সূক্ত 64

64.1

৬ বার্হস্পত্যো ভরদ্বাজঃ ।উষাঃ । ত্রিষ্টুপ্ ।

উদু শ্রিয় উষসো রোচমানা অস্থুরপাং নোর্ময়ো রুশন্তঃ ।
কৃণোতি বিশ্বা সুপথা সুগান্যভূদু বস্বী দক্ষিণা মঘোনী ॥১॥

64.2

ভদ্রা দদৃক্ষ উর্বিয়া বি ভাস্যুত্তে শোচির্ভানবো দ্যামপপ্তন্ ।
আবির্বক্ষঃ কৃণুষে শুম্ভমানোষো দেবি রোচমানা মহোভিঃ ॥২॥

64.3

বহন্তি সীমরুণাসো রুশন্তো গাবঃ সুভগামুর্বিয়া প্রথানাম্ ।
অপেজতে শূরো অস্তেব শত্রূন্বাধতে তমো অজিরো ন বোল্হা ॥৩॥

64.4

সুগোত তে সুপথা পর্বতেষ্ববাতে অপস্তরসি স্বভানো ।
সা ন আ বহ পৃথুয়ামন্নৃষ্বে রয়িং দিবো দুহিতরিষয়ধ্যৈ ॥৪॥

64.5

সা বহ যোক্ষভিরবাতোষো বরং বহসি জোষমনু ।
ত্বং দিবো দুহিতর্যা হ দেবী পূর্বহূতৌ মংহনা দর্শতা ভূঃ ॥৫॥

64.6

উত্তে বয়শ্চিদ্বসতেরপপ্তন্নরশ্চ যে পিতুভাজো ব্যুষ্টৌ ।
অমা সতে বহসি ভূরি বামমুষো দেবি দাশুষে মর্ত্যায় ॥৬॥