সূক্ত 66

66.1

১১ বার্হস্পত্যো ভরদ্বাজঃ । মরুতঃ। ত্রিষ্টুপ্ ।

বপুর্নু তচ্চিকিতুষে চিদস্তু সমানং নাম ধেনু পত্যমানম্ ।
মর্তেষ্বন্যদ্দোহসে পীপায় সকৃচ্ছুক্রং দুদুহে পৃশ্নিরূধঃ ॥১॥

যে অগ্নয়ো ন শোশুচন্নিধানা দ্বির্যত্ত্রির্মরুতো বাবৃধন্ত ।
অরেণবো হিরণ্যয়াস এষাং সাকং নৃম্ণৈঃ পৌংস্যেভিশ্চ ভূবন্ ॥২॥

রুদ্রস্য যে মীল্হুষঃ সন্তি পুত্রা যাঁশ্চো নু দাধৃবির্ভরধ্যৈ ।
বিদে হি মাতা মহো মহী ষা সেত্পৃশ্নিঃ সুভ্বে৩ গর্ভমাধাৎ ॥৩॥

ন য ঈষন্তে জনুষোঽয়া ন্ব১ন্তঃ সন্তোঽবদ্যানি পুনানাঃ ।
নির্যদ্দুহ্রে শুচয়োঽনু জোষমনু শ্রিয়া তন্বমুক্ষমাণাঃ ॥৪॥

মক্ষূ ন যেষু দোহসে চিদয়া আ নাম ধৃষ্ণু মারুতং দধানাঃ ।
ন যে স্তৌনা অয়াসো মহ্না নূ চিত্সুদানুরব যাসদুগ্রান্ ॥৫॥

ত ইদুগ্রাঃ শবসা ধৃষ্ণুষেণা উভে যুজন্ত রোদসী সুমেকে ।
অধ স্মৈষু রোদসী স্বশোচিরামবত্সু তস্থৌ ন রোকঃ ॥৬॥

অনেনো বো মরুতো যামো অস্ত্বনশ্বশ্চিদ্যমজত্যরথীঃ ।
অনবসো অনভীশূ রজস্তূর্বি রোদসী পথ্যা যাতি সাধন্ ॥৭॥

নাস্য বর্তা ন তরুতা ন্বস্তি মরুতো যমবথ বাজসাতৌ ।
তোকে বা গোষু তনয়ে যমপ্সু স ব্রজং দর্তা পার্যে অধ দ্যোঃ ॥৮॥

প্র চিত্রমর্কং গৃণতে তুরায় মারুতায় স্বতবসে ভরধ্বম্ ।
যে সহাংসি সহসা সহন্তে রেজতে অগ্নে পৃথিবী মখেভ্যঃ ॥৯॥

ত্বিষীমন্তো অধ্বরস্যেব দিদ্যুত্তৃষুচ্যবসো জুহ্বো৩ নাগ্নেঃ ।
অর্চত্রয়ো ধুনয়ো ন বীরা ভ্রাজজ্জন্মানো মরুতো অধৃষ্টাঃ ॥১০॥

তং বৃধন্তং মারুতং ভ্রাজদৃষ্টিং রুদ্রস্য সূনুং হবসা বিবাসে ।
দিবঃ শর্ধায় শুচয়ো মনীষা গিরয়ো নাপ উগ্রা অস্পৃধ্রন্ ॥১১॥