्तिर्यू॒यं पा॑त स्व॒स्तिभि॒ः सदा॑ नः ॥१०॥

Sa na indra tvayataya ishe dhastmana cha ye maghavano junanti
Vasvi shu te jaritre astu shaktiryuyam pata svastibhih sada nah