সূক্ত 19

19.1

১১ মৈত্রাবরুণির্বসিষ্ঠঃ। ইন্দ্রঃ । ত্রিষ্টুপ্ ।

যস্তিগ্মশৃঙ্গো বৃষভো ন ভীম একঃ কৃষ্টীশ্চ্যাবয়তি প্র বিশ্বাঃ ।
যঃ শশ্বতো অদাশুষো গয়স্য প্রয়ন্তাসি সুষ্বিতরায় বেদঃ ॥১॥

19.2

ত্বং হ ত্যদিন্দ্র কুত্সমাবঃ শুশ্রূষমাণস্তন্বা সমর্যে ।
দাসং যচ্ছুষ্ণং কুয়বং ন্যস্মা অরন্ধয় আর্জুনেয়ায় শিক্ষন্ ॥২॥

19.3

ত্বং ধৃষ্ণো ধৃষতা বীতহব্যং প্রাবো বিশ্বাভিরূতিভিঃ সুদাসম্ ।
প্র পৌরুকুত্সিং ত্রসদস্যুমাবঃ ক্ষেত্রসাতা বৃত্রহত্যেষু পূরুম্ ॥৩॥

19.4

ত্বং নৃভির্নৃমণো দেববীতৌ ভূরীণি বৃত্রা হর্যশ্ব হংসি ।
ত্বং নি দস্যুং চুমুরিং ধুনিং চাঽস্বাপয়ো দভীতয়ে সুহন্তু ॥৪॥

19.5

তব চ্যৌত্নানি বজ্রহস্ত তানি নব যত্পুরো নবতিং চ সদ্যঃ ।
নিবেশনে শততমাবিবেষীরহঞ্চ বৃত্রং নমুচিমুতাহন্ ॥৫॥

19.6

সনা তা ত ইন্দ্র ভোজনানি রাতহব্যায় দাশুষে সুদাসে ।
বৃষ্ণে তে হরী বৃষণা যুনজ্মি ব্যন্তু ব্রহ্মাণি পুরুশাক বাজম্ ॥৬॥

19.7

মা তে অস্যাং সহসাবন্পরিষ্টাবঘায় ভূম হরিবঃ পরাদৈ ।
ত্রায়স্ব নোঽবৃকেভির্বরূথৈস্তব প্রিয়াসঃ সূরিষু স্যাম ॥৭॥

19.8

প্রিয়াস ইত্তে মঘবন্নভিষ্টৌ নরো মদেম শরণে সখায়ঃ ।
নি তুর্বশং নি যাদ্বং শিশীহ্যতিথিগ্বায় শংস্যং করিষ্যন্ ॥৮॥

19.9

সদ্যশ্চিন্নু তে মঘবন্নভিষ্টৌ নরঃ শংসন্ত্যুক্থশাস উক্থা ।
যে তে হবেভির্বি পণীঁরদাশন্নস্মান্বৃণীষ্ব যুজ্যায় তস্মৈ ॥৯॥

19.10

এতে স্তোমা নরাং নৃতম তুভ্যমস্মদ্র্যঞ্চো দদতো মঘানি ।
তেষামিন্দ্র বৃত্রহত্যে শিবো ভূঃ সখা চ শূরোঽবিতা চ নৃণাম্ ॥১০॥

19.11

নূ ইন্দ্র শূর স্তবমান ঊতী ব্রহ্মজূতস্তন্বা বাবৃধস্ব ।
উপ নো বাজান্মিমীহ্যুপ স্তীন্যূয়ং পাত স্বস্তিভিঃ সদা নঃ ॥১১॥