Sukta 46

46.1

14 shanyurbarhaspatyah, indrah pragathah [= vishama brihati, sama satobrihati ]

त्वामिद्धि हवा॑महे सा॒ता वाज॑स्य का॒रव॑ः ।
त्वां वृ॒त्रेष्वि॑न्द्र॒ सत्प॑तिं॒ नर॒स्त्वां काष्ठा॒स्वर्व॑तः ॥१॥

Tvamiddhi havamahe sata vajasya karavah
Tvam vritreshvindra satpatim narastvam kashthasvarvatah

स त्वं न॑श्चित्र वज्रहस्त धृष्णु॒या म॒हः स्त॑वा॒नो अ॑द्रिवः ।
गामश्वं॑ र॒थ्य॑मिन्द्र॒ सं कि॑र स॒त्रा वाजं॒ न जि॒ग्युषे॑ ॥२॥

Sa tvam nashchitra vajrahasta dhrishnuya mahah stavano adrivah
Gamashvam rathyamindra sam kira satra vajam na jigyushe

यः स॑त्रा॒हा विच॑र्षणि॒रिन्द्रं॒ तं हू॑महे व॒यम् ।
सह॑स्रमुष्क॒ तुवि॑नृम्ण॒ सत्प॑ते॒ भवा॑ स॒मत्सु॑ नो वृ॒धे ॥३॥

Yah satraha vicharshanirindram tam humahe vayam
Sahasramushka tuvinrimna satpate bhava samatsu no vridhe

बाध॑से॒ जना॑न्वृष॒भेव॑ म॒न्युना॒ घृषौ॑ मी॒ळ्ह ऋ॑चीषम ।
अ॒स्माकं॑ बोध्यवि॒ता म॑हाध॒ने त॒नूष्व॒प्सु सूर्ये॑ ॥४॥

Badhase jananvrishabheva manyuna ghrishau milha richishama
Asmakam bodhyavita mahadhane tanushvapsu surye

इन्द्र॒ ज्येष्ठं॑ न॒ आ भ॑रँ॒ ओजि॑ष्ठं॒ पपु॑रि॒ श्रव॑ः ।
येने॒मे चि॑त्र वज्रहस्त॒ रोद॑सी॒ ओभे सु॑शिप्र॒ प्राः ॥५॥

Indra jyeshtham na a bharam ojishtham papuri shravah
Yeneme chitra vajrahasta rodasi obhe sushipra prah

त्वामु॒ग्रमव॑से चर्षणी॒सहं॒ राज॑न्दे॒वेषु॑ हूमहे ।
विश्वा॒ सु नो॑ विथु॒रा पि॑ब्द॒ना व॑सो॒ऽमित्रा॑न्त्सु॒षहा॑न्कृधि ॥६॥

Tvamugramavase charshanisaham rajandeveshu humahe
Vishva su no vithura pibdana vasomitrantsushahankridhi

यदि॑न्द्र॒ नाहु॑षी॒ष्वाँ ओजो॑ नृ॒म्णं च॑ कृ॒ष्टिषु॑ ।
यद्वा॒ पञ्च॑ क्षिती॒नां द्यु॒म्नमा भ॑र स॒त्रा विश्वा॑नि॒ पौंस्या॑ ॥७॥

Yadindra nahushishvam ojo nrimnam cha krishtishu
Yadva pancha kshitinam dyumnama bhara satra vishvani paunsya

यद्वा॑ तृ॒क्षौ म॑घवन्द्रु॒ह्यावा जने॒ यत्पू॒रौ कच्च॒ वृष्ण्य॑म् ।
अ॒स्मभ्यं॒ तद्रि॑रीहि॒ सं नृ॒षाह्ये॒ऽमित्रा॑न्पृ॒त्सु तु॒र्वणे॑ ॥८॥

Yadva trikshau maghavandruhyava jane yatpurau kachcha vrishnyam
Asmabhyam tadririhi sam nrishahyemitranpritsu turvane

इन्द्र॑ त्रि॒धातु॑ शर॒णं त्रि॒वरू॑थं स्वस्ति॒मत् ।
छ॒र्दिर्य॑च्छ म॒घव॑द्भ्यश्च॒ मह्यं॑ च या॒वया॑ दि॒द्युमे॑भ्यः ॥९॥

Indra tridhatu sharanam trivarutham svastimat
Chhardiryachchha maghavadbhyashcha mahyam cha yavaya didyumebhyah

ये ग॑व्य॒ता मन॑सा॒ शत्रु॑माद॒भुर॑भिप्र॒घ्नन्ति॑ धृष्णु॒या ।
अध॑ स्मा नो मघवन्निन्द्र गिर्वणस्तनू॒पा अन्त॑मो भव ॥१०॥

Ye gavyata manasa shatrumadabhurabhipraghnanti dhrishnuya
Adha sma no maghavannindra girvanastanupa antamo bhava

अध॑ स्मा नो वृ॒धे भ॒वेन्द्र॑ ना॒यम॑वा यु॒धि ।
यद॒न्तरि॑क्षे प॒तय॑न्ति प॒र्णिनो॑ दि॒द्यव॑स्ति॒ग्ममू॑र्धानः ॥११॥

Adha sma no vridhe bhavendra nayamava yudhi
Yadantarikshe patayanti parnino didyavastigmamurdhanah

यत्र॒ शूरा॑सस्त॒न्वो॑ वितन्व॒ते प्रि॒या शर्म॑ पितॄ॒णाम् ।
अध॑ स्मा यच्छ त॒न्वे॒३ तने॑ च छ॒र्दिर॒चित्तं॑ या॒वय॒ द्वेष॑ः ॥१२॥

Yatra shurasastanvo vitanvate priya sharma pitrinam
Adha sma yachchha tanve3 tane cha chhardirachittam yavaya dveshah

यदि॑न्द्र॒ सर्गे॒ अर्व॑तश्चो॒दया॑से महाध॒ने ।
अ॒स॒म॒ने अध्व॑नि वृजि॒ने प॒थि श्ये॒नाँ इ॑व श्रवस्य॒तः ॥१३॥

Yadindra sarge arvatashchodayase mahadhane
Asamane adhvani vrijine pathi shyenam iva shravasyatah

सिन्धूँ॑रिव प्रव॒ण आ॑शु॒या य॒तो यदि॒ क्लोश॒मनु॒ ष्वणि॑ ।
आ ये वयो॒ न वर्वृ॑त॒त्यामि॑षि गृभी॒ता बा॒ह्वोर्गवि॑ ॥१४॥

Sindhunriva pravana ashuya yato yadi kloshamanu shvani
A ye vayo na varvritatyamishi gribhita bahvorgavi