Sukta 39

39.1

5 barhaspatyo bharadvajah, indrah, trishtup

म॒न्द्रस्य॑ क॒वेर्दि॒व्यस्य॒ वह्ने॒र्विप्र॑मन्मनो वच॒नस्य॒ मध्व॑ः ।
अपा॑ न॒स्तस्य॑ सच॒नस्य॑ दे॒वेषो॑ युवस्व गृण॒ते गोअ॑ग्राः ॥१॥

Mandrasya kaverdivyasya vahnervipramanmano vachanasya madhvah
Apa nastasya sachanasya devesho yuvasva grinate goagrah

अ॒यमु॑शा॒नः पर्यद्रि॑मु॒स्रा ऋ॒तधी॑तिभिॠत॒युग्यु॑जा॒नः ।
रु॒जदरु॑ग्णं॒ वि व॒लस्य॒ सानुं॑ प॒णीँर्वचो॑भिर॒भि यो॑ध॒दिन्द्र॑ः ॥२॥

Ayamushanah paryadrimusra ritadhitibhiritayugyujanah
Rujadarugnam vi valasya sanum paninrvachobhirabhi yodhadindrah

अ॒यं द्यो॑तयद॒द्युतो॒ व्य१क्तून्दो॒षा वस्तो॑ः श॒रद॒ इन्दु॑रिन्द्र ।
इ॒मं के॒तुम॑दधु॒र्नू चि॒दह्नां॒ शुचि॑जन्मन उ॒षस॑श्चकार ॥३॥

Ayam dyotayadadyuto vya1ktundosha vastoh sharada indurindra
Imam ketumadadhurnu chidahnam shuchijanmana ushasashchakara

अ॒यं रो॑चयद॒रुचो॑ रुचा॒नो॒३ऽयं वा॑सय॒द्व्यृ१तेन॑ पू॒र्वीः ।
अ॒यमी॑यत ऋत॒युग्भि॒रश्वै॑ः स्व॒र्विदा॒ नाभि॑ना चर्षणि॒प्राः ॥४॥

Ayam rochayadarucho ruchano3yam vasayadvyri1tena purvih
Ayamiyata ritayugbhirashvaih svarvida nabhina charshaniprah

नू गृ॑णा॒नो गृ॑ण॒ते प्र॑त्न राज॒न्निष॑ः पिन्व वसु॒देया॑य पू॒र्वीः ।
अ॒प ओष॑धीरवि॒षा वना॑नि॒ गा अर्व॑तो॒ नॄनृ॒चसे॑ रिरीहि ॥५॥

Nu grinano grinate pratna rajannishah pinva vasudeyaya purvih
Apa oshadhiravisha vanani ga arvato nrinrichase ririhi