Sukta 38

38.1

5 barhaspatyo bharadvajah, indrah, trishtup

अपा॑दि॒त उदु॑ नश्चि॒त्रत॑मो म॒हीं भ॑र्षद्द्यु॒मती॒मिन्द्र॑हूतिम् ।
पन्य॑सीं धी॒तिं दैव्य॑स्य॒ याम॒ञ्जन॑स्य रा॒तिं व॑नते सु॒दानु॑ः ॥१॥

Apadita udu nashchitratamo mahim bharshaddyumatimindrahutim
Panyasim dhitim daivyasya yamanjanasya ratim vanate sudanuh

दू॒राच्चि॒दा व॑सतो अस्य॒ कर्णा॒ घोषा॒दिन्द्र॑स्य तन्यति ब्रुवा॒णः ।
एयमे॑नं दे॒वहू॑तिर्ववृत्यान्म॒द्र्य१गिन्द्र॑मि॒यमृ॒च्यमा॑ना ॥२॥

Durachchida vasato asya karna ghoshadindrasya tanyati bruvanah
Eyamenam devahutirvavrityanmadrya1gindramiyamrichyamana

तं वो॑ धि॒या प॑र॒मया॑ पुरा॒जाम॒जर॒मिन्द्र॑म॒भ्य॑नूष्य॒र्कैः ।
ब्रह्मा॑ च॒ गिरो॑ दधि॒रे सम॑स्मिन्म॒हाँश्च॒ स्तोमो॒ अधि॑ वर्ध॒दिन्द्रे॑ ॥३॥

Tam vo dhiya paramaya purajamajaramindramabhyanushyarkaih
Brahma cha giro dadhire samasminmahanshcha stomo adhi vardhadindre

वर्धा॒द्यं य॒ज्ञ उ॒त सोम॒ इन्द्रं॒ वर्धा॒द्ब्रह्म॒ गिर॑ उ॒क्था च॒ मन्म॑ ।
वर्धाहै॑नमु॒षसो॒ याम॑न्न॒क्तोर्वर्धा॒न्मासा॑ः श॒रदो॒ द्याव॒ इन्द्र॑म् ॥४॥

Vardhadyam yagya uta soma indram vardhadbrahma gira uktha cha manma
Vardhahainamushaso yamannaktorvardhanmasah sharado dyava indram

ए॒वा ज॑ज्ञा॒नं सह॑से॒ असा॑मि वावृधा॒नं राध॑से च श्रु॒ताय॑ ।
म॒हामु॒ग्रमव॑से विप्र नू॒नमा वि॑वासेम वृत्र॒तूर्ये॑षु ॥५॥

Eva jagyanam sahase asami vavridhanam radhase cha shrutaya
Mahamugramavase vipra nunama vivasema vritraturyeshu