Sukta 65

65.1

6 barhaspatyo bharadvajah, ushah, trishtup

ए॒षा स्या नो॑ दुहि॒ता दि॑वो॒जाः क्षि॒तीरु॒च्छन्ती॒ मानु॑षीरजीगः ।
या भा॒नुना॒ रुश॑ता रा॒म्यास्वज्ञा॑यि ति॒रस्तम॑सश्चिद॒क्तून् ॥१॥

Esha sya no duhita divojah kshitiruchchhanti manushirajigah
Ya bhanuna rushata ramyasvagyayi tirastamasashchidaktun

वि तद्य॑युररुण॒युग्भि॒रश्वै॑श्चि॒त्रं भा॑न्त्यु॒षस॑श्च॒न्द्रर॑थाः ।
अग्रं॑ य॒ज्ञस्य॑ बृह॒तो नय॑न्ती॒र्वि ता बा॑धन्ते॒ तम॒ ऊर्म्या॑याः ॥२॥

Vi tadyayurarunayugbhirashvaishchitram bhantyushasashchandrarathah
Agram yagyasya brihato nayantirvi ta badhante tama urmyayah

श्रवो॒ वाज॒मिष॒मूर्जं॒ वह॑न्ती॒र्नि दा॒शुष॑ उषसो॒ मर्त्या॑य ।
म॒घोनी॑र्वी॒रव॒त्पत्य॑माना॒ अवो॑ धात विध॒ते रत्न॑म॒द्य ॥३॥

Shravo vajamishamurjam vahantirni dashusha ushaso martyaya
Maghonirviravatpatyamana avo dhata vidhate ratnamadya

इ॒दा हि वो॑ विध॒ते रत्न॒मस्ती॒दा वी॒राय॑ दा॒शुष॑ उषासः ।
इ॒दा विप्रा॑य॒ जर॑ते॒ यदु॒क्था नि ष्म॒ माव॑ते वहथा पु॒रा चि॑त् ॥४॥

Ida hi vo vidhate ratnamastida viraya dashusha ushasah
Ida vipraya jarate yaduktha ni shma mavate vahatha pura chit

इ॒दा हि त॑ उषो अद्रिसानो गो॒त्रा गवा॒मङ्गि॑रसो गृ॒णन्ति॑ ।
व्य१र्केण॑ बिभिदु॒र्ब्रह्म॑णा च स॒त्या नृ॒णाम॑भवद्दे॒वहू॑तिः ॥५॥

Ida hi ta usho adrisano gotra gavamangiraso grinanti
Vya1rkena bibhidurbrahmana cha satya nrinamabhavaddevahutih

उ॒च्छा दि॑वो दुहितः प्रत्न॒वन्नो॑ भरद्वाज॒वद्वि॑ध॒ते म॑घोनि ।
सु॒वीरं॑ र॒यिं गृ॑ण॒ते रि॑रीह्युरुगा॒यमधि॑ धेहि॒ श्रवो॑ नः ॥६॥

Uchchha divo duhitah pratnavanno bharadvajavadvidhate maghoni
Suviram rayim grinate ririhyurugayamadhi dhehi shravo nah