Sukta 36

36.1

5 naro bharadvajah, indrah, trishtup

स॒त्रा मदा॑स॒स्तव॑ वि॒श्वज॑न्याः स॒त्रा रायोऽध॒ ये पार्थि॑वासः ।
स॒त्रा वाजा॑नामभवो विभ॒क्ता यद्दे॒वेषु॑ धा॒रय॑था असु॒र्य॑म् ॥१॥

Satra madasastava vishvajanyah satra rayodha ye parthivasah
Satra vajanamabhavo vibhakta yaddeveshu dharayatha asuryam

अनु॒ प्र ये॑जे॒ जन॒ ओजो॑ अस्य स॒त्रा द॑धिरे॒ अनु॑ वी॒र्या॑य ।
स्यू॒म॒गृभे॒ दुध॒येऽर्व॑ते च॒ क्रतुं॑ वृञ्ज॒न्त्यपि॑ वृत्र॒हत्ये॑ ॥२॥

Anu pra yeje jana ojo asya satra dadhire anu viryaya
Syumagribhe dudhayervate cha kratum vrinjantyapi vritrahatye

तं स॒ध्रीची॑रू॒तयो॒ वृष्ण्या॑नि॒ पौंस्या॑नि नि॒युत॑ः सश्चु॒रिन्द्र॑म् ।
स॒मु॒द्रं न सिन्ध॑व उ॒क्थशु॑ष्मा उरु॒व्यच॑सं॒ गिर॒ आ वि॑शन्ति ॥३॥

Tam sadhrichirutayo vrishnyani paunsyani niyutah sashchurindram
Samudram na sindhava ukthashushma uruvyachasam gira a vishanti

स रा॒यस्खामुप॑ सृजा गृणा॒नः पु॑रुश्च॒न्द्रस्य॒ त्वमि॑न्द्र॒ वस्व॑ः ।
पति॑र्बभू॒थास॑मो॒ जना॑ना॒मेको॒ विश्व॑स्य॒ भुव॑नस्य॒ राजा॑ ॥४॥

Sa rayaskhamupa srija grinanah purushchandrasya tvamindra vasvah
Patirbabhuthasamo jananameko vishvasya bhuvanasya raja

स तु श्रु॑धि॒ श्रुत्या॒ यो दु॑वो॒युर्द्यौर्न भूमा॒भि रायो॑ अ॒र्यः ।
असो॒ यथा॑ न॒ः शव॑सा चका॒नो यु॒गेयु॑गे॒ वय॑सा॒ चेकि॑तानः ॥५॥

Sa tu shrudhi shrutya yo duvoyurdyaurna bhumabhi rayo aryah
Aso yatha nah shavasa chakano yugeyuge vayasa chekitanah