Sukta 37

37.1

5 barhaspatyo bharadvajah, indrah, trishtup

अ॒र्वाग्रथं॑ वि॒श्ववा॑रं त उ॒ग्रेन्द्र॑ यु॒क्तासो॒ हर॑यो वहन्तु ।
की॒रिश्चि॒द्धि त्वा॒ हव॑ते॒ स्व॑र्वानृधी॒महि॑ सध॒माद॑स्ते अ॒द्य ॥१॥

Arvagratham vishvavaram ta ugrendra yuktaso harayo vahantu
Kirishchiddhi tva havate svarvanridhimahi sadhamadaste adya

प्रो द्रोणे॒ हर॑य॒ः कर्मा॑ग्मन्पुना॒नास॒ ऋज्य॑न्तो अभूवन् ।
इन्द्रो॑ नो अ॒स्य पू॒र्व्यः प॑पीयाद्द्यु॒क्षो मद॑स्य सो॒म्यस्य॒ राजा॑ ॥२॥

Pro drone harayah karmagmanpunanasa rijyanto abhuvan
Indro no asya purvyah papiyaddyuksho madasya somyasya raja

आ॒स॒स्रा॒णास॑ः शवसा॒नमच्छेन्द्रं॑ सुच॒क्रे र॒थ्या॑सो॒ अश्वा॑ः ।
अ॒भि श्रव॒ ऋज्य॑न्तो वहेयु॒र्नू चि॒न्नु वा॒योर॒मृतं॒ वि द॑स्येत् ॥३॥

Asasranasah shavasanamachchhendram suchakre rathyaso ashvah
Abhi shrava rijyanto vaheyurnu chinnu vayoramritam vi dasyet

वरि॑ष्ठो अस्य॒ दक्षि॑णामिय॒र्तीन्द्रो॑ म॒घोनां॑ तुविकू॒र्मित॑मः ।
यया॑ वज्रिवः परि॒यास्यंहो॑ म॒घा च॑ धृष्णो॒ दय॑से॒ वि सू॒रीन् ॥४॥

Varishtho asya dakshinamiyartindro maghonam tuvikurmitamah
Yaya vajrivah pariyasyanho magha cha dhrishno dayase vi surin

इन्द्रो॒ वाज॑स्य॒ स्थवि॑रस्य दा॒तेन्द्रो॑ गी॒र्भिर्व॑र्धतां वृ॒द्धम॑हाः ।
इन्द्रो॑ वृ॒त्रं हनि॑ष्ठो अस्तु॒ सत्वा ऽऽता सू॒रिः पृ॑णति॒ तूतु॑जानः ॥५॥

Indro vajasya sthavirasya datendro girbhirvardhatam vriddhamahah
Indro vritram hanishtho astu satva ta surih prinati tutujanah