সূক্ত 20

20.1

১০ মৈত্রাবরুণির্বসিষ্ঠঃ। ইন্দ্রঃ । ত্রিষ্টুপ্ ।

উগ্রো জজ্ঞে বীর্যায় স্বধাবাঞ্চক্রিরপো নর্যো যত্করিষ্যন্ ।
জগ্মির্যুবা নৃষদনমবোভিস্ত্রাতা ন ইন্দ্র এনসো মহশ্চিৎ ॥১॥

20.2

হন্তা বৃত্রমিন্দ্রঃ শূশুবানঃ প্রাবীন্নু বীরো জরিতারমূতী ।
কর্তা সুদাসে অহ বা উ লোকং দাতা বসু মুহুরা দাশুষে ভূৎ ॥২॥

20.3

যুধ্মো অনর্বা খজকৃত্সমদ্বা শূরঃ সত্রাষাড্জনুষেমষাল্হঃ ।
ব্যাস ইন্দ্রঃ পৃতনাঃ স্বোজা অধা বিশ্বং শত্রূয়ন্তং জঘান ॥৩॥

20.4

উভে চিদিন্দ্র রোদসী মহিত্বা ঽঽপপ্রাথ তবিষীভিস্তুবিষ্মঃ ।
নি বজ্রমিন্দ্রো হরিবান্মিমিক্ষন্ত্সমন্ধসা মদেষু বা উবোচ ॥৪॥

20.5

বৃষা জজান বৃষণং রণায় তমু চিন্নারী নর্যং সসূব ।
প্র যঃ সেনানীরধ নৃভ্যো অস্তীনঃ সত্বা গবেষণঃ স ধৃষ্ণুঃ ॥৫॥

20.6

নূ চিত্স ভ্রেষতে জনো ন রেষন্মনো যো অস্য ঘোরমাবিবাসাৎ ।
যজ্ঞৈর্য ইন্দ্রে দধতে দুবাংসি ক্ষয়ত্স রায় ঋতপা ঋতেজাঃ ॥৬॥

20.7

যদিন্দ্র পূর্বো অপরায় শিক্ষন্নয়জ্জ্যায়ান্কনীয়সো দেষ্ণম্ ।
অমৃত ইত্পর্যাসীত দূরমা চিত্র চিত্র্যং ভরা রয়িং নঃ ॥৭॥

20.8

যস্ত ইন্দ্র প্রিয়ো জনো দদাশদসন্নিরেকে অদ্রিবঃ সখা তে ।
বয়ং তে অস্যাং সুমতৌ চনিষ্ঠাঃ স্যাম বরূথে অঘ্নতো নৃপীতৌ ॥৮॥

20.9

এষ স্তোমো অচিক্রদদ্বৃষা ত উত স্তামুর্মঘবন্নক্রপিষ্ট ।
রায়স্কামো জরিতারং ত আগন্ত্বমঙ্গ শক্র বস্ব আ শকো নঃ ॥৯॥

20.10

স ন ইন্দ্র ত্বয়তায়া ইষে ধাস্ত্মনা চ যে মঘবানো জুনন্তি ।
বস্বী ষু তে জরিত্রে অস্তু শক্তির্যূয়ং পাত স্বস্তিভিঃ সদা নঃ ॥১০॥