Sukta 18

18.1

25 maitravarunirvasishthah, indrah, 22-25 sudah paijavanah, trishtup

त्वे ह॒ यत्पि॒तर॑श्चिन्न इन्द्र॒ विश्वा॑ वा॒मा ज॑रि॒तारो॒ अस॑न्वन् ।
त्वे गाव॑ः सु॒दुघा॒स्त्वे ह्यश्वा॒स्त्वं वसु॑ देवय॒ते वनि॑ष्ठः ॥१॥

Tve ha yatpitarashchinna indra vishva vama jaritaro asanvan
Tve gavah sudughastve hyashvastvam vasu devayate vanishthah

18.2

राजे॑व॒ हि जनि॑भि॒ः क्षेष्ये॒वाऽव॒ द्युभि॑र॒भि वि॒दुष्क॒विः सन् ।
पि॒शा गिरो॑ मघव॒न्गोभि॒रश्वै॑स्त्वाय॒तः शि॑शीहि रा॒ये अ॒स्मान् ॥२॥

Rajeva hi janibhih ksheshyevava dyubhirabhi vidushkavih san
Pisha giro maghavangobhirashvaistvayatah shishihi raye asman

18.3

इ॒मा उ॑ त्वा पस्पृधा॒नासो॒ अत्र॑ म॒न्द्रा गिरो॑ देव॒यन्ती॒रुप॑ स्थुः ।
अ॒र्वाची॑ ते प॒थ्या॑ रा॒य ए॑तु॒ स्याम॑ ते सुम॒तावि॑न्द्र॒ शर्म॑न् ॥३॥

Ima u tva paspridhanaso atra mandra giro devayantirupa sthuh
Arvachi te pathya raya etu syama te sumatavindra sharman

18.4

धे॒नुं न त्वा॑ सू॒यव॑से॒ दुदु॑क्ष॒न्नुप॒ ब्रह्मा॑णि ससृजे॒ वसि॑ष्ठः ।
त्वामिन्मे॒ गोप॑तिं॒ विश्व॑ आ॒हा ऽऽन॒ इन्द्र॑ः सुम॒तिं ग॒न्त्वच्छ॑ ॥४॥

Dhenum na tva suyavase dudukshannupa brahmani sasrije vasishthah
Tvaminme gopatim vishva aha na indrah sumatim gantvachchha

18.5

अर्णां॑सि चित्पप्रथा॒ना सु॒दास॒ इन्द्रो॑ गा॒धान्य॑कृणोत्सुपा॒रा ।
शर्ध॑न्तं शि॒म्युमु॒चथ॑स्य॒ नव्य॒ः शापं॒ सिन्धू॑नामकृणो॒दश॑स्तीः ॥५॥

Arnansi chitpaprathana sudasa indro gadhanyakrinotsupara
Shardhantam shimyumuchathasya navyah shapam sindhunamakrinodashastih

18.6

पु॒रो॒ळा इत्तु॒र्वशो॒ यक्षु॑रासीद्रा॒ये मत्स्या॑सो॒ निशि॑ता॒ अपी॑व ।
श्रु॒ष्टिं च॑क्रु॒र्भृग॑वो द्रु॒ह्यव॑श्च॒ सखा॒ सखा॑यमतर॒द्विषू॑चोः ॥६॥

Purola itturvasho yakshurasidraye matsyaso nishita apiva
Shrushtim chakrurbhrigavo druhyavashcha sakha sakhayamataradvishuchoh

18.7

आ प॒क्थासो॑ भला॒नसो॑ भन॒न्ताऽलि॑नासो विषा॒णिन॑ः शि॒वास॑ः ।
आ योऽन॑यत्सध॒मा आर्य॑स्य ग॒व्या तृत्सु॑भ्यो अजगन्यु॒धा नॄन् ॥७॥

A pakthaso bhalanaso bhanantalinaso vishaninah shivasah
A yonayatsadhama aryasya gavya tritsubhyo ajaganyudha nrin

18.8

दु॒रा॒ध्यो॒३ अदि॑तिं स्रे॒वय॑न्तोऽचे॒तसो॒ वि ज॑गृभ्रे॒ परु॑ष्णीम् ।
म॒ह्नावि॑व्यक्पृथि॒वीं पत्य॑मानः प॒शुष्क॒विर॑शय॒च्चाय॑मानः ॥८॥

Duradhyo3 aditim srevayantochetaso vi jagribhre parushnim
Mahnavivyakprithivim patyamanah pashushkavirashayachchayamanah

18.9

ई॒युरर्थं॒ न न्य॒र्थं परु॑ष्णीमा॒शुश्च॒नेद॑भिपि॒त्वं ज॑गाम ।
सु॒दास॒ इन्द्र॑ः सु॒तुकाँ॑ अ॒मित्रा॒नर॑न्धय॒न्मानु॑षे॒ वध्रि॑वाचः ॥९॥

Iyurartham na nyartham parushnimashushchanedabhipitvam jagama
Sudasa indrah sutukam amitranarandhayanmanushe vadhrivachah

18.10

ई॒युर्गावो॒ न यव॑सा॒दगो॑पा यथाकृ॒तम॒भि मि॒त्रं चि॒तास॑ः ।
पृश्नि॑गाव॒ः पृश्नि॑निप्रेषितासः श्रु॒ष्टिं च॑क्रुर्नि॒युतो॒ रन्त॑यश्च ॥१०॥

Iyurgavo na yavasadagopa yathakritamabhi mitram chitasah
Prishnigavah prishninipreshitasah shrushtim chakrurniyuto rantayashcha

18.11

एकं॑ च॒ यो विं॑श॒तिं च॑ श्रव॒स्या वै॑क॒र्णयो॒र्जना॒न्राजा॒ न्यस्त॑ः ।
द॒स्मो न सद्म॒न्नि शि॑शाति ब॒र्हिः शूर॒ः सर्ग॑मकृणो॒दिन्द्र॑ एषाम् ॥११॥

Ekam cha yo vinshatim cha shravasya vaikarnayorjananraja nyastah
Dasmo na sadmanni shishati barhih shurah sargamakrinodindra esham

18.12

अध॑ श्रु॒तं क॒वषं॑ वृ॒द्धम॒प्स्वनु॑ द्रु॒ह्युं नि वृ॑ण॒ग्वज्र॑बाहुः ।
वृ॒णा॒ना अत्र॑ स॒ख्याय॑ स॒ख्यं त्वा॒यन्तो॒ ये अम॑द॒न्ननु॑ त्वा ॥१२॥

Adha shrutam kavasham vriddhamapsvanu druhyum ni vrinagvajrabahuh
Vrinana atra sakhyaya sakhyam tvayanto ye amadannanu tva

18.13

वि स॒द्यो विश्वा॑ दृंहि॒तान्ये॑षा॒मिन्द्र॒ः पुर॒ः सह॑सा स॒प्त द॑र्दः ।
व्यान॑वस्य॒ तृत्स॑वे॒ गयं॑ भा॒ग्जेष्म॑ पू॒रुं वि॒दथे॑ मृ॒ध्रवा॑चम् ॥१३॥

Vi sadyo vishva drinhitanyeshamindrah purah sahasa sapta dardah
Vyanavasya tritsave gayam bhagjeshma purum vidathe mridhravacham

18.14

नि ग॒व्यवोऽन॑वो द्रु॒ह्यव॑श्च ष॒ष्टिः श॒ता सु॑षुपु॒ः षट् स॒हस्रा॑ ।
ष॒ष्टिर्वी॒रासो॒ अधि॒ षड्दु॑वो॒यु विश्वेदिन्द्र॑स्य वी॒र्या॑ कृ॒तानि॑ ॥१४॥

Ni gavyavonavo druhyavashcha shashtih shata sushupuh shat sahasra
Shashtirviraso adhi shadduvoyu vishvedindrasya virya kritani

18.15

इन्द्रे॑णै॒ते तृत्स॑वो॒ वेवि॑षाणा॒ आपो॒ न सृ॒ष्टा अ॑धवन्त॒ नीची॑ः ।
दु॒र्मि॒त्रास॑ः प्रकल॒विन्मिमा॑ना ज॒हुर्विश्वा॑नि॒ भोज॑ना सु॒दासे॑ ॥१५॥

Indrenaite tritsavo vevishana apo na srishta adhavanta nichih
Durmitrasah prakalavinmimana jahurvishvani bhojana sudase

18.16

अ॒र्धं वी॒रस्य॑ शृत॒पाम॑नि॒न्द्रं परा॒ शर्ध॑न्तं नुनुदे अ॒भि क्षाम् ।
इन्द्रो॑ म॒न्युं म॑न्यु॒म्यो॑ मिमाय भे॒जे प॒थो व॑र्त॒निं पत्य॑मानः ॥१६॥

Ardham virasya shritapamanindram para shardhantam nunude abhi ksham
Indro manyum manyumyo mimaya bheje patho vartanim patyamanah

18.17

आ॒ध्रेण॑ चि॒त्तद्वेकं॑ चकार सिं॒ह्यं॑ चि॒त्पेत्वे॑ना जघान ।
अव॑ स्र॒क्तीर्वे॒श्या॑वृश्च॒दिन्द्र॒ः प्राय॑च्छ॒द्विश्वा॒ भोज॑ना सु॒दासे॑ ॥१७॥

Adhrena chittadvekam chakara sinhyam chitpetvena jaghana
Ava sraktirveshyavrishchadindrah prayachchhadvishva bhojana sudase

18.18

शश्व॑न्तो॒ हि शत्र॑वो रार॒धुष्टे॑ भे॒दस्य॑ चि॒च्छर्ध॑तो विन्द॒ रन्धि॑म् ।
मर्ताँ॒ एन॑ः स्तुव॒तो यः कृ॒णोति॑ ति॒ग्मं तस्मि॒न्नि ज॑हि॒ वज्र॑मिन्द्र ॥१८॥

Shashvanto hi shatravo raradhushte bhedasya chichchhardhato vinda randhim
Martam enah stuvato yah krinoti tigmam tasminni jahi vajramindra

18.19

आव॒दिन्द्रं॑ य॒मुना॒ तृत्स॑वश्च॒ प्रात्र॑ भे॒दं स॒र्वता॑ता मुषायत् ।
अ॒जास॑श्च॒ शिग्र॑वो॒ यक्ष॑वश्च ब॒लिं शी॒र्षाणि॑ जभ्रु॒रश्व्या॑नि ॥१९॥

Avadindram yamuna tritsavashcha pratra bhedam sarvatata mushayat
Ajasashcha shigravo yakshavashcha balim shirshani jabhrurashvyani

18.20

न त॑ इन्द्र सुम॒तयो॒ न राय॑ः सं॒चक्षे॒ पूर्वा॑ उ॒षसो॒ न नूत्ना॑ः ।
देव॑कं चिन्मान्यमा॒नं ज॑घ॒न्थाऽव॒ त्मना॑ बृह॒तः शम्ब॑रं भेत् ॥२०॥

Na ta indra sumatayo na rayah sanchakshe purva ushaso na nutnah
Devakam chinmanyamanam jaghanthava tmana brihatah shambaram bhet

18.21

प्र ये गृ॒हादम॑मदुस्त्वा॒या प॑राश॒रः श॒तया॑तु॒र्वसि॑ष्ठः ।
न ते॑ भो॒जस्य॑ स॒ख्यं मृ॑ष॒न्ताऽधा॑ सू॒रिभ्य॑ः सु॒दिना॒ व्यु॑च्छान् ॥२१॥

Pra ye grihadamamadustvaya parasharah shatayaturvasishthah
Na te bhojasya sakhyam mrishantadha suribhyah sudina vyuchchhan

18.22

द्वे नप्तु॑र्दे॒वव॑तः श॒ते गोर्द्वा रथा॑ व॒धूम॑न्ता सु॒दास॑ः ।
अर्ह॑न्नग्ने पैजव॒नस्य॒ दानं॒ होते॑व॒ सद्म॒ पर्ये॑मि॒ रेभ॑न् ॥२२॥

Dve napturdevavatah shate gordva ratha vadhumanta sudasah
Arhannagne paijavanasya danam hoteva sadma paryemi rebhan

18.23

च॒त्वारो॑ मा पैजव॒नस्य॒ दाना॒ः स्मद्दि॑ष्टयः कृश॒निनो॑ निरे॒के ।
ऋ॒ज्रासो॑ मा पृथिवि॒ष्ठाः सु॒दास॑स्तो॒कं तो॒काय॒ श्रव॑से वहन्ति ॥२३॥

Chatvaro ma paijavanasya danah smaddishtayah krishanino nireke
Rijraso ma prithivishthah sudasastokam tokaya shravase vahanti

18.24

यस्य॒ श्रवो॒ रोद॑सी अ॒न्तरु॒र्वी शी॒र्ष्णेशी॑र्ष्णे विब॒भाजा॑ विभ॒क्ता ।
स॒प्तेदिन्द्रं॒ न स्र॒वतो॑ गृणन्ति॒ नि यु॑ध्याम॒धिम॑शिशाद॒भीके॑ ॥२४॥

Yasya shravo rodasi antarurvi shirshneshirshne vibabhaja vibhakta
Saptedindram na sravato grinanti ni yudhyamadhimashishadabhike

18.25

इ॒मं न॑रो मरुतः सश्च॒तानु॒ दिवो॑दासं॒ न पि॒तरं॑ सु॒दास॑ः ।
अ॒वि॒ष्टना॑ पैजव॒नस्य॒ केतं॑ दू॒णाशं॑ क्ष॒त्रम॒जरं॑ दुवो॒यु ॥२५॥

Imam naro marutah sashchatanu divodasam na pitaram sudasah
Avishtana paijavanasya ketam dunasham kshatramajaram duvoyu