সূক্ত 48

48.1

২২ শংয়ুর্বার্হস্পত্যঃ [তৃণপাণিঃ] ।১-১০অগ্নিঃ; ১১- ১৫, ২০ – ২১ মরুতঃ [ ১৩-১৫ লিংগোক্তা বা ], ১৬-১৯ পূষা, ২২ দ্যাবাভূমী বা পৃশ্নির্বা । প্রগাথঃ; =[ ১,৩ বৃহতী; ২, ৪ সতোবৃহতী; ৫ বৃহতী, ৬ মহাসতোবৃহতী; ৭ মহাবৃহতী, ৮ মহাসতোবৃহতী; ৯ বৃহতী, ১০ সতোবৃহতী; ১১ ককুপ্ , ১২ সতোবৃহতী ], ১৩ পুরউষ্ণিক্ ,১৪ বৃহতী, ১৫ অতিজগতী, ১৬ ককুপ্ , ১৭ সতোবৃহতী, ১৮ পুরউষ্ণিক্, ১৯-২০ বৃহতী , ২১ মহাবৃহতী যবমধ্যা, ২২ অনুষ্টুপ্ ।

যজ্ঞায়জ্ঞা বো অগ্নয়ে গিরাগিরা চ দক্ষসে । প্রপ্র বয়মমৃতং জাতবেদসং প্রিয়ং মিত্রং ন শংসিষম্ ॥১॥

48.2

ঊর্জো নপাতং স হিনায়মস্ময়ুর্দাশেম হব্যদাতয়ে । ভুবদ্বাজেষ্ববিতা ভুবদ্বৃধ উত ত্রাতা তনূনাম্ ॥২॥

48.3

বৃষা হ্যগ্নে অজরো মহান্বিভাস্যর্চিষা । অজস্রেণ শোচিষা শোশুচচ্ছুচে সুদীতিভিঃ সু দীদিহি ॥৩॥

48.4

মহো দেবান্যজসি যক্ষ্যানুষক্তব ক্রত্বোত দংসনা । অর্বাচঃ সীং কৃণুহ্যগ্নেঽবসে রাস্ব বাজোত বংস্ব ॥৪॥

48.5

যমাপো অদ্রয়ো বনা গর্ভমৃতস্য পিপ্রতি । সহসা যো মথিতো জায়তে নৃভিঃ পৃথিব্যা অধি সানবি ॥৫॥

48.6

আ যঃ পপ্রৌ ভানুনা রোদসী উভে ধূমেন ধাবতে দিবি । তিরস্তমো দদৃশ ঊর্ম্যাস্বা শ্যাবাস্বরুষো বৃষা শ্যাবা অরুষো বৃষা ॥৬॥

48.7

বৃহদ্ভিরগ্নে অর্চিভিঃ শুক্রেণ দেব শোচিষা । ভরদ্বাজে সমিধানো যবিষ্ঠ্য রেবন্নঃ শুক্র দীদিহি দ্যুমত্পাবক দীদিহি ॥৭॥

48.8

বিশ্বাসাং গৃহপতির্বিশামসি ত্বমগ্নে মানুষীণাম্ । শতং পূর্ভির্যবিষ্ঠ পাহ্যংহসঃ সমেদ্ধারং শতং হিমাঃ স্তোতৃভ্যো যে চ দদতি ॥৮॥

48.9

ত্বং নশ্চিত্র ঊত্যা বসো রাধাংসি চোদয় । অস্য রায়স্ত্বমগ্নে রথীরসি বিদা গাধং তুচে তু নঃ ॥৯॥

48.10

পর্ষি তোকং তনয়ং পর্তৃভিষ্ট্বমদব্ধৈরপ্রয়ুত্বভিঃ । অগ্নে হেলাংসি দৈব্যা যুয়োধি নোঽদেবানি হ্বরাংসি চ ॥১০॥

48.11

আ সখায়ঃ সবর্দুঘাং ধেনুমজধ্বমুপ নব্যসা বচঃ । সৃজধ্বমনপস্ফুরাম্ ॥১১॥

48.12

যা শর্ধায় মারুতায় স্বভানবে শ্রবোঽমৃত্যু ধুক্ষত । যা মৃলীকে মরুতাং তুরাণাং যা সুম্নৈরেবয়াবরী ॥১২॥

48.13

ভরদ্বাজায়াব ধুক্ষত দ্বিতা । ধেনুং চ বিশ্বদোহসমিষং চ বিশ্বভোজসম্ ॥১৩॥

48.14

তং ব ইন্দ্রং ন সুক্রতুং বরুণমিব মায়িনম্ । অর্যমণং ন মন্দ্রং সৃপ্রভোজসং বিষ্ণুং ন স্তুষ আদিশে ॥১৪॥

48.15

ত্বেষং শর্ধো ন মারুতং তুবিষ্বণ্যনর্বাণং পূষণং সং যথা শতা । সং সহস্রা কারিষচ্চর্ষণিভ্য আঁ আবির্গূল্হা বসূ করত্সুবেদা নো বসূ করৎ ॥১৫॥

48.16

আ মা পূষন্নুপ দ্রব শংসিষং নু তে অপিকর্ণ আঘৃণে । অঘা অর্যো অরাতয়ঃ ॥১৬॥

48.17

মা কাকম্বীরমুদ্বৃহো বনস্পতিমশস্তীর্বি হি নীনশঃ । মোত সূরো অহ এবা চন গ্রীবা আদধতে বেঃ ॥১৭॥

48.18

দৃতেরিব তেঽবৃকমস্তু সখ্যম্ । অচ্ছিদ্রস্য দধন্বতঃ সুপূর্ণস্য দধন্বতঃ ॥১৮॥

48.19

পরো হি মর্ত্যৈরসি সমো দেবৈরুত শ্রিয়া । অভি খ্যঃ পূষন্পৃতনাসু নস্ত্বমবা নূনং যথা পুরা ॥১৯॥

48.20

বামী বামস্য ধূতয়ঃ প্রণীতিরস্তু সূনৃতা । দেবস্য বা মরুতো মর্ত্যস্য বেজানস্য প্রয়জ্যবঃ ॥২০॥

48.21

সদ্যশ্চিদ্যস্য চর্কৃতিঃ পরি দ্যাং দেবো নৈতি সূর্যঃ । ত্বেষং শবো দধিরে নাম যজ্ঞিয়ং মরুতো বৃত্রহং শবো জ্যেষ্ঠং বৃত্রহং শবঃ ॥২১॥

48.22

সকৃদ্ধ দ্যৌরজায়ত সকৃদ্ভূমিরজায়ত । পৃশ্ন্যা দুগ্ধং সকৃত্পয়স্তদন্যো নানু জায়তে ॥২২॥