সূক্ত 21

21.1

১০ মৈত্রাবরুণির্বসিষ্ঠঃ। ইন্দ্রঃ । ত্রিষ্টুপ্ ।

অসাবি দেবং গোঋজীকমন্ধো ন্যস্মিন্নিন্দ্রো জনুষেমুবোচ ।
বোধামসি ত্বা হর্যশ্ব যজ্ঞৈর্বোধা নঃ স্তোমমন্ধসো মদেষু ॥১॥

21.2

প্র যন্তি যজ্ঞং বিপয়ন্তি বর্হিঃ সোমমাদো বিদথে দুধ্রবাচঃ ।
ন্যু ভ্রিয়ন্তে যশসো গৃভাদা দূরউপব্দো বৃষণো নৃষাচঃ ॥২॥

21.3

ত্বমিন্দ্র স্রবিতবা অপস্কঃ পরিষ্ঠিতা অহিনা শূর পূর্বীঃ ।
ত্বদ্বাবক্রে রথ্যো৩ ন ধেনা রেজন্তে বিশ্বা কৃত্রিমাণি ভীষা ॥৩॥

21.4

ভীমো বিবেষায়ুধেভিরেষামপাংসি বিশ্বা নর্যাণি বিদ্বান্ ।
ইন্দ্রঃ পুরো জর্হৃষাণো বি দূধোদ্বি বজ্রহস্তো মহিনা জঘান ॥৪॥

21.5

ন যাতব ইন্দ্র জূজুবুর্নো ন বন্দনা শবিষ্ঠ বেদ্যাভিঃ ।
স শর্ধদর্যো বিষুণস্য জন্তোর্মা শিশ্নদেবা অপি গুৠতং নঃ ॥৫॥

21.6

অভি ক্রত্বেন্দ্র ভূরধ জ্মন্ন তে বিব্যঙ্মহিমানং রজাংসি ।
স্বেনা হি বৃত্রং শবসা জঘন্থ ন শত্রুরন্তং বিবিদদ্যুধা তে ॥৬॥

21.7

দেবাশ্চিত্তে অসুর্যায় পূর্বেঽনু ক্ষত্রায় মমিরে সহাংসি ।
ইন্দ্রো মঘানি দয়তে বিষহ্যেন্দ্রং বাজস্য জোহুবন্ত সাতৌ ॥৭॥

21.8

কীরিশ্চিদ্ধি ত্বামবসে জুহাবেশানমিন্দ্র সৌভগস্য ভূরেঃ ।
অবো বভূথ শতমূতে অস্মে অভিক্ষত্তুস্ত্বাবতো বরূতা ॥৮॥

21.9

সখায়স্ত ইন্দ্র বিশ্বহ স্যাম নমোবৃধাসো মহিনা তরুত্র ।
বন্বন্তু স্মা তেঽবসা সমীকে৩ঽভীতিমর্যো বনুষাং শবাংসি ॥৯॥

21.10

স ন ইন্দ্র ত্বয়তায়া ইষে ধাস্ত্মনা চ যে মঘবানো জুনন্তি ।
বস্বী ষু তে জরিত্রে অস্তু শক্তির্যূয়ং পাত স্বস্তিভিঃ সদা নঃ ॥১০॥