সূক্ত 47

47.1

৩১ গর্গো ভারদ্বাজঃ । ইংদ্রঃ, ১–৫ সোমঃ, ২০ দেব–ভূমি-বৃহস্পতীন্দ্রা,২২- ২৫ সার্ঞ্জয়ঃ প্রস্তোকঃ [ দানস্তুতিঃ ], ২৬–২৮ রথঃ, ২৯ -৩০ দুংদুভিঃ, ৩১ দুংদুভীন্দ্রৌ । ত্রিষ্টুপ্ ; ১৯ বৃহতী, ২৩ অনুষ্টুপ্ , ২৪ গায়ত্রী , ২৫ দ্বিপদা ত্রিষ্টুপ্ , ২৭ জগতী ।

স্বাদুষ্কিলায়ং মধুমাঁ উতায়ং তীব্রঃ কিলায়ং রসবাঁ উতায়ম্ ।
উতো ন্ব১স্য পপিবাংসমিন্দ্রং ন কশ্চন সহত আহবেষু ॥১॥

47.2

অয়ং স্বাদুরিহ মদিষ্ঠ আস যস্যেন্দ্রো বৃত্রহত্যে মমাদ ।
পুরূণি যশ্চ্যৌত্না শম্বরস্য বি নবতিং নব চ দেহ্যো৩ হন্ ॥২॥

47.3

অয়ং মে পীত উদিয়র্তি বাচময়ং মনীষামুশতীমজীগঃ ।
অয়ং ষলুর্বীরমিমীত ধীরো ন যাভ্যো ভুবনং কচ্চনারে ॥৩॥

47.4

অয়ং স যো বরিমাণং পৃথিব্যা বর্ষ্মাণং দিবো অকৃণোদয়ং সঃ ।
অয়ং পীয়ূষং তিসৃষু প্রবত্সু সোমো দাধারোর্ব১ন্তরিক্ষম্ ॥৪॥

47.5

অয়ং বিদচ্চিত্রদৃশীকমর্ণঃ শুক্রসদ্মনামুষসামনীকে ।
অয়ং মহান্মহতা স্কম্ভনেনোদ্দ্যামস্তভ্নাদ্বৃষভো মরুত্বান্ ॥৫॥

47.6

ধৃষত্পিব কলশে সোমমিন্দ্র বৃত্রহা শূর সমরে বসূনাম্ ।
মাধ্যংদিনে সবন আ বৃষস্ব রয়িস্থানো রয়িমস্মাসু ধেহি ॥৬॥

47.7

ইন্দ্র প্র ণঃ পুরএতেব পশ্য প্র নো নয় প্রতরং বস্যো অচ্ছ ।
ভবা সুপারো অতিপারয়ো নো ভবা সুনীতিরুত বামনীতিঃ ॥৭॥

47.8

উরুং নো লোকমনু নেষি বিদ্বান্ত্স্বর্বজ্জ্যোতিরভয়ং স্বস্তি ।
ঋষ্বা ত ইন্দ্র স্থবিরস্য বাহূ উপ স্থেয়াম শরণা বৃহন্তা ॥৮॥

47.9

বরিষ্ঠে ন ইন্দ্র বন্ধুরে ধা বহিষ্ঠয়োঃ শতাবন্নশ্বয়োরা ।
ইষমা বক্ষীষাং বর্ষিষ্ঠাং মা নস্তারীন্মঘবন্রায়ো অর্যঃ ॥৯॥

47.10

ইন্দ্র মৃল মহ্যং জীবাতুমিচ্ছ চোদয় ধিয়ময়সো ন ধারাম্ ।
যত্কিং চাহং ত্বায়ুরিদং বদামি তজ্জুষস্ব কৃধি মা দেববন্তম্ ॥১০॥

47.11

ত্রাতারমিন্দ্রমবিতারমিন্দ্রং হবেহবে সুহবং শূরমিন্দ্রম্ ।
হ্বয়ামি শক্রং পুরুহূতমিন্দ্রং স্বস্তি নো মঘবা ধাত্বিন্দ্রঃ ॥১১॥

47.12

ইন্দ্রঃ সুত্রামা স্ববাঁ অবোভিঃ সুমৃলীকো ভবতু বিশ্ববেদাঃ ।
বাধতাং দ্বেষো অভয়ং কৃণোতু সুবীর্যস্য পতয়ঃ স্যাম ॥১২॥

47.13

তস্য বয়ং সুমতৌ যজ্ঞিয়স্যাঽপি ভদ্রে সৌমনসে স্যাম ।
স সুত্রামা স্ববাঁ ইন্দ্রো অস্মে আরাচ্চিদ্দ্বেষঃ সনুতর্যুয়োতু ॥১৩॥

47.14

অব ত্বে ইন্দ্র প্রবতো নোর্মির্গিরো ব্রহ্মাণি নিয়ুতো ধবন্তে ।
উরূ ন রাধঃ সবনা পুরূণ্যপো গা বজ্রিন্যুবসে সমিন্দূন্ ॥১৪॥

47.15

ক ঈং স্তবত্কঃ পৃণাত্কো যজাতে যদুগ্রমিন্মঘবা বিশ্বহাবেৎ ।
পাদাবিব প্রহরন্নন্যমন্যং কৃণোতি পূর্বমপরং শচীভিঃ ॥১৫॥

47.16

শৃণ্বে বীর উগ্রমুগ্রং দমায়ন্নন্যমন্যমতিনেনীয়মানঃ ।
এধমানদ্বিলুভয়স্য রাজা চোষ্কূয়তে বিশ ইন্দ্রো মনুষ্যান্ ॥১৬॥

47.17

পরা পূর্বেষাং সখ্যা বৃণক্তি বিতর্তুরাণো অপরেভিরেতি ।
অনানুভূতীরবধূন্বানঃ পূর্বীরিন্দ্রঃ শরদস্তর্তরীতি ॥১৭॥

47.18

রূপংরূপং প্রতিরূপো বভূব তদস্য রূপং প্রতিচক্ষণায় ।
ইন্দ্রো মায়াভিঃ পুরুরূপ ঈয়তে যুক্তা হ্যস্য হরয়ঃ শতা দশ ॥১৮॥

47.19

যুজানো হরিতা রথে ভূরি ত্বষ্টেহ রাজতি ।
কো বিশ্বাহা দ্বিষতঃ পক্ষ আসত উতাসীনেষু সূরিষু ॥১৯॥

47.20

অগব্যূতি ক্ষেত্রমাগন্ম দেবা উর্বী সতী ভূমিরংহূরণাভূৎ ।
বৃহস্পতে প্র চিকিত্সা গবিষ্টাবিত্থা সতে জরিত্র ইন্দ্র পন্থাম্ ॥২০॥

47.21

দিবেদিবে সদৃশীরন্যমর্ধং কৃষ্ণা অসেধদপ সদ্মনো জাঃ ।
অহন্দাসা বৃষভো বস্নয়ন্তোদব্রজে বর্চিনং শম্বরং চ ॥২১॥

47.22

প্রস্তোক ইন্নু রাধসস্ত ইন্দ্র দশ কোশয়ীর্দশ বাজিনোঽদাৎ ।
দিবোদাসাদতিথিগ্বস্য রাধঃ শাম্বরং বসু প্রত্যগ্রভীষ্ম ॥২২॥

47.23

দশাশ্বান্দশ কোশান্দশ বস্ত্রাধিভোজনা । দশো হিরণ্যপিণ্ডান্দিবোদাসাদসানিষম্ ॥২৩॥

47.24

দশ রথান্প্রষ্টিমতঃ শতং গা অথর্বভ্যঃ । অশ্বথঃ পায়বেঽদাৎ ॥২৪॥

47.25

মহি রাধো বিশ্বজন্যং দধানান্ভরদ্বাজান্ত্সার্ঞ্জয়ো অভ্যয়ষ্ট ॥২৫॥

47.26

বনস্পতে বীড্বঙ্গো হি ভূয়া অস্মত্সখা প্রতরণঃ সুবীরঃ ।
গোভিঃ সনদ্ধো অসি বীলয়স্বাঽঽস্থাতা তে জয়তু জেত্বানি ॥২৬॥

47.27

দিবস্পৃথিব্যাঃ পর্যোজ উদ্ভৃতং বনস্পতিভ্যঃ পর্যাভৃতং সহঃ ।
অপামোজ্মানং পরি গোভিরাবৃতমিন্দ্রস্য বজ্রং হবিষা রথং যজ ॥২৭॥

47.28

ইন্দ্রস্য বজ্রো মরুতামনীকং মিত্রস্য গর্ভো বরুণস্য নাভিঃ ।
সেমাং নো হব্যদাতিং জুষাণো দেব রথ প্রতি হব্যা গৃভায় ॥২৮॥

47.29

উপ শ্বাসয় পৃথিবীমুত দ্যাং পুরুত্রা তে মনুতাং বিষ্ঠিতং জগৎ ।
স দুন্দুভে সজূরিন্দ্রেণ দেবৈর্দূরাদ্দবীয়ো অপ সেধ শত্রূন্ ॥২৯॥

47.30

আ ক্রন্দয় বলমোজো ন আ ধা নিঃ ষ্টনিহি দুরিতা বাধমানঃ ।
অপ প্রোথ দুন্দুভে দুচ্ছুনা ইত ইন্দ্রস্য মুষ্টিরসি বীলয়স্ব ॥৩০॥

47.31

আমূরজ প্রত্যাবর্তয়েমাঃ কেতুমদ্দুন্দুভির্বাবদীতি ।
সমশ্বপর্ণাশ্চরন্তি নো নরোঽস্মাকমিন্দ্র রথিনো জয়ন্তু ॥৩১॥