Sukta 40

40.1

5 barhaspatyo bharadvajah, indrah, trishtup

इन्द्र॒ पिब॒ तुभ्यं॑ सु॒तो मदा॒याऽव॑ स्य॒ हरी॒ वि मु॑चा॒ सखा॑या ।
उ॒त प्र गा॑य ग॒ण आ नि॒षद्याऽथा॑ य॒ज्ञाय॑ गृण॒ते वयो॑ धाः ॥१॥

Indra piba tubhyam suto madayava sya hari vi mucha sakhaya
Uta pra gaya gana a nishadyatha yagyaya grinate vayo dhah

40.2

अस्य॑ पिब॒ यस्य॑ जज्ञा॒न इ॑न्द्र॒ मदा॑य॒ क्रत्वे॒ अपि॑बो विरप्शिन् ।
तमु॑ ते॒ गावो॒ नर॒ आपो॒ अद्रि॒रिन्दुं॒ सम॑ह्यन्पी॒तये॒ सम॑स्मै ॥२॥

Asya piba yasya jagyana indra madaya kratve apibo virapshin
Tamu te gavo nara apo adririndum samahyanpitaye samasmai

40.3

समि॑द्धे अ॒ग्नौ सु॒त इ॑न्द्र॒ सोम॒ आ त्वा॑ वहन्तु॒ हर॑यो॒ वहि॑ष्ठाः ।
त्वा॒य॒ता मन॑सा जोहवी॒मीन्द्रा या॑हि सुवि॒ताय॑ म॒हे न॑ः ॥३॥

Samiddhe agnau suta indra soma a tva vahantu harayo vahishthah
Tvayata manasa johavimindra yahi suvitaya mahe nah

40.4

आ या॑हि॒ शश्व॑दुश॒ता य॑या॒थेन्द्र॑ म॒हा मन॑सा सोम॒पेय॑म् ।
उप॒ ब्रह्मा॑णि शृणव इ॒मा नोऽथा॑ ते य॒ज्ञस्त॒न्वे॒३ वयो॑ धात् ॥४॥

A yahi shashvadushata yayathendra maha manasa somapeyam
Upa brahmani shrinava ima notha te yagyastanve3 vayo dhat

40.5

यदि॑न्द्र दि॒वि पार्ये॒ यदृध॒ग्यद्वा॒ स्वे सद॑ने॒ यत्र॒ वासि॑ ।
अतो॑ नो य॒ज्ञमव॑से नि॒युत्वा॑न्त्स॒जोषा॑ः पाहि गिर्वणो म॒रुद्भि॑ः ॥५॥

Yadindra divi parye yadridhagyadva sve sadane yatra vasi
Ato no yagyamavase niyutvantsajoshah pahi girvano marudbhih