সূক্ত 36

36.1

৫ নরো ভারদ্বাজঃ । ইন্দ্রঃ । ত্রিষ্টুপ্ ।

সত্রা মদাসস্তব বিশ্বজন্যাঃ সত্রা রায়োঽধ যে পার্থিবাসঃ ।
সত্রা বাজানামভবো বিভক্তা যদ্দেবেষু ধারয়থা অসুর্যম্ ॥১॥

36.2

অনু প্র যেজে জন ওজো অস্য সত্রা দধিরে অনু বীর্যায় ।
স্যূমগৃভে দুধয়েঽর্বতে চ ক্রতুং বৃঞ্জন্ত্যপি বৃত্রহত্যে ॥২॥

36.3

তং সধ্রীচীরূতয়ো বৃষ্ণ্যানি পৌংস্যানি নিয়ুতঃ সশ্চুরিন্দ্রম্ ।
সমুদ্রং ন সিন্ধব উক্থশুষ্মা উরুব্যচসং গির আ বিশন্তি ॥৩॥

36.4

স রায়স্খামুপ সৃজা গৃণানঃ পুরুশ্চন্দ্রস্য ত্বমিন্দ্র বস্বঃ ।
পতির্বভূথাসমো জনানামেকো বিশ্বস্য ভুবনস্য রাজা ॥৪॥

36.5

স তু শ্রুধি শ্রুত্যা যো দুবোয়ুর্দ্যৌর্ন ভূমাভি রায়ো অর্যঃ ।
অসো যথা নঃ শবসা চকানো যুগেয়ুগে বয়সা চেকিতানঃ ॥৫॥