সূক্ত 18

18.1

২৫ মৈত্রাবরুণির্বসিষ্ঠঃ। ইন্দ্রঃ, ২২-২৫ সুদাঃ পৈজবনঃ । ত্রিষ্টুপ্ ।

ত্বে হ যত্পিতরশ্চিন্ন ইন্দ্র বিশ্বা বামা জরিতারো অসন্বন্ ।
ত্বে গাবঃ সুদুঘাস্ত্বে হ্যশ্বাস্ত্বং বসু দেবয়তে বনিষ্ঠঃ ॥১॥

18.2

রাজেব হি জনিভিঃ ক্ষেষ্যেবাঽব দ্যুভিরভি বিদুষ্কবিঃ সন্ ।
পিশা গিরো মঘবন্গোভিরশ্বৈস্ত্বায়তঃ শিশীহি রায়ে অস্মান্ ॥২॥

18.3

ইমা উ ত্বা পস্পৃধানাসো অত্র মন্দ্রা গিরো দেবয়ন্তীরুপ স্থুঃ ।
অর্বাচী তে পথ্যা রায় এতু স্যাম তে সুমতাবিন্দ্র শর্মন্ ॥৩॥

18.4

ধেনুং ন ত্বা সূয়বসে দুদুক্ষন্নুপ ব্রহ্মাণি সসৃজে বসিষ্ঠঃ ।
ত্বামিন্মে গোপতিং বিশ্ব আহা ঽঽন ইন্দ্রঃ সুমতিং গন্ত্বচ্ছ ॥৪॥

18.5

অর্ণাংসি চিত্পপ্রথানা সুদাস ইন্দ্রো গাধান্যকৃণোত্সুপারা ।
শর্ধন্তং শিম্যুমুচথস্য নব্যঃ শাপং সিন্ধূনামকৃণোদশস্তীঃ ॥৫॥

18.6

পুরোলা ইত্তুর্বশো যক্ষুরাসীদ্রায়ে মত্স্যাসো নিশিতা অপীব ।
শ্রুষ্টিং চক্রুর্ভৃগবো দ্রুহ্যবশ্চ সখা সখায়মতরদ্বিষূচোঃ ॥৬॥

18.7

আ পক্থাসো ভলানসো ভনন্তাঽলিনাসো বিষাণিনঃ শিবাসঃ ।
আ যোঽনয়ত্সধমা আর্যস্য গব্যা তৃত্সুভ্যো অজগন্যুধা নৄন্ ॥৭॥

18.8

দুরাধ্যো৩ অদিতিং স্রেবয়ন্তোঽচেতসো বি জগৃভ্রে পরুষ্ণীম্ ।
মহ্নাবিব্যক্পৃথিবীং পত্যমানঃ পশুষ্কবিরশয়চ্চায়মানঃ ॥৮॥

18.9

ঈয়ুরর্থং ন ন্যর্থং পরুষ্ণীমাশুশ্চনেদভিপিত্বং জগাম ।
সুদাস ইন্দ্রঃ সুতুকাঁ অমিত্রানরন্ধয়ন্মানুষে বধ্রিবাচঃ ॥৯॥

18.10

ঈয়ুর্গাবো ন যবসাদগোপা যথাকৃতমভি মিত্রং চিতাসঃ ।
পৃশ্নিগাবঃ পৃশ্নিনিপ্রেষিতাসঃ শ্রুষ্টিং চক্রুর্নিয়ুতো রন্তয়শ্চ ॥১০॥

18.11

একং চ যো বিংশতিং চ শ্রবস্যা বৈকর্ণয়োর্জনান্রাজা ন্যস্তঃ ।
দস্মো ন সদ্মন্নি শিশাতি বর্হিঃ শূরঃ সর্গমকৃণোদিন্দ্র এষাম্ ॥১১॥

18.12

অধ শ্রুতং কবষং বৃদ্ধমপ্স্বনু দ্রুহ্যুং নি বৃণগ্বজ্রবাহুঃ ।
বৃণানা অত্র সখ্যায় সখ্যং ত্বায়ন্তো যে অমদন্ননু ত্বা ॥১২॥

18.13

বি সদ্যো বিশ্বা দৃংহিতান্যেষামিন্দ্রঃ পুরঃ সহসা সপ্ত দর্দঃ ।
ব্যানবস্য তৃত্সবে গয়ং ভাগ্জেষ্ম পূরুং বিদথে মৃধ্রবাচম্ ॥১৩॥

18.14

নি গব্যবোঽনবো দ্রুহ্যবশ্চ ষষ্টিঃ শতা সুষুপুঃ ষট্ সহস্রা ।
ষষ্টির্বীরাসো অধি ষড্দুবোয়ু বিশ্বেদিন্দ্রস্য বীর্যা কৃতানি ॥১৪॥

18.15

ইন্দ্রেণৈতে তৃত্সবো বেবিষাণা আপো ন সৃষ্টা অধবন্ত নীচীঃ ।
দুর্মিত্রাসঃ প্রকলবিন্মিমানা জহুর্বিশ্বানি ভোজনা সুদাসে ॥১৫॥

18.16

অর্ধং বীরস্য শৃতপামনিন্দ্রং পরা শর্ধন্তং নুনুদে অভি ক্ষাম্ ।
ইন্দ্রো মন্যুং মন্যুম্যো মিমায় ভেজে পথো বর্তনিং পত্যমানঃ ॥১৬॥

18.17

আধ্রেণ চিত্তদ্বেকং চকার সিংহ্যং চিত্পেত্বেনা জঘান ।
অব স্রক্তীর্বেশ্যাবৃশ্চদিন্দ্রঃ প্রায়চ্ছদ্বিশ্বা ভোজনা সুদাসে ॥১৭॥

18.18

শশ্বন্তো হি শত্রবো রারধুষ্টে ভেদস্য চিচ্ছর্ধতো বিন্দ রন্ধিম্ ।
মর্তাঁ এনঃ স্তুবতো যঃ কৃণোতি তিগ্মং তস্মিন্নি জহি বজ্রমিন্দ্র ॥১৮॥

18.19

আবদিন্দ্রং যমুনা তৃত্সবশ্চ প্রাত্র ভেদং সর্বতাতা মুষায়ৎ ।
অজাসশ্চ শিগ্রবো যক্ষবশ্চ বলিং শীর্ষাণি জভ্রুরশ্ব্যানি ॥১৯॥

18.20

ন ত ইন্দ্র সুমতয়ো ন রায়ঃ সংচক্ষে পূর্বা উষসো ন নূত্নাঃ ।
দেবকং চিন্মান্যমানং জঘন্থাঽব ত্মনা বৃহতঃ শম্বরং ভেৎ ॥২০॥

18.21

প্র যে গৃহাদমমদুস্ত্বায়া পরাশরঃ শতয়াতুর্বসিষ্ঠঃ ।
ন তে ভোজস্য সখ্যং মৃষন্তাঽধা সূরিভ্যঃ সুদিনা ব্যুচ্ছান্ ॥২১॥

18.22

দ্বে নপ্তুর্দেববতঃ শতে গোর্দ্বা রথা বধূমন্তা সুদাসঃ ।
অর্হন্নগ্নে পৈজবনস্য দানং হোতেব সদ্ম পর্যেমি রেভন্ ॥২২॥

18.23

চত্বারো মা পৈজবনস্য দানাঃ স্মদ্দিষ্টয়ঃ কৃশনিনো নিরেকে ।
ঋজ্রাসো মা পৃথিবিষ্ঠাঃ সুদাসস্তোকং তোকায় শ্রবসে বহন্তি ॥২৩॥

18.24

যস্য শ্রবো রোদসী অন্তরুর্বী শীর্ষ্ণেশীর্ষ্ণে বিবভাজা বিভক্তা ।
সপ্তেদিন্দ্রং ন স্রবতো গৃণন্তি নি যুধ্যামধিমশিশাদভীকে ॥২৪॥

18.25

ইমং নরো মরুতঃ সশ্চতানু দিবোদাসং ন পিতরং সুদাসঃ ।
অবিষ্টনা পৈজবনস্য কেতং দূণাশং ক্ষত্রমজরং দুবোয়ু ॥২৫॥