Sukta 41

41.1

5 barhaspatyo bharadvajah, indrah, trishtup

अहे॑ळमान॒ उप॑ याहि य॒ज्ञं तुभ्यं॑ पवन्त॒ इन्द॑वः सु॒तास॑ः ।
गावो॒ न व॑ज्रि॒न्त्स्वमोको॒ अच्छेन्द्रा ग॑हि प्रथ॒मो य॒ज्ञिया॑नाम् ॥१॥

Ahelamana upa yahi yagyam tubhyam pavanta indavah sutasah
Gavo na vajrintsvamoko achchhendra gahi prathamo yagyiyanam

या ते॑ का॒कुत्सुकृ॑ता॒ या वरि॑ष्ठा॒ यया॒ शश्व॒त्पिब॑सि॒ मध्व॑ ऊ॒र्मिम् ।
तया॑ पाहि॒ प्र ते॑ अध्व॒र्युर॑स्था॒त्सं ते॒ वज्रो॑ वर्ततामिन्द्र ग॒व्युः ॥२॥

Ya te kakutsukrita ya varishtha yaya shashvatpibasi madhva urmim
Taya pahi pra te adhvaryurasthatsam te vajro vartatamindra gavyuh

ए॒ष द्र॒प्सो वृ॑ष॒भो वि॒श्वरू॑प॒ इन्द्रा॑य॒ वृष्णे॒ सम॑कारि॒ सोम॑ः ।
ए॒तं पि॑ब हरिवः स्थातरुग्र॒ यस्येशि॑षे प्र॒दिवि॒ यस्ते॒ अन्न॑म् ॥३॥

Esha drapso vrishabho vishvarupa indraya vrishne samakari somah
Etam piba harivah sthatarugra yasyeshishe pradivi yaste annam

सु॒तः सोमो॒ असु॑तादिन्द्र॒ वस्या॑न॒यं श्रेया॑ञ्चिकि॒तुषे॒ रणा॑य ।
ए॒तं ति॑तिर्व॒ उप॑ याहि य॒ज्ञं तेन॒ विश्वा॒स्तवि॑षी॒रा पृ॑णस्व ॥४॥

Sutah somo asutadindra vasyanayam shreyanchikitushe ranaya
Etam titirva upa yahi yagyam tena vishvastavishira prinasva

ह्वया॑मसि॒ त्वेन्द्र॑ याह्य॒र्वाङरं॑ ते॒ सोम॑स्त॒न्वे॑ भवाति ।
शत॑क्रतो मा॒दय॑स्वा सु॒तेषु॒ प्रास्माँ अ॑व॒ पृत॑नासु॒ प्र वि॒क्षु ॥५॥

Hvayamasi tvendra yahyarvangaram te somastanve bhavati
Shatakrato madayasva suteshu prasmam ava pritanasu pra vikshu