Sukta 47

47.1

31 gargo bharadvajah, indrah, 1–5 somah, 20 deva–bhumi-brihaspatindra, 22- 25 sarnjayah prastokah [ danastutih ], 26–28 rathah, 29 -30 dundubhih, 31 dundubhindrau, trishtup ; 19 brihati, 23 anushtup, 24 gayatri, 25 dvipada trishtup, 27 jagati

स्वा॒दुष्किला॒यं मधु॑माँ उ॒तायं ती॒व्रः किला॒यं रस॑वाँ उ॒तायम् ।
उ॒तो न्व१स्य प॑पि॒वांस॒मिन्द्रं॒ न कश्च॒न स॑हत आह॒वेषु॑ ॥१॥

Svadushkilayam madhumam utayam tivrah kilayam rasavam utayam
Uto nva1sya papivansamindram na kashchana sahata ahaveshu

47.2

अ॒यं स्वा॒दुरि॒ह मदि॑ष्ठ आस॒ यस्येन्द्रो॑ वृत्र॒हत्ये॑ म॒माद॑ ।
पु॒रूणि॒ यश्च्यौ॒त्ना शम्ब॑रस्य॒ वि न॑व॒तिं नव॑ च दे॒ह्यो॒३ हन् ॥२॥

Ayam svaduriha madishtha asa yasyendro vritrahatye mamada
Puruni yashchyautna shambarasya vi navatim nava cha dehyo3 han

47.3

अ॒यं मे॑ पी॒त उदि॑यर्ति॒ वाच॑म॒यं म॑नी॒षामु॑श॒तीम॑जीगः ।
अ॒यं षळु॒र्वीर॑मिमीत॒ धीरो॒ न याभ्यो॒ भुव॑नं॒ कच्च॒नारे ॥३॥

Ayam me pita udiyarti vachamayam manishamushatimajigah
Ayam shalurviramimita dhiro na yabhyo bhuvanam kachchanare

47.4

अ॒यं स यो व॑रि॒माणं॑ पृथि॒व्या व॒र्ष्माणं॑ दि॒वो अकृ॑णोद॒यं सः ।
अ॒यं पी॒यूषं॑ ति॒सृषु॑ प्र॒वत्सु॒ सोमो॑ दाधारो॒र्व१न्तरि॑क्षम् ॥४॥

Ayam sa yo varimanam prithivya varshmanam divo akrinodayam sah
Ayam piyusham tisrishu pravatsu somo dadharorva1ntariksham

47.5

अ॒यं वि॑दच्चित्र॒दृशी॑क॒मर्ण॑ः शु॒क्रस॑द्मनामु॒षसा॒मनी॑के ।
अ॒यं म॒हान्म॑ह॒ता स्कम्भ॑ने॒नोद्द्याम॑स्तभ्नाद्वृष॒भो म॒रुत्वा॑न् ॥५॥

Ayam vidachchitradrishikamarnah shukrasadmanamushasamanike
Ayam mahanmahata skambhanenoddyamastabhnadvrishabho marutvan

47.6

धृ॒षत्पि॑ब क॒लशे॒ सोम॑मिन्द्र वृत्र॒हा शू॑र सम॒रे वसू॑नाम् ।
माध्यं॑दिने॒ सव॑न॒ आ वृ॑षस्व रयि॒स्थानो॑ र॒यिम॒स्मासु॑ धेहि ॥६॥

Dhrishatpiba kalashe somamindra vritraha shura samare vasunam
Madhyandine savana a vrishasva rayisthano rayimasmasu dhehi

47.7

इन्द्र॒ प्र ण॑ः पुरए॒तेव॑ पश्य॒ प्र नो॑ नय प्रत॒रं वस्यो॒ अच्छ॑ ।
भवा॑ सुपा॒रो अ॑तिपार॒यो नो॒ भवा॒ सुनी॑तिरु॒त वा॒मनी॑तिः ॥७॥

Indra pra nah puraeteva pashya pra no naya prataram vasyo achchha
Bhava suparo atiparayo no bhava sunitiruta vamanitih

47.8

उ॒रुं नो॑ लो॒कमनु॑ नेषि वि॒द्वान्त्स्व॑र्व॒ज्ज्योति॒रभ॑यं स्व॒स्ति ।
ऋ॒ष्वा त॑ इन्द्र॒ स्थवि॑रस्य बा॒हू उप॑ स्थेयाम शर॒णा बृ॒हन्ता॑ ॥८॥

Urum no lokamanu neshi vidvantsvarvajjyotirabhayam svasti
Rishva ta indra sthavirasya bahu upa stheyama sharana brihanta

47.9

वरि॑ष्ठे न इन्द्र व॒न्धुरे॑ धा॒ वहि॑ष्ठयोः शताव॒न्नश्व॑यो॒रा ।
इष॒मा व॑क्षी॒षां वर्षि॑ष्ठां॒ मा न॑स्तारीन्मघव॒न्रायो॑ अ॒र्यः ॥९॥

Varishthe na indra vandhure dha vahishthayoh shatavannashvayora
Ishama vakshisham varshishtham ma nastarinmaghavanrayo aryah

47.10

इन्द्र॑ मृ॒ळ मह्यं॑ जी॒वातु॑मिच्छ चो॒दय॒ धिय॒मय॑सो॒ न धारा॑म् ।
यत्किं चा॒हं त्वा॒युरि॒दं वदा॑मि॒ तज्जु॑षस्व कृ॒धि मा॑ दे॒वव॑न्तम् ॥१०॥

Indra mrila mahyam jivatumichchha chodaya dhiyamayaso na dharam
Yatkim chaham tvayuridam vadami tajjushasva kridhi ma devavantam

47.11

त्रा॒तार॒मिन्द्र॑मवि॒तार॒मिन्द्रं॒ हवे॑हवे सु॒हवं॒ शूर॒मिन्द्र॑म् ।
ह्वया॑मि श॒क्रं पु॑रुहू॒तमिन्द्रं॑ स्व॒स्ति नो॑ म॒घवा॑ धा॒त्विन्द्र॑ः ॥११॥

Trataramindramavitaramindram havehave suhavam shuramindram
Hvayami shakram puruhutamindram svasti no maghava dhatvindrah

47.12

इन्द्र॑ः सु॒त्रामा॒ स्ववाँ॒ अवो॑भिः सुमृळी॒को भ॑वतु वि॒श्ववे॑दाः ।
बाध॑तां॒ द्वेषो॒ अभ॑यं कृणोतु सु॒वीर्य॑स्य॒ पत॑यः स्याम ॥१२॥

Indrah sutrama svavam avobhih sumriliko bhavatu vishvavedah
Badhatam dvesho abhayam krinotu suviryasya patayah syama

47.13

तस्य॑ व॒यं सु॑म॒तौ य॒ज्ञिय॒स्याऽपि॑ भ॒द्रे सौ॑मन॒से स्या॑म ।
स सु॒त्रामा॒ स्ववाँ॒ इन्द्रो॑ अ॒स्मे आ॒राच्चि॒द्द्वेष॑ः सनु॒तर्यु॑योतु ॥१३॥

Tasya vayam sumatau yagyiyasyapi bhadre saumanase syama
Sa sutrama svavam indro asme arachchiddveshah sanutaryuyotu

47.14

अव॒ त्वे इ॑न्द्र प्र॒वतो॒ नोर्मिर्गिरो॒ ब्रह्मा॑णि नि॒युतो॑ धवन्ते ।
उ॒रू न राध॒ः सव॑ना पु॒रूण्य॒पो गा व॑ज्रिन्युवसे॒ समिन्दू॑न् ॥१४॥

Ava tve indra pravato normirgiro brahmani niyuto dhavante
Uru na radhah savana purunyapo ga vajrinyuvase samindun

47.15

क ईं॑ स्तव॒त्कः पृ॑णा॒त्को य॑जाते॒ यदु॒ग्रमिन्म॒घवा॑ वि॒श्वहावे॑त् ।
पादा॑विव प्र॒हर॑न्न॒न्यम॑न्यं कृ॒णोति॒ पूर्व॒मप॑रं॒ शची॑भिः ॥१५॥

Ka im stavatkah prinatko yajate yadugraminmaghava vishvahavet
Padaviva praharannanyamanyam krinoti purvamaparam shachibhih

47.16

शृ॒ण्वे वी॒र उ॒ग्रमु॑ग्रं दमा॒यन्न॒न्यम॑न्यमतिनेनी॒यमा॑नः ।
ए॒ध॒मा॒न॒द्विळु॒भय॑स्य॒ राजा॑ चोष्कू॒यते॒ विश॒ इन्द्रो॑ मनु॒ष्या॑न् ॥१६॥

Shrinve vira ugramugram damayannanyamanyamatineniyamanah
Edhamanadvilubhayasya raja choshkuyate visha indro manushyan

47.17

परा॒ पूर्वे॑षां स॒ख्या वृ॑णक्ति वि॒तर्तु॑राणो॒ अप॑रेभिरेति ।
अना॑नुभूतीरवधून्वा॒नः पू॒र्वीरिन्द्र॑ः श॒रद॑स्तर्तरीति ॥१७॥

Para purvesham sakhya vrinakti vitarturano aparebhireti
Ananubhutiravadhunvanah purvirindrah sharadastartariti

47.18

रू॒पंरू॑पं॒ प्रति॑रूपो बभूव॒ तद॑स्य रू॒पं प्र॑ति॒चक्ष॑णाय ।
इन्द्रो॑ मा॒याभि॑ः पुरु॒रूप॑ ईयते यु॒क्ता ह्य॑स्य॒ हर॑यः श॒ता दश॑ ॥१८॥

Rupanrupam pratirupo babhuva tadasya rupam pratichakshanaya
Indro mayabhih pururupa iyate yukta hyasya harayah shata dasha

47.19

यु॒जा॒नो ह॒रिता॒ रथे॒ भूरि॒ त्वष्टे॒ह रा॑जति ।
को वि॒श्वाहा॑ द्विष॒तः पक्ष॑ आसत उ॒तासी॑नेषु सू॒रिषु॑ ॥१९॥

Yujano harita rathe bhuri tvashteha rajati
Ko vishvaha dvishatah paksha asata utasineshu surishu

47.20

अ॒ग॒व्यू॒ति क्षेत्र॒माग॑न्म देवा उ॒र्वी स॒ती भूमि॑रंहूर॒णाभू॑त् ।
बृह॑स्पते॒ प्र चि॑कित्सा॒ गवि॑ष्टावि॒त्था स॒ते ज॑रि॒त्र इ॑न्द्र॒ पन्था॑म् ॥२०॥

Agavyuti kshetramaganma deva urvi sati bhumiranhuranabhut
Brihaspate pra chikitsa gavishtavittha sate jaritra indra pantham

47.21

दि॒वेदि॑वे स॒दृशी॑र॒न्यमर्धं॑ कृ॒ष्णा अ॑सेध॒दप॒ सद्म॑नो॒ जाः ।
अह॑न्दा॒सा वृ॑ष॒भो व॑स्न॒यन्तो॒दव्र॑जे व॒र्चिनं॒ शम्ब॑रं च ॥२१॥

Divedive sadrishiranyamardham krishna asedhadapa sadmano jah
Ahandasa vrishabho vasnayantodavraje varchinam shambaram cha

47.22

प्र॒स्तो॒क इन्नु राध॑सस्त इन्द्र॒ दश॒ कोश॑यी॒र्दश॑ वा॒जिनो॑ऽदात् ।
दिवो॑दासादतिथि॒ग्वस्य॒ राध॑ः शाम्ब॒रं वसु॒ प्रत्य॑ग्रभीष्म ॥२२॥

Prastoka innu radhasasta indra dasha koshayirdasha vajinodat
Divodasadatithigvasya radhah shambaram vasu pratyagrabhishma

47.23

दशाश्वा॒न्दश॒ कोशा॒न्दश॒ वस्त्राधि॑भोजना । दशो॑ हिरण्यपि॒ण्डान्दिवो॑दासादसानिषम् ॥२३॥

Dashashvandasha koshandasha vastradhibhojana, dasho hiranyapindandivodasadasanisham

47.24

दश॒ रथा॒न्प्रष्टि॑मतः श॒तं गा अथ॑र्वभ्यः । अ॒श्व॒थः पा॒यवे॑ऽदात् ॥२४॥

Dasha rathanprashtimatah shatam ga atharvabhyah, ashvathah payavedat

47.25

महि॒ राधो॑ वि॒श्वज॑न्यं॒ दधा॑नान्भ॒रद्वा॑जान्त्सार्ञ्ज॒यो अ॒भ्य॑यष्ट ॥२५॥

Mahi radho vishvajanyam dadhananbharadvajantsarnjayo abhyayashta

47.26

वन॑स्पते वी॒ड्व॑ङ्गो॒ हि भू॒या अ॒स्मत्स॑खा प्र॒तर॑णः सु॒वीर॑ः ।
गोभि॒ः सन॑द्धो असि वी॒ळय॑स्वाऽऽस्था॒ता ते॑ जयतु॒ जेत्वा॑नि ॥२६॥

Vanaspate vidvango hi bhuya asmatsakha prataranah suvirah
Gobhih sanaddho asi vilayasvasthata te jayatu jetvani

47.27

दि॒वस्पृ॑थि॒व्याः पर्योज॒ उद्भृ॑तं॒ वन॒स्पति॑भ्य॒ः पर्याभृ॑तं॒ सह॑ः ।
अ॒पामो॒ज्मानं॒ परि॒ गोभि॒रावृ॑त॒मिन्द्र॑स्य॒ वज्रं॑ ह॒विषा॒ रथं॑ यज ॥२७॥

Divasprithivyah paryoja udbhritam vanaspatibhyah paryabhritam sahah
Apamojmanam pari gobhiravritamindrasya vajram havisha ratham yaja

47.28

इन्द्र॑स्य॒ वज्रो॑ म॒रुता॒मनी॑कं मि॒त्रस्य॒ गर्भो॒ वरु॑णस्य॒ नाभि॑ः ।
सेमां नो॑ ह॒व्यदा॑तिं जुषा॒णो देव॑ रथ॒ प्रति॑ ह॒व्या गृ॑भाय ॥२८॥

Indrasya vajro marutamanikam mitrasya garbho varunasya nabhih
Semam no havyadatim jushano deva ratha prati havya gribhaya

47.29

उप॑ श्वासय पृथि॒वीमु॒त द्यां पु॑रु॒त्रा ते॑ मनुतां॒ विष्ठि॑तं॒ जग॑त् ।
स दु॑न्दुभे स॒जूरिन्द्रे॑ण दे॒वैर्दू॒राद्दवी॑यो॒ अप॑ सेध॒ शत्रू॑न् ॥२९॥

Upa shvasaya prithivimuta dyam purutra te manutam vishthitam jagat
Sa dundubhe sajurindrena devairduraddaviyo apa sedha shatrun

47.30

आ क्र॑न्दय॒ बल॒मोजो॑ न॒ आ धा॒ निः ष्ट॑निहि दुरि॒ता बाध॑मानः ।
अप॑ प्रोथ दुन्दुभे दु॒च्छुना॑ इ॒त इन्द्र॑स्य मु॒ष्टिर॑सि वी॒ळय॑स्व ॥३०॥

A krandaya balamojo na a dha nih shtanihi durita badhamanah
Apa protha dundubhe duchchhuna ita indrasya mushtirasi vilayasva

47.31

आमूर॑ज प्र॒त्याव॑र्तये॒माः के॑तु॒मद्दु॑न्दु॒भिर्वा॑वदीति ।
समश्व॑पर्णा॒श्चर॑न्ति नो॒ नरो॒ऽस्माक॑मिन्द्र र॒थिनो॑ जयन्तु ॥३१॥

Amuraja pratyavartayemah ketumaddundubhirvavaditi
Samashvaparnashcharanti no narosmakamindra rathino jayantu