সূক্ত 40

40.1

৫ বার্হস্পত্যো ভরদ্বাজঃ । ইন্দ্রঃ । ত্রিষ্টুপ্ ।

ইন্দ্র পিব তুভ্যং সুতো মদায়াঽব স্য হরী বি মুচা সখায়া ।
উত প্র গায় গণ আ নিষদ্যাঽথা যজ্ঞায় গৃণতে বয়ো ধাঃ ॥১॥

40.2

অস্য পিব যস্য জজ্ঞান ইন্দ্র মদায় ক্রত্বে অপিবো বিরপ্শিন্ ।
তমু তে গাবো নর আপো অদ্রিরিন্দুং সমহ্যন্পীতয়ে সমস্মৈ ॥২॥

40.3

সমিদ্ধে অগ্নৌ সুত ইন্দ্র সোম আ ত্বা বহন্তু হরয়ো বহিষ্ঠাঃ ।
ত্বায়তা মনসা জোহবীমীন্দ্রা যাহি সুবিতায় মহে নঃ ॥৩॥

40.4

আ যাহি শশ্বদুশতা যয়াথেন্দ্র মহা মনসা সোমপেয়ম্ ।
উপ ব্রহ্মাণি শৃণব ইমা নোঽথা তে যজ্ঞস্তন্বে৩ বয়ো ধাৎ ॥৪॥

40.5

যদিন্দ্র দিবি পার্যে যদৃধগ্যদ্বা স্বে সদনে যত্র বাসি ।
অতো নো যজ্ঞমবসে নিয়ুত্বান্ত্সজোষাঃ পাহি গির্বণো মরুদ্ভিঃ ॥৫॥