সূক্ত 22

22.1

৯ মৈত্রাবরুণির্বসিষ্ঠঃ। ইন্দ্রঃ । বিরাট্, ৯ ত্রিষ্টুপ্ ।

পিবা সোমমিন্দ্র মন্দতু ত্বা যং তে সুষাব হর্যশ্বাদ্রিঃ । সোতুর্বাহুভ্যাং সুয়তো নার্বা ॥১॥

যস্তে মদো যুজ্যশ্চারুরস্তি যেন বৃত্রাণি হর্যশ্ব হংসি । স ত্বামিন্দ্র প্রভূবসো মমত্তু ॥২॥

বোধা সু মে মঘবন্বাচমেমাং যাং তে বসিষ্ঠো অর্চতি প্রশস্তিম্ । ইমা ব্রহ্ম সধমাদে জুষস্ব ॥৩॥

শ্রুধী হবং বিপিপানস্যাদ্রের্বোধা বিপ্রস্যার্চতো মনীষাম্ । কৃষ্বা দুবাংস্যন্তমা সচেমা ॥৪॥

ন তে গিরো অপি মৃষ্যে তুরস্য ন সুষ্টুতিমসুর্যস্য বিদ্বান্ । সদা তে নাম স্বয়শো বিবক্মি ॥৫॥

ভূরি হি তে সবনা মানুষেষু ভূরি মনীষী হবতে ত্বামিৎ । মারে অস্মন্মঘবঞ্জ্যোক্কঃ ॥৬॥

তুভ্যেদিমা সবনা শূর বিশ্বা তুভ্যং ব্রহ্মাণি বর্ধনা কৃণোমি । ত্বং নৃভির্হব্যো বিশ্বধাসি ॥৭॥

নূ চিন্নু তে মন্যমানস্য দস্মোদশ্নুবন্তি মহিমানমুগ্র । ন বীর্যমিন্দ্র তে ন রাধঃ ॥৮॥

যে চ পূর্ব ঋষয়ো যে চ নূত্না ইন্দ্র ব্রহ্মাণি জনয়ন্ত বিপ্রাঃ ।
অস্মে তে সন্তু সখ্যা শিবানি যূয়ং পাত স্বস্তিভিঃ সদা নঃ ॥৯॥