সূক্ত 65

65.1

৬ বার্হস্পত্যো ভরদ্বাজঃ । উষাঃ। ত্রিষ্টুপ্ ।

এষা স্যা নো দুহিতা দিবোজাঃ ক্ষিতীরুচ্ছন্তী মানুষীরজীগঃ ।
যা ভানুনা রুশতা রাম্যাস্বজ্ঞায়ি তিরস্তমসশ্চিদক্তূন্ ॥১॥

65.2

বি তদ্যয়ুররুণয়ুগ্ভিরশ্বৈশ্চিত্রং ভান্ত্যুষসশ্চন্দ্ররথাঃ ।
অগ্রং যজ্ঞস্য বৃহতো নয়ন্তীর্বি তা বাধন্তে তম ঊর্ম্যায়াঃ ॥২॥

65.3

শ্রবো বাজমিষমূর্জং বহন্তীর্নি দাশুষ উষসো মর্ত্যায় ।
মঘোনীর্বীরবত্পত্যমানা অবো ধাত বিধতে রত্নমদ্য ॥৩॥

65.4

ইদা হি বো বিধতে রত্নমস্তীদা বীরায় দাশুষ উষাসঃ ।
ইদা বিপ্রায় জরতে যদুক্থা নি ষ্ম মাবতে বহথা পুরা চিৎ ॥৪॥

65.5

ইদা হি ত উষো অদ্রিসানো গোত্রা গবামঙ্গিরসো গৃণন্তি ।
ব্য১র্কেণ বিভিদুর্ব্রহ্মণা চ সত্যা নৃণামভবদ্দেবহূতিঃ ॥৫॥

65.6

উচ্ছা দিবো দুহিতঃ প্রত্নবন্নো ভরদ্বাজবদ্বিধতে মঘোনি ।
সুবীরং রয়িং গৃণতে রিরীহ্যুরুগায়মধি ধেহি শ্রবো নঃ ॥৬॥